Read Dagbani 1 Samuɛl 23 Bible Online

1 Samuɛl 23 - Dagbani bible

1 Samuɛl 23

¹Dahin shɛli ka bɛ daa ti yɛli Dauda, “Nyama, Filistianim’ tuhirila Kɛilanima, ka fari bɛ bindira bɛ puri ni.”

²Di saha ka Dauda daa bɔhi Yawɛ, “N cham’ ti liri Filistianim’ maa?” Ka Yawɛ daa yɛli Dauda, “Cham’ ti liri ba n-tiligi Kɛilanim’ maa.”

³Amaa ka Dauda niriba maa daa bɔh’ o, “Nyama, ti na be Juda tiŋgbani ŋɔ ni ŋɔ ka dabiɛm mali ti mi, ka ti yi ti chaŋ Kɛila ni ti ti tuhi Filistia tɔbbihi ŋɔ, wula ka di lee yɛn be?”

⁴Ka Dauda daa lan bɔhi Yawɛ yaha. Ka Yawɛ daa garigi yɛl’ o, “Yiɣisima, cham’ Kɛila, dama n zaŋ Filistianim’ maa niŋ a nuu ni.”

⁵Ka Dauda min’ o niriba maa daa chaŋ Kɛila nti tuhi Filistianim’ maa n-ku ba pam, ka fa bɛ niɣi. Lala ka Dauda daa niŋ fa Kɛilanim’ maa bahi.

⁶Abiata ŋun nyɛ Ahimɛlɛk bia la ni daa yɛn zo n-chaŋ Dauda sani Kɛila maa, o daa zaŋla tan’ shɛli din ŋmani mukuru la mali chaŋ.

⁷Ka bɛ daa ti yɛli Sool ni Dauda be Kɛila, ka Sool yɛli, “Naawuni zaŋ o niŋ n nuu ni, dama o kpari omaŋa n-niŋ tin’ shɛli din dunoya mali pundi mini kur’ wɔɣila din kpariti dunoya.”

⁸Di saha ka Sool daa laɣim o niriba zaa na nti lo tɔbu ni bɛ chaŋ Kɛila ti teei gili Dauda min’ o niriba maa niŋ di ni.

⁹Ka Dauda daa baŋ ni Sool lo o la zaɣ’ biɛɣu niŋbu, ka daa yɛli Abiata ŋun nyɛ maligumaana maa, “Zaŋmi tan’ la na.”

¹⁰Di saha ka Dauda daa yɛli, “Yawɛ ŋun nyɛ Izraɛlnim’ Naawuni ŋɔ, man’ ŋun nyɛ a dabili ŋɔ wumya ni Sool ni ka Kɛila ŋɔ na nti wurim li n zuɣu.

¹¹O yi kana, Kɛilanim’ ni gbaai ma ti o? O shiri nyɛla ŋun ni kana kaman mani ŋun nyɛ a dabili ŋɔ ni wum shɛm maa? Yawɛ ŋun nyɛ Izraɛlnim’ Naawuni ŋɔ, n suhir’ a, yɛlim’ mani ŋun nyɛ a dabili ŋɔ.” Ka Yawɛ garigi yɛl’ o, “O ni kana.”

¹²Ka Dauda daa lan yɛli, “Ka daɣila Kɛilanim’ ŋɔ ni zaŋ m mini n niriba ŋɔ niŋ ŋun Sool nuu ni?” Ka Yawɛ daa yɛli, “Bɛ shiri ni zaŋ ya niŋ o nuu ni.”

¹³Di saha ka Dauda min’ o niriba bɛn daa nyɛ ninvuɣ’ kɔbisiyɔbu laasabu daa yi Kɛila maa zo n-chaŋ luɣ’ shɛli bɛ ni daa naan tooi chaŋ. Ka Sool daa wum ni Dauda yi Kɛila maa zo, ka o chɛ o naba karibu.

¹⁴Ka Dauda daa chaŋ ti kpalim be mɔɣu ni sɔɣisili shee din be Zif mɔɣu ni zoya tiŋgbɔŋ la ni. Ka Sool daa kul lihiri bɔr’ o dabisili kam, amaa ka Naawuni daa bi zaŋ o niŋ o nuu ni.

¹⁵Dauda daa bela Zif mɔɣu ni Hɔrɛshi maa. Di saha ka o daa wum ni Sool kana ni o ti ku o.

¹⁶Ka Sool bia Jɔnatan daa yiɣisi chaŋ Dauda sani Hɔrɛshi maa nti zaŋ Naawuni yuli kpaŋs’ o suhu.

¹⁷O daa lan yɛl’ o, “Di zɔri dabiɛm, m ba Sool nuu ku shih’ a. Nyini nti yɛn nyɛ Izraɛlnim’ zaa naa, ka m mi nyɛ wulana. M ba Sool gba mi lala.”

¹⁸ Ka bɛ niriba ayi maa daa lan lo tab’ alikauli Yawɛ tooni, ka Jɔnatan daa kuli, ka Dauda mi kpalim be Hɔrɛshi.

¹⁹Di saha ka Zifinim’ daa chaŋ Sool sani Gibia ti yɛl’ o, “Dauda sɔɣi bela ti ya Hɔrɛshi sɔɣisili shee din be Hachila zo’ shɛli din labiri Jɛshimɔn nudirigu polo la zuɣu.

²⁰Dinzuɣu naa, kamina pumpɔŋɔ kaman a suhu ni yu dahin’ shɛli, di nyɛla ti talahi tuma ni ti gbaag’ o ti a.”

²¹Ka Sool daa yɛli ba, “Yawɛ niŋmi alibarika niŋ yi ni; dama yi puu biɛri n zuɣu.

²²Chamiya ti maan lihi viɛnyɛliŋga n-nya o shiri beni, ka baŋ o ni be luɣ’ shɛli maa, ka lan baŋ ninvuɣ’ so ŋun nya o nimaani maa, dama bɛ yɛli ma ni o neeya pam.

²³Dinzuɣu bomiya nya o ni sɔɣiri luɣ’ shɛŋa zaa ka labina ti yɛli ma yɛlimaŋli, ka m mini ya chaŋ; ŋun dee yi be tiŋgbani maa ni, n ni bɔ o shee Judanim’ zaa niriba tusatusa puuni.”

²⁴Ka niriba maa daa yiɣisi daŋ Sool tooni chaŋ Zif. Di saha Dauda min’ o niriba daa bela Maɔn yɔɣu ni luɣ’ shɛli din yuli booni Araba, ka di be Jɛshimɔn nudirigu polo la.

²⁵Ka Sool min’ o niriba daa chaŋ ni bɛ ti bɔ Dauda shee. Ka bɛ daa yɛli Dauda, ka o zo n-chaŋ tampima zo’ shɛli din daa be Maɔn yɔɣu ni la zuɣu. Ka Sool daa wum lala ka kari Dauda naba Maɔn yɔɣu maa ni.

²⁶Sool daa bela zoli maa yaɣi yini polo, ka Dauda min’ o niriba mi be yaɣi din’ la polo, ka Dauda daa kpaŋ zɔri yomyom ni o yi Sool nuu ni saha shɛli Sool ni daa ti chɛ ŋun’ Dauda min’ o niriba maa kpe ni kpe ni o gbahi ba la.

²⁷Di saha ka tumo daa kana ti yɛli Sool, “Kulimina yomyom, dama Filistianim’ kana ti liri ti.”

²⁸Ka Sool daa chɛ Dauda kari doli ka lab’ kuli ni o ti tuhi Filistianim’ maa. Dinzuɣu ka bɛ daa boli nimaani zo n-tiligi tampiŋ.

²⁹Di nyaaŋa ka Dauda daa yi nimaani n-chaŋ ti be Ɛngɛdi sɔɣisili shee.