Read Dagbani 1 Samuɛl 16 Bible Online

1 Samuɛl 16 - Dagbani bible

1 Samuɛl 16

¹Ka Yawɛ daa bɔhi Samuɛl, “Bɔ saha ka a suhusaɣiŋgu ŋɔ yɛn naai zaŋ chaŋ Sool polo? Dama a nya ka n zaɣis’ o ni o lan pala Izraɛlnim’ naa. Niŋmi kpam pali a yiligu ka n tim a ka a chaŋ Jɛsi ŋun nyɛ Bɛtilihɛm nir’ la sani, dama m piig’ o bidibisi ni yino ni n leei naa.”

²Ka Samuɛl daa bɔh’ o, “Wula ka n lee yɛn tooi niŋ chaŋ? Dama Sool yi wum di yɛla o ni ku ma.” Ka Yawɛ yɛl’ o, “Bom’ naɣisaa chaŋ ti yɛli, ‘N kamina ni n ti mali sara ti Yawɛ.’

³Ka a boli Jɛsi ka o ka sara maligu maa shee na, ka n ti wuh’ a a ni yɛn niŋ shɛm. Ka a ti booi kpam maa bahi n ni yɛn wuh’ a ninvuɣ’ so maa zuɣu ni ti ma.”

⁴Ka Samuɛl daa niŋ Yawɛ ni zal’ o ni o niŋ shɛm maa, ka chaŋ Bɛtilihɛm. Ka tiŋ’ maa ni kpamba daa kana ti tuh’ o soli ka bɛ niŋgbuna sɔhira, ka bɛ bɔh’ o, “Alaafee ka a kana?”

⁵Ka o yɛli, “Iin, Alaafee; N kamina ni n ti mali sara ti Yawɛ, malimiya yimaŋa n-kana ti pahi n zuɣu sara maligu maa shee.” Ka o daa chɛ ka Jɛsi min’ o bidibisi gba mali bɛmaŋa, ka o boli ba ni bɛ ka sara maligu maa shee na.

⁶Bɛ ni daa kana ka o ti nya Ɛliab ka yɛl’ o suhu ni, “Biɛhiŋ kani, Yawɛ ni pii so maa n-ʒe o tooni ŋɔ.”

⁷Amaa ka Yawɛ yɛli Samuɛl, “Di lihir’ o niŋgbuŋ biɛhigu bee o wɔɣilim, man’ pun zaɣis’ o, dama Yawɛ ŋun bi lihiri kaman ninsal’ ni lihiri shɛm, ninsal’ ŋun’ lihirila niŋgbuŋ biɛhigu, amaa Yawɛ ŋun’ lihirila suhu ni.”

⁸Di saha ka Jɛsi daa bol’ o bidibiga Abinadab na nti chɛ ka o gari Samuɛl tooni. Ka Samuɛl yɛli, “Yawɛ bi pii ŋumbɔŋɔ gba.”

⁹Ka Jɛsi lan chɛ ka Shamma kana ti gari, ka o lan yɛli, “Yawɛ bi pii ŋumbɔŋɔ gba.”

¹⁰Ka Jɛsi daa chɛ ka o bidibis’ ayopɔin maa kana ti gari Samuɛl tooni, ka Samuɛl daa yɛli Jɛsi, “Yawɛ bi pii bɛmbɔŋɔ ni so.”

¹¹Ka Samuɛl daa bɔhi Jɛsi, “A bidibisi maa zaa m-be kpe ŋɔ?” Ka o yɛli, “Di kpalimla biasani, amaa ŋun’ gulila piɛri.” Ka Samuɛl yɛli Jɛsi, “Timmi ti zaŋ o na, dama ti ku ʒini ka pa ni o paala kpe na.”

¹²Ka o daa tim ka bɛ ti zaŋ o na. O daa nyɛla ŋun mal’ alaafee, ka o nimbihi kul viɛla, ka o lan nyɛ nachimbil’ viɛlli. Ka Yawɛ daa yɛli Samuɛl, “Yiɣisim’ booi kpam bah’ o zuɣu ni; ŋuna m-bala.”

¹³Di saha ka Samuɛl daa zaŋ kpam din be yiligu ni maa m-booi bah’ o zuɣu ni, o biɛyanim’ maa zaa tooni. Dindali maa zaŋ chana, ka Yawɛ shia daa siɣi Dauda zuɣu na pam. Dimbɔŋɔ nyaaŋa ka Samuɛl daa yiɣisi labi Rama.

¹⁴Di saha ka Yawɛ shia daa zo ka chɛ Sool, ka Yawɛ daa chɛ ka alizin’ biɛɣu ʒini’ Sool zuɣu m-muɣis’ o pam.

¹⁵Ka Sool tumtumdiba daa yɛl’ o, “Nyama, pumpɔŋɔ Naawuni n-chɛ ka alizin’ biɛɣu ŋɔ kana ti muɣisir’ a maa.

¹⁶Dinzuɣu n dana, yɛlim’ a tumtumdib’ zaa bɛn be a sani ŋɔ ni bɛ lihim’ nya ninvuɣ’ so ŋun mi mɔɣilo ŋmɛbu viɛnyɛliŋga ti a, ka Naawuni ni chɛ ka alizin’ biɛ’ so kana ti muɣisir’ a maa yi ti lan siɣ’ a zuɣu na, ka dilan’ ŋme mɔɣilo maa, a ni nya amaŋa.”

¹⁷Di saha ka Sool daa yɛl’ o tumtumdiba, “Yulimiya bo n-nya ŋun tooi ŋmɛri mɔɣilo viɛnyɛliŋga ti ma na.”

¹⁸Ka nachimbihi maa ni yino garigi yɛli, “Nyama, n daa nya Jɛsi ŋun nyɛ Bɛtilihɛm nir’ la dapala, ka o mi mɔɣilo ŋmɛbu pam, ka nyɛ do’ so ŋun mali suhukpeeni, ka ni tooi tuhi tɔbu; o tɔɣisiri yɛtɔɣa viɛnyɛliŋga, ka lan nyɛ ŋun viɛla, ka Yawɛ be o sani.”

¹⁹Dinzuɣu ka Sool daa tim tuumba Jɛsi sani ti yɛl’ o, “Zaŋm’ a dapala Dauda ŋun guli piɛri la ti ma na.”

²⁰Ka Jɛsi daa bo bɔrɔbɔro mini wain koligu pali ni busaa n-zaŋ pa buŋ’ zuɣu ti o bia Dauda ni o zaŋ mali chaŋ Sool sani.

²¹Ka Dauda daa ka Sool sanna nti pilig’ o tuma tumbu, ka Sool daa yu o pam, ka o zaŋ o leeg’ o tɔbutuhiri’ neenʒira.

²²Ka Sool daa ti tim ti yɛli Jɛsi, “Chɛ ka Dauda kpalim n yili ŋɔ n-tumdi n tuma; dama n suhu yu o pam.”

²³Naawuni ni daa chɛ ka alizin’ biɛ’ so ʒi Sool zuɣu maa daa yi ti kul lan siɣina saha shɛlikam, Dauda zaŋdila mɔɣilo maa ŋmɛra, ka alizin’ biɛɣu maa zo ka chɛ Sool, ka o ni maai, ka o nya omaŋa.