Read Dagbani 1 Samuɛl 11 Bible Online

1 Samuɛl 11 - Dagbani bible

1 Samuɛl 11

¹Dahin shɛli ka Ammɔnnim’ na’ so ŋun yuli daa booni Nahash la daa ti lo tɔb’ na nti teei gili Jabɛshi din be Giliad tintariga la nima. Ka Jabɛshi dɔbba zaa daa yɛli naa Nahash, “Chɛ ka ti min’ a tɔɣisi ka a zali ti zaligu ka ti jɛmd’ a.”

²Amaa ka Ammɔnnim’ naa Nahash daa yɛl’ ba, “Yi yi ni saɣi ka n fɔɣi yi nudiriti polo nimbihi zaa din ni chɛ ka Izraɛlnim’ zaa nya filiŋ, n ni chɛ ka m mini ya tɔɣisi.”

³Ka Jabɛshi kpamba daa yɛl’ o, “Tim ti daba ayopɔin ka ti tim Izraɛl tiŋgbɔŋ ni zaa ti yɛl’ ba, ka so yi kani ŋun ni fa ti bahi, di saha ti ni zaŋ timaŋ’ ti a.”

⁴Tuumba maa ni daa ti paai Gibia din nyɛ Sool ya la nti yɛli yɛlli maa ka di lu niriba tiba ni, bɛ daa dii duhila kuŋa n-kuhiri pampam.

⁵Di saha ka Sool daa dol’ o naɣikɔra yi puuni kunna ti wum kuhigu maa ka bɔhi, “Ka bɔ n-niŋ niriba maa ka bɛ zaa ti kuhiri lala?” Ka bɛ daa yɛl’ o Jabɛshinim’ ni ʒi lahiba’ shɛli maa na.

⁶Sool ni daa wum yɛtɔɣa maa, ka Naawuni shia siɣ’ o zuɣu na ni kpiɔŋ pam, ka o suhu daa yiɣisi pam,

⁷Ka o gbah’ o naɣikɔra ayi n-ku ŋ-ŋmahiŋmahi ba n-chɛ ka tuumba zaŋ li gili Izraɛl tiŋgbɔŋ maa ni zaa n-tari niriba ka yɛra, “Ŋunkam bi yina n-dol’ Sool mini Samuɛl chaŋ tɔb’ ni, lala n-yɛn niŋ dilan’ naɣikɔra.” Ka Yawɛ yɛla dabiɛm daa gbahi niriba maa, ka bɛ zaa daa yina naŋgbanyini.

⁸Ka Sool daa laɣim ba luɣ’ shɛli din yuli booni Bɛzɛk la. Izraɛlnim’ kalinli daa nyɛla tuhi’ kɔbisita. Ka Judanim’ mi kalinli nyɛ tuhi’ pihita.

⁹Ka bɛ daa yɛl’ tuun’ shɛb’ bɛn kana maa, “Yi yi kuli yin’ yɛlimiya Jabɛshi din be Giliad tintariga maa nima, ‘Biɛɣuni zaŋ chaŋ wuntaŋ’ sa ti yɛn bii, yi ni nya faako.’ ” Tuumba maa ni daa lab’ kuli ti yɛli Jabɛshinim’ lala, ka bɛ suhuri paligi.

¹⁰Ka Jabɛshinim’ maa daa yɛli Naa Nahash, “Biɛɣuni ti sa ni zaŋ timaŋ’ ti a, ka a niŋ ti a ni bɔri shɛm.”

¹¹Ka biɛɣu daa ti neerina nolɔɣu kukoli saha, ka Sool daa piri tɔbbihi maa ʒii buta, ka bɛ daa kana ti kpe Ammɔnnim’ suɣa sunsuuni n-daa ŋma bɛ zuɣuri hal ka wuntaŋ’ ti bii, ka bɛ ni daa bi ku shɛb’ la wurim kpe yɔɣu, ka sokam kpa o kpabu polo, hal ka bɛ niriba ayi gba bi lan doli taba.

¹²Di saha ka Izraɛlnim’ maa daa bɔhi Samuɛl, “Banima n-daa lee yɛli ni Sool ku tooi niŋ ti naa la? Chɛ ka bɛ gbahi ba na ka ti ku ba.”

¹³Amaa ka Sool daa yɛli, “Aai, di bi simdi ni ti ku so zuŋɔ, dama zuŋɔ ka Yawɛ ti Izraɛlnim’ faako.”

¹⁴Di saha ka Samuɛl daa yɛli Izraɛlnim’ maa, “Kamiyana ka ti chaŋ Giligal nti lan leei ti nam maa.”

¹⁵Ka bɛ zaa daa chaŋ Giligal, ka bɛ ti zaŋ Sool n-leei naa Yawɛ tooni Giligal ka mali suhudoo sara Yawɛ tooni nimaani. Ka Sool mini Izraɛlnim’ zaa suhuri daa paligi pam.