Read Dagbani 1 Samuɛl 3 Bible Online

1 Samuɛl 3 - Dagbani bible

1 Samuɛl 3

¹Saha shɛli Samuɛl ni daa be Ɛli sani n-tumdi Yawɛ tuma maa, Yawɛ daa bi lan tɔɣisiri yɛtɔɣa waawaayili, ka niriba daa bi lan nyari ʒiinim’ waawaayili.

²Di saha Ɛli nina daa bi lan ne viɛnyɛliŋga, ka o bi tooi nyara; dahin’ shɛli yuŋ ka o daa ti do o dooshee;

³ka Samuɛl mi daa do Yawɛ jɛmbu duu maa ni luɣ’ shɛli Naawuni Daalikauli Adaka ni daa be la, ka bɛ daa na bi kpihi Naawuni firila.

⁴Di saha ka Yawɛ daa boli, “Samuɛl! Samuɛl!” Ka Samuɛl saɣi, “N-nyɛ ma.”

⁵Ka yiɣisi guui chaŋ Ɛli sani ti yɛl’ o, “A ni boli ma la, n-nyɛ ma.” Amaa ka Ɛli garigi yɛl’ o, “M bi bol’ a, labimi ti dɔni.” Ka o daa labi ti dɔni.

⁶Ka Yawɛ daa lan bol’ o yaha, “Samuɛl!” Ka Samuɛl daa lan yiɣisi chaŋ Ɛli sani ti yɛl’ o, “A ni boli ma la, n-nyɛ ma.” Amaa ka o yɛl’ o, “M bia, m bi bol’ a, labimi ti dɔni.”

⁷Di saha Samuɛl daa na bi mi Yawɛ ka Yawɛ mi daa na ʒi n-kahig’ o yɛligu wuh’ o

⁸Ka Yawɛ daa lan boli Samuɛl yaha m-pahi buta, ka o lan yiɣisi chaŋ Ɛli sani ti yɛl’ o, “A ni boli ma la, n-nyɛ ma.” Di saha ka Ɛli daa baŋ ni Yawɛ m-booni bia maa,

⁹Dinzuɣu ka Ɛli daa yɛli Samuɛl, “Cham’ ti dɔni, o yi ti lan bol’ a, nyin’ yɛlima, ‘Yawɛ, yɛlima, a dabili wumda.’ ” Di saha ka Samuɛl daa lan lab’ ti dɔni o dooshee maa.

¹⁰Ka Yawɛ daa lan kana ti zani nimaani m-boon’ o kaman o ni di pun boon’ o shɛm la, “Samuɛl! Samuɛl!” Ka Samuɛl daa garigi yɛli, “Yɛlima, a dabili wumda.”

¹¹Di saha ka Yawɛ daa yɛli Samuɛl, “Nyama, n yɛn tumla tuun’ shɛli Izraɛl tiŋgbɔŋ ni, ka ŋunkam ti wum li tiba puuni ni chahira.

¹²Dindali maa n ni daa yɛli yɛtɔɣ’ shɛli zaŋ chaŋ Ɛli min’ o yiŋnim’ polo la ni ti niŋ pali, di piligu ni hal ni di bahigu ni.

¹³M pun yɛl’ o ni n ni darig’ o yiŋnim’ tibili hal ni saha din ka bahigu, tuumbiɛ’ shɛli yɛla o ni pun mila zuɣu, dama o bihi mɔri man’ Naawuni ka o bi yihi ba di ni.

¹⁴Dinzuɣu m po pɔri yɛli Ɛli min’ o yiŋnima ni sara maligu bee wumpaɣibo pini lan kani din ni tooi nyahi bɛ tuumbiɛri maa hal abada.”

¹⁵Ka Samuɛl daa doya hal ka biɛɣu ti neei, ka o yiɣisi yooi Yawɛ jɛmbu duu maa dunoya, ka zɔr’ dabiɛm ni o yɛli Ɛli o ni nya ʒii shɛli maa yɛla.

¹⁶Amaa ka Ɛli daa bol’ o, “M bia Samuɛl.” Ka Samuɛl saɣi, “N-nyɛ ma.”

¹⁷Ka Ɛli bɔh’ o, “Wula ka o sa lee yɛl’ a? Di sɔɣ’ ma shɛli, a yi sɔɣ’ ma yɛtɔɣ’ shɛli o ni yɛl’ a shɛlikam maa zaa puuni, Naawuni ŋun’ zaŋm’ o ni di yɛn niŋ ma shɛm maa niŋ a, hal ŋun’ niŋm’ a gari lala gba.”

¹⁸Ka Samuɛl daa yɛl’ o binshɛɣukam, ka bi sɔɣ’ o shɛli. Ka Ɛli garigi yɛli, “Ŋuna n-nyɛ Yawɛ, o niŋm’ o ni nya ka shɛli viɛl’ o sani.”

¹⁹Ka Samuɛl daa mali hal ti zooi, ka Yawɛ be o sani, ka chɛ ka o yɛtɔɣa zaa nyɛ yɛlimaŋli.

²⁰Ka Izraɛl tiŋgbɔŋ maa ni luɣilikam, Dan zaŋ ti kpa Bɛrishiiba polo nim’ zaa daa baŋ ni Samuɛl nyɛla Yawɛ daanabi maŋli.

²¹Ka Yawɛ daa ti lan yi Samuɛl zuɣu Shilo, dama Yawɛ daa kahig’ omaŋa wuhi Samuɛl Shilo ŋun’ Yawɛ yɛligu ni. Ka Izraɛlnim’ zaa daa gbilisiri tibili wumdi Samuɛl yɛligu.