Read Dagbani 1 Samuɛl 20 Bible Online

1 Samuɛl 20 - Dagbani bible

1 Samuɛl 20

¹Dimbɔŋɔ nyaaŋa ka Dauda daa yi Naiɔt din be Rama tiŋgban’ ni maa n-chaŋ Jɔnatan sani ti bɔh’ o, “Bɔ ka n lee niŋ? N taali nyɛ dini? Ka tuumbiɛ’ bɔ ka n lee dii tum a ba, ka o bɔri ni o ku ma?”

²Ka Jɔnatan yɛl’ o, “Din’ kariya! A ku kpi. Nyama, m ba na ʒi n-niŋ shɛli ka di nyɛla bin’ titali bee bimbila ka bi yɛli ma. Ka bɔ zuɣu ka m ba ni sɔɣi ma dimbɔŋɔ dina? Pa lala n-nyɛ li.”

³Ka Dauda daa garigi yɛl’ o, “A ba mi ni a yuri ma, ka tɛhi ni di bi simdi ni a baŋ di yɛla, dama a yi baŋ di yɛla, di ni saɣim’ a suhu pam. Amaa yɛlimaŋli, hal ka Yawɛ ŋun be ŋɔ zuɣu ni nyin’ ŋumbɔŋɔ gba zuɣu, m mini kum kul chɛla tab’ kpe ni kpe.”

⁴Di saha ka Jɔnatan daa yɛli Dauda, “A ni bɔri ni n niŋ shɛlikam zaa, n ni niŋ li ti a.”

⁵ Ka Dauda daa yɛli Jɔnatan, “Nyama, biɛɣuni sa nyɛla goli palli dabisili, ka di simdi ni m mini naa sa laɣim ʒini di bindirigu; amaa chɛ ka n chaŋ ti sɔɣi mɔɣu ni hal ti paai daba ata dali zaawuni.

⁶Ka a ba yi ti bɔri ma ka bi nya ma, nyin’ yɛlim’ o, ‘Dauda suhi ma la soli ni o chaŋ o ya Bɛtilihɛm, dama o yiŋnim’ zaa yɛn malila yuuniyuuni sara.’

⁷O yi yɛli, ‘Di viɛla,’ binshɛli ku lan niŋ mani ŋun nyɛ a dabili ŋɔ; o mi suhu yi yiɣisi, dindina nyin’ baŋmi ni o lo zaɣ’ biɛɣu.

⁸Dinzuɣu niŋmi mani ŋun nyɛ a dabili ŋɔ nirilim ŋɔ, dama a chɛ ka m min’ a lo tab’ alikauli suŋ. Amaa n yi mali taali, amaŋmaŋ’ nyin’ kum’ ma, dama bɔ zuɣu ka a lan yɛn zaŋ ma chaŋ a ba sani yaha?”

⁹Ka Jɔnatan daa yɛl’ o, “Din’ kariya, n yi di mi ni m ba lo a zaɣ’ biɛɣu n naan ku yɛl’ a?”

¹⁰Di saha ka Dauda daa lan yɛli Jɔnatan, “Ka a ba suhu yi ti yiɣisi bah’ a zuɣu, ŋuni n-lee yɛn yɛli ma?”

¹¹Ka Jɔnatan yɛli Dauda, “Kamina ka ti chaŋ mɔɣu ni.” Ka bɛ niriba ayi maa daa yi n-chaŋ mɔɣu ni.

¹²Ka Jɔnatan daa ti yɛli Dauda, “Yawɛ ŋun nyɛ Izraɛlnim’ Naawuni ŋɔ di ti shɛhira, biɛɣuni ŋ-ŋɔ tasaha bee dali, n yi daa bɔhi m ba ka o bi lan lo ni o niŋ nyin’ Dauda zaɣ’ biɛɣu, n ku tim na ti yɛl’ a?

¹³Amaa o suhu yi na kul yumi ni o niŋ a zaɣ’ biɛɣu, ka m bi kana ti yɛl’ a ka a zo n-tiligi ni alaafee, Yawɛ ŋun niŋmi mani Jɔnatan zaɣ’ biɛɣu n-gari m ba ni yɛn niŋ’ a shɛm maa, Yawɛ ni be a sani kaman o ni be m ba sani shɛm la.

¹⁴Ka n yi ti na be n nyɛvili ni, nyin’ kul gbibi Yawɛ yurilim ŋɔ ni mani, ka ʒe ma yim din ni chɛ ka n ku kpi.

¹⁵ Di yih’ a ʒiɛyimtali maa n daŋ ni. Ka Yawɛ yi ti kpihim nyin’ Dauda dimnim’ zaa birili dunia ŋɔ ni,

¹⁶ŋun’ di kpihim man’ Jɔnatan yuli nyin’ Dauda daŋ ni. Yawɛ bɔhimi nyin’ Dauda dimnim’ biɛri ti a.”

¹⁷Ka Jɔnatan daa chɛ ka Dauda lan lo o yurilim alikauli yaha, dama o daa yur’ o mi kaman omaŋmaŋ’ la.

¹⁸Di saha ka Jɔnatan daa yɛl’ o, “Biɛɣuni sa nyɛla gol’ palli dabisili, ka bɛ sa ni bɔ a kɔŋ, dama a sa ku ʒi a ʒiishee.

¹⁹Dali gba bɛ daa ni bɔ a pam kɔŋ, dinzuɣu cham’ yɛla ŋɔ ni daa yiɣisina ka a sɔɣi luɣ’ shɛl’ la nti ŋuni kuɣa din duhiya la lɔŋni.

²⁰Ka n ni ti ka nimaani na nti to piɛma ata kaman n zahimla binshɛli ka tɔr’ la.

²¹Nyama, n ni ti tim bi’ so ka yɛl’ o, ‘Cham’ ti bo piɛma maa shee.’ N yi ti yɛl’ o, ‘Nyama, piɛma maa be a luɣili ŋɔ polo, kpuɣimi li na,’ di saha nyin’ yim’ na, dama hal ka Yawɛ ŋun be ŋɔ zuɣu binshɛli ku lan niŋ a, ka barina shɛli mi lan kani.

²²Amaa n yi ti yɛli bia maa, ‘Nyama, piɛma maa be a tooni ha;’ dindina nyin’ zoma, dama Yawɛ n-wuh’ a ni a zom’ maa.

²³Ka di yi nyɛla m min’ a ni daa tɔɣisi yɛtɔɣ’ shɛl’ la dina, Yawɛ ni be m min’ a sunsuuni sahakam.”

²⁴Ka Dauda daa sɔɣi mɔɣu maa ni. Ka gol’ palli dali maa daa ti paai, ka naa ʒini ni o di bindirigu.

²⁵Naa daa ʒinila o ʒiishee din tab’ dukpini kaman o ni daa yi pun niŋdi shɛm, ka Jɔnatan ʒiɛya, ka Abinɛr mi ʒini baɣili Sool, amaa ka Dauda ŋun’ ʒiishee daa nyɛ zaɣ’ kuŋ.

²⁶Sool daa bi yɛli shɛli dindali maa, dama o daa tɛhimi, “Binshɛli n-niŋ o ka o bi be kasi, biɛhiŋ kani, o shiri bi bela kasi.”

²⁷N-daa lan yi biɛɣu dabisi’ shɛli din pahir’ ayi goli palli dabisili maa nyaaŋa, ka Dauda ʒiishee maa na kul nyɛla zaɣ’ kuŋ. Di saha ka Sool daa bɔh’ o dapala Jɔnatan, “Bɔ n-niŋ ka Jɛsi dapala ŋɔ bi kana bindirigu dibu shee ŋɔ sɔhila bee zuŋɔ?”

²⁸Ka Jɔnatan yɛli Sool, “Dauda suhi ma la soli ni o chaŋ Bɛtilihɛm.

²⁹O yɛli ma mi, ‘Chɛ ka n chaŋ Bɛtilihɛm, dama n yiŋnim’ yɛn malila sara ti ya, ka m biɛli yɛli ni n kana. Dinzuɣu pumpɔŋɔ a yi baŋ ni a nini tiɣi ma, nyin’ chɛ ka n chaŋ ti nya m biɛyanim’ maa.’ Lala zuɣu ka o bi ka nyin’ naa bindirigu ŋɔ dibu shee na maa.”

³⁰Di saha ka Sool suhu daa yiɣisi pam bahi Jɔnatan zuɣu, ka o yɛl’ o, “Nyin’ ŋun nyɛ paɣ’ yoli ŋun bi zani tuhi bia ŋɔ. A tɛhi’ ni m bi mi ni a zaŋ Jɛsi dapala maa kpɛh’ a kɔbili ni ni a dihila amaŋ’ vi, ka lan dih’ a ma gba vi?

³¹Jɛsi dapala maa ŋun dee yi be o nyɛvili ni, nyini bee a nam kul ku nya zaashee zani. Dinzuɣu timmi ka bɛ ti zaŋ’ o na, dama di kpala talahi ni o kpi.”

³²Di saha ka Jɔnatan daa bɔh’ o ba Sool, “Bɔ zuɣu ka a yɛn ku o? Bɔ ka o lee niŋ?”

³³Amaa ka Sool daa zaŋ kpani to o ni o ku o; di saha ka Jɔnatan daa baŋ ni o ba shiri loya ni o ku Dauda.

³⁴Ka Jɔnatan daa vaai yiɣisi bindirigu maa dibu shee ni suhuyiɣisili pam, ka daa bi di bindirigu goli palli daba ayi dali maa, dama Dauda yɛla daa muɣis’ o pam ni o ba ni daa dih’ o vi shɛm maa zuɣu.

³⁵N-daa yi biɛɣ’ asiba ka Jɔnatan zaŋ bia pa omaŋ’ zuɣu chaŋ mɔɣu ni kaman o mini Dauda ni daa pun tɔɣisi shɛm la.

³⁶Ka o daa ti yɛl’ o bia maa, “Zom’ chaŋ ti pihi n ni yɛn to peen’ shɛŋa ŋɔ na.” Bia maa ni daa zɔri chani maa, ka o to piɛm bah’ o tooni ha.

³⁷Bia maa ni daa ti paai Jɔnatan ni to piɛm maa bahi luɣ’ shɛli maa, ka Jɔnatan bol’ o n-yɛl’ o, “Pa piɛm maa m-be a tooni maa ha?”

³⁸O daa lan yɛli bia maa yaha, “Kpaŋmina, niŋmi yomyom, di lan ʒiɛya.” Di saha ka Jɔnatan bia maa daa pih’ o piɛma maa n-zaŋ ka o sanna.

³⁹Amaa bia maa ŋun daa bi mi di ni nyɛ shɛm, kulla Jɔnatan mini Dauda n-daa mi di ni nyɛ shɛm.

⁴⁰Di saha ka Jɔnatan daa zaŋ o bidibbina maa ti o bia maa ka yɛl’ o, “Zaŋmi li kuli yiŋa.”

⁴¹Bia maa ni daa kul ŋmaligi naai, di daa bi yuui ka Dauda yi kuɣa maa lɔŋni na nti lu n-gbani n-zaŋ o nini kpa tiŋa, ka silim o zuɣu buta; ka bɛ va m-bibigi taba, ka kum niŋ taba. Dauda n-daa kum pam gari Jɔnatan.

⁴²Di saha ka Jɔnatan daa yɛli Dauda, “Cham’ ni suhudoo, man’ dee min’ a ni daa pun lo tab’ alikauli Yawɛ yuli ni, ka yɛli ni Yawɛ be ti sani, ka ni ti lan be ti bihi gba sani sahakam ŋɔ saɣiya.” Ka Dauda daa yiɣisi chaŋ, ka Jɔnatan mi lab’ kuli.