Read Dagbani 1 Samuɛl 10 Bible Online

1 Samuɛl 10 - Dagbani bible

1 Samuɛl 10

¹Di saha ka Samuɛl daa zaŋ kpam labil’ ni na nti kpaai vie Sool zuɣu ni ka mɔɣis’ o kpariŋ ka yɛl’ o, “Yawɛ n-zaŋ kpam ŋɔ booi bah’ a zuɣu ni ni a leeg’ o niriba Izraɛlnim’ naa. A ni ti di nam su Yawɛ niriba, ka tiligi ba bɛ dimnim’ bɛn gili ba ŋɔ zaa nuu ni. Dimbɔŋɔ n-yɛn nyɛ di shihirili n-wuhi ni Yawɛ n-shiri zal’ a ni a su o niriba maa.

²A yi yi n sani zuŋɔ kuna, a ni tuhi niriba ayi soli Reechɛl gballi din be Zɛliza, Bɛnjamin tiŋgban’ ni la gbini ka bɛ yɛl’ a, ‘Yi ni daa yi n-chaŋ ni yi ti bo bun’ shɛb’ shee la, ti nya ba. Ka pumpɔŋɔ bɛ yɛla bi lan muɣis’ a ba, a yɛla n-kpalim muɣis’ o. Ka o kul yɛra, “Ka wula ka n yɛn niŋ zaŋ chaŋ m bia ŋɔ polo?” ’

³Di saha, a yi yi nimaani n-chaŋ ti paai Tabo oki tia la gbini, a ni tuhi niriba ata soli ka bɛ chani Bɛtɛl Naawuni sani ni bɛ ti mali sara. Bɛ ni yino ni ti vɔri bubih’ ata, ka yino gbibi bɔrɔbɔro kpil’ ata, ka ŋun’ la mi nyaɣiri wain koligu pali.

⁴Bɛ ni ti puh’ a ka ti a bɔrɔbɔro kpil’ ayi, ka a deei li bɛ nuu ni.

⁵Di nyaaŋa ka a yi nimaani nti paai Naawuni zoli din be Gibia Filistia tɔbbihi ni be shɛl’ la. A yi yi nimaani nti yɛn kpe tiŋ’ puuni, a ni tuhi anab’ bɔbili soli ka bɛ yi zoli zuɣu n-siɣirina ka ŋmɛri mɔɣilɔnim’ ka chaɣisiri chaɣisa, ka ŋmɛri goonjɛnima, ka pɛbiri yuhi, ka tɔɣisir’ anabitali yɛtɔɣa.

⁶Di saha Yawɛ shia ni siɣi a zuɣu na pam, ka a pahi bɛ zuɣu n-tɔɣisir’ anabitali yɛtɔɣa ka a biɛhigu taɣi.

⁷Ka shihira ŋɔ zaa yi ti niŋ a nyin’ niŋm’ a nuu ni ni tooi niŋ shɛlikam, dama Naawuni be a sani.

⁸Ka a ti daŋ n tooni chaŋ Giligal, nyama, n ni ka nimaani na ti mali sara shɛli bɛ ni zaŋdi nyɔri buɣim la mini suhudoo sara maligunima. Di simdi ka a ti guhi ma nimaani daba ayopɔin hal ka n ti kana ti wuh’ a a ni yɛn niŋ shɛm.”

⁹Sool ni daa ŋmaligi Samuɛl sani ni o chaŋ, ka Naawuni taɣ’ o suhu. Ka shihira ŋɔ zaa daa niŋ pali dindali maa.

¹⁰Bɛ ni daa ti paai Gibia ka anab’ bɔbili shiri tuh’ o soli ka Naawuni shia daa siɣ’ o zuɣu na pam, ka o pahi bɛ zuɣu n-tɔɣisiri anabitali yɛtɔɣa.

¹¹Ka bɛnkam pun mi o ni daa ti nya ka o tɔɣisiri anabitali yɛtɔɣa maa, ka bɛ yɛli taba, “Ka bɔ n-lee siɣi Kish bia ŋɔ zuɣu na? Sool gba nyɛla anabi?”

¹² Ka do’ so daa be nimaani n-garigi bɔhi ba, “Ka anabinim’ maa ba lee nyɛ ŋuni?” Dinzuɣu lala yɛtɔɣili maa daa leei yɛtɔɣ’ ŋahili ka bɛ mal’ li yɛra, “Sool gba nyɛla anabi?”

¹³O ni daa tɔɣisi anabitali yɛtɔɣa maa naai, o daa chaŋ ti dula daboli zuɣu.

¹⁴Ka o bapir’ daa ti bɔh’ o min’ o tumtumda maa, “Ya ka yi lee chaŋ?” Ka Sool garigi yɛl’ o, “Ti daa chaŋla bunsi la bɔbu; ka daa ti bo ba je ka chaŋ Samuɛl sani.”

¹⁵Ka o bapir’ maa daa yɛl’ o, “N suhir’ a mi, yɛlim’ ma Samuɛl ni yɛl’ a shɛm.”

¹⁶Ka Sool daa yɛl’ o bapir’ maa, “O kahigimi wuhi ti ni yi nya bunsi maa.” Amaa Samuɛl ni daa yɛl’ o nam yɛtɔɣa la dina, o daa bi saɣi yɛl’ o di shɛli yɛla.

¹⁷Dahin shɛli ka Samuɛl daa ti boli niriba ni bɛ laɣim Yawɛ sanna Mizipa.

¹⁸Ka bɛ daa laɣimna, ka o yɛli Izraɛlnim’ maa, “Yawɛ ŋun nyɛ Izraɛlnim’ Naawuni ŋɔ ni yɛli shɛm m-bɔŋɔ, ‘Mani n-daa yihi yinim’ Izraɛlnim’ Ijipti tiŋgbɔŋ ni, ka fan ya Ijiptinim’ mini na’ shɛb’ bɛn daa niŋdi ya fitiina la zaa nuu ni bahi.’

¹⁹Amaa zuŋɔ yi zaɣisi yi Naawuni ŋun daa yihi ya azaaba mini muɣisigu ni maa. Ka yɛli, ‘Aai! Bom’ naa ti ti.’ Dinzuɣu pumpɔŋɔ yi zuliya kam laɣimmi tab’ gbilligbilli ka Yawɛ sanna.”

²⁰Ka Samuɛl daa zaŋ zuliyanim’ maa zaa zali ka bɛ vihi nya, ka piila Bɛnjamin zuliya.

²¹Ka o daa chɛ ka Bɛnjamin zuliya maa ni daŋ kam niriba laɣim gbilligbilli, ka bɛ vihi nya, ka piila Matiri daŋ. Di nyaaŋa ka o daa zaŋ Matiri daŋ maa ni dɔbba zaa zali, ka bɛ vihi nya, ka piila Kish bia Sool. Amaa bɛ ni daa ti bɔr’ o bɛ daa bi nya o.

²²Ka daa lan bɔhi Yawɛ, “Doo maa ka kpe na?” Ka Yawɛ daa yɛl’ ba, “Nyamiya, o sɔɣ’ be kpalansi ŋɔ nyaaŋa.”

²³Di saha ka bɛ daa zo n-chaŋ ti zaŋ o na, ka o ni daa kana nti zani niriba maa sani, o daa wɔɣ’ gari sokam.

²⁴Ka Samuɛl daa yɛli niriba maa zaa, “Yi nya Yawɛ ni pii so maa? Niriba ŋɔ zaa ni so bi be kaman ŋuna.” Ka niriba maa zaa daa kuhi yɛli, “Naawuni dolim’ naa maa nyɛvili.”

²⁵Ka Samuɛl daa yɛl’ niriba maa naa ni mali so’ shɛŋa min’ o talahi tuma ni nyɛ shɛm. Ka daa sab’ li niŋ litaafi ni n-zaŋ li ti sɔŋ Yawɛ tooni. Di saha ka Samuɛl daa bahi niriba maa zaa ka bɛ wurim, ka sokam kul’ o ya.

²⁶Ka Sool gba daa kul’ o ya Gibia, ka dɔbba bɛn mali suhukpeeni, ka Naawuni yɛligu maa kpe bɛ suhuri ni daa pahi dol’ o kuli.

²⁷Amaa ka ninvuɣ’ yo’ shɛb’ daa yɛra, “Wula ka doo ŋɔ yɛn tooi niŋ tiligi ti?” Ka bɛ daa ʒiɛm o, ka zaɣis’ o pina tibu. Amaa ka o daa kul shini.