Read Dagbani 1 Samuɛl 2 Bible Online

1 Samuɛl 2 - Dagbani bible

1 Samuɛl 2

¹Ka Hanna daa suhi Naawuni yɛli, “Naawuni ti ma suhupiɛlli, ka chɛ ka n nya kpiɔŋ ŋun’ Yawɛ sani. N larila n dimnima, dama m mali suhupiɛlli n nasara dibu puuni.

²“So kani m-be kasi kaman nyin’ Yawɛ, so lan kani m-pah’ a zuɣu. Tampin’ shɛli mi kani m-be kaman nyin’ Yawɛ.

³Chɛl’ barinyubo yɛtɔɣa tɔɣisibu, ka di lan chɛ ka karimbaan’ yɛtɔɣa yi a nol’ ni na yaha. Dama Yawɛ ŋun nyɛ Naawuni ŋɔ mi binshɛɣukam, ka mi daadam ni niŋdi shɛlikam.

⁴Bɛn mali kpiɔŋ tɔbiri kabisiya, ka ninvuɣ’ gbarima nya yaa.

⁵Ninvuɣ’ shɛb’ bɛn daa diri tiɣiri zaŋ bɛmaŋ’ pa talima pumpɔŋɔ ni bɛ nya bindirigu di, amaa kum bi lan mali di ni daa mali shɛb’ la yaha. Paɣiŋoo dɔɣi bih’ ayopɔin, ka ŋun daa dɔɣi bihi pam la kɔŋ bihi.

⁶Yawɛ n-nyɛ ŋun kura, ka lan nyɛ ŋun tiri nyɛvili. Ŋuna n-tahiri niriba kpiimba biɛhigu shee, ka lan neeri ba.

⁷Yawɛ n-chɛ ka ninvuɣ’ shɛb’ nyɛ nandaamba, ka chɛ ka shɛb’ mi nyɛ bundaannima. Ŋuna n-filindi nira, ŋuna n-lan duhiri nira.

⁸Ŋuna n-yiɣisiri tarimba taŋkpaɣu ni, ka kpuɣiri nandaamba tampuli zuɣu ni o chɛ ka bɛ mini nabihi laɣim ʒini n-di kuɣ’ din mali jilima fali. Dama Yawɛ n-su dunia ŋɔ daantalisi, ka zaŋ dunia ŋɔ n-tam di zuɣu.

⁹“O ni gul’ o ninvuɣ’ shɛb’ bɛn ʒe o yim, amaa o ni zaŋ ninvuɣ’ biɛri bɛna m-bahi zibisim ni; dama ninsal’ ku tooi di nasara omaŋmaŋ’ yiko ni.

¹⁰ Yawɛ dimnim’ ni chɛrisichɛrisi. Zallakudura Naa ni be alizanda ni ka tahi bɛ zuɣu na. Yawɛ ni kari dunia ŋɔ nim’ zaa saria. O ni ti o naa yaa, ka ti o ninvuɣ’ gahindili yiko.”

¹¹Dimbɔŋɔ nyaaŋa ka Ɛlikana daa lab’ kul’ o ya Rama, ka bia maa daa be Ɛli ŋun daa nyɛ maligumaana maa sani n-tumdi Yawɛ tuma.

¹²Ɛli bidibisi daa nyɛla ninvuɣ’ yoya; bɛ baɣa daa ka Yawɛ ni.

¹³Bɛ mi baɣa daa ka maligumaaniba tuma ni nyɛ shɛm zaŋ chaŋ niriba maa sani. So daa yi kɔrigi biŋkɔbigu mali sara n-zaŋ di nimdi maa duɣira, maligumaana yiŋbia zaŋdila dirigu din mali jɛba ata kana

¹⁴nti tim nimdi maa ni be ʒɛduɣ’ shɛli ni maa n-kuhi nimdi maa, ka nim’ shɛli din doli dirigu maa yina, maligumaana maa n-su li. Lala ka bɛ daa niŋdi Izraɛlnim’ zaa bɛn daa yi chani Shilo nti maani sara.

¹⁵Din pahi nyɛla, so daa yi mali sara, ka na bi yihi biŋkpam nyo buɣim, maligumaana yiŋbia kanimina ti yɛl’ o, “Ŋmaam’ nim’ kahili ti ma ka n ti ti maligumaana ka o she, dama o ku deei nin’ duɣirili a sani, naɣila nim’ kahili.”

¹⁶Ka dilan’ yi yɛl’ o, “Chɛ ka ti zaŋ biŋkpam nyo buɣim pɔi, ka a naanyi ŋmaag’ a ni bɔri shɛm tariga.” O yɛrimi, “Aai, ŋmaam’ ti ma pumpɔŋɔ, di yi pa lala n ni zaŋ kiŋkansi ŋmaai li.”

¹⁷Ka o bihi maa daalahichi daa ti galisi pam Yawɛ sani, dama bɛ daa bi tiri Yawɛ sara maligu pina maa jilima.

¹⁸Ka Samuɛl daa kul beni n-tumdi Yawɛ tuma, ka mali tampiɛlli din be kaman mukur’ la lɔr’ o shee ni.

¹⁹Yuuni kam o ma daa yi shɛrila binyɛr’ bila m-mali chani ti tir’ o saha shɛl’ o min’ o yidana daa yi ti chaŋ ni bɛ ti mali yuuniyuuni sara maa.

²⁰Ka Ɛli daa yi suhiri alibarika niŋdi Ɛlikana min’ o paɣ’ maa ni ka yɛri Ɛlikana, “Yawɛ ni chɛ ka a paɣ’ ŋɔ dɔɣi bihi ti a ka bɛ zan’ o ni zaŋ bi so ti ŋun’ Yawɛ ŋɔ zaani.” Di nyaaŋa ka bɛ lan lab’ kuli bɛ ya.

²¹Ka Yawɛ daa niŋ alibarika niŋ Hanna ni, ka o lan dɔɣi bidibis’ ata mini bipuɣins’ ayi. Ka Samuɛl daa kul be Yawɛ tooni hal ti zooi.

²²Di saha Ɛli daa kurigiya pam ka wumd’ o bihi maa ni niŋdi Izraɛlnim’ shɛm maa zaa, hal ka mali paɣ’ shɛb’ bɛn daa tumdi tuma Naawuni jɛmbu duu dunol’ ni la doona.

²³Ka Ɛli daa bɔhi ba, “Bɔ n-niŋ ka yi niŋdi lala? Dama sokam kul yɛri ma la yi ni tumdi tuumbiɛ’ shɛŋa maa yɛla.”

²⁴Ka yɛli ba, “Aai, m bihi, n ni wum ka Yawɛ niriba maa yɛri yi yɛla shɛm luɣ’ shɛlikam maa bi viɛla.

²⁵Ninsal’ yi tum o ninsal’ kpee taali, Yawɛ ni tim di sandaani.” Amaa ninsal’ yi tum Yawɛ taali, ŋuni n-lee ni tooi tim di sandaani? Amaa ka bɛ daa zaɣisi bɛ ba yɛligu maa wumbu, dama Yawɛ daa pun lo ni o ni ku ba.

²⁶ Ka Samuɛl daa kul zoori ka mali zuɣu Yawɛ mini salinim’ sani.

²⁷Ka Naawuni nir’ daa ti ka Ɛli sanna ti yɛl’ o, “Yawɛ yɛliya, ‘Mani n-daa kahigi mmaŋ’ wuh’ a yab’ yiŋnim’ bɛ ni daa nyɛ Ijipti naa daba m-be Ijipti tiŋgbɔŋ ni saha shɛl’ la.

²⁸ Mani n-daa piig’ o Izraɛl zuliya bɔbili ni n-zaŋ o leei m maligumaana ni o zaŋdi binyɛribil’ din yɛri pari zuɣusaa n-lɔr’ o shee ni chani n sara maligu bimbini gbini ti tuɣindi tulaale zim n tooni. Ka Izraɛlnim’ ni daa zaŋ binshɛŋa n-nyo buɣim mali sara ti ma zaa, n daa zaŋ li ti a yab’ yiŋnima.

²⁹Ka di chaŋ wula ka a ti zaŋ pulaani kpɛh’ a kɔbili ni m-bɔr’ ni a fa n ni zali ni bɛ mali sara maligu shɛŋa, ka zaŋ sara maligu pin’ shɛŋa zaa na la? Bɔ n-niŋ ka a ti a bihi jilima gari ma, ka chɛ ka bɛ piiri bɛ suhu ni bɔri shɛlikam n niriba Izraɛlnim’ sara maligu mini wumpaɣibo pina maa ni n-di ŋ-ŋmɛlim lala?

³⁰Dinzuɣu man’ Yawɛ ŋun nyɛ Izraɛlnim’ Naawuni ŋɔ yɛliya: N lo alikauli yɛli ni a min’ a zuliya kul ni nyɛ m maligumaaniba ʒiɛmani kam ni, amaa pumpɔŋɔ, mani n-yɛli ni m bi lan zali lala. Dama bɛn tiri ma jilima, bɛna ka n gba tiri jilima, ka bɛn ʒiɛm ma mi ni nya filiŋ.

³¹Nyama, dabisi’ shɛŋa kanna ka n ni ti mɔŋ a min’ a yab’ yiŋnim’ zaa yaa, ka ninkurigu ti ku be yi daŋ maa ni yaha.

³²A ni ti nya n ni yɛn niŋ alibarika shɛli niŋ Izraɛlnim’ ni, ka di biɛr’ a ka a zabiri ba nyuli; amaa nyin’ daŋ ni so ku lan nya kɔb’ piɛlli o zuɣu ni hal abada.

³³N ni ti yɛn chɛ a yiŋ’ ŋɔ ni do’ so ka o be n sara maligu bimbini ŋɔ gbini nyɛla ŋun ti yɛn nya biɛrim o suhu ni, ka kum hal ka o nina ti fulim, ka niriba ti zaŋ takɔbi ku a yiŋnim’ zaa.

³⁴ Ka binshɛɣu din ti yɛn niŋ a bidibis’ ayi bɛn nyɛ Hofini mini Finɛhas ti yɛn nyɛla shihirili a sani. Bɛ niriba ayi maa zaa ti yɛn kpila dahin yini.

³⁵Ka n ti pii maligumaana so ŋun ni ʒe ma yim ka tumdi n suhu mini n tɛha ni bɔri shɛlikam zaa; biɛhiŋ kani, n ni ti me o yili ti o, ka o ti be n ninvuɣ’ gahindili sani n-tumdi tuma sahakam.

³⁶Ka ŋunkam ti kpalim a yili ŋɔ ni ti chaŋ o sani ti maani bara n-suhir’ o liɣiri bee bɔrɔbɔro kpilli, ka ni ti yɛli, “N suhir’ a, zaŋm’ ma zali maligumaana so zaani din ni chɛ ka n nyari bindirigu dira.”