Read Dagbani 1 Samuɛl 30 Bible Online

1 Samuɛl 30 - Dagbani bible

1 Samuɛl 30

¹Ka Dauda min’ o niriba maa daa ti paai Zikilag daba ata dali n-nya ka Amalɛknim’ kamina ti liri Nɛgɛbinim’ mini Zikilagnima n-nyaŋ Zikilagnim’ maa, ka nyo tiŋ’ maa buɣim.

²Bɛ daa gbahi paɣiba mini bɛnkam daa be nimaani n-nyɛ bihi ni ninkura zaa. Bɛ daa bi ku so, amaa bɛ daa kul gbahi ba mi n-zaŋ ba chaŋ bɛ chandi.

³Ka Dauda min’ o niriba maa daa ti paai tiŋ’ maa ni n-nya ka bɛ nyo li la buɣim, ka gbahi bɛ paɣiba mini bɛ bidibisi ni bipuɣinsi zaa chaŋ.

⁴Di saha ka Dauda mini ninvuɣ’ shɛb’ bɛn daa be o sani maa duhi bɛ yɛhi n-kum hal ti lan ka yaa din ni kum.

⁵ Bɛ daa gbahi Dauda paɣiba ayi la gba chaŋ; Ahinɔam ŋun daa yi Jɛziriil na la mini Abigeel Nabal pakoli ŋun daa yi Kamɛl na la.

⁶Ka Dauda suhu daa saɣim pam, dama o niriba maa suhuri daa yiɣisimi, ka bɛ yɛli ni bɛ ni lab’ o kuɣa. Dama sokam daa kul fabindila o bidibisi min’ o bipuɣinsi zuɣu. Amaa ka Yawɛ ŋun nyɛ Dauda Naawuni ŋɔ daa kpaŋs’ o suhu.

⁷ Ka Dauda daa yɛli Ahimɛlɛk bia Abiata ŋun daa nyɛ maligumaana la, “Zaŋmi tan’ shɛli din ŋmani mukuru la ti ma na.” Ka Abiata daa zaŋ tan’ shɛli din ŋmani mukuru maa na ti ti Dauda.

⁸Ka Dauda daa bɔhi Yawɛ, “M biɛhimi ŋmɛnditoya ŋɔ naba? N ni paai ba?” Ka o garigi yɛl’ o, “Biɛhimi bɛ naba, a ni paa’ ba n-fa a niriba maa.”

⁹Di saha ka Dauda mini ninvuɣ’ kɔbisiyɔbu bɛn daa be o sani maa daa yiɣisi n-chaŋ ti paai Bɛso kulibɔŋ ni, ka bɛn daa be nyaaŋa la kpalim nimaani.

¹⁰Amaa ka Dauda mini niriba kɔbisinahi daa kul be niriba maa naba biɛhibu ni. Ka niriba kɔbisiyi la bɛn’ daa gbarigi pam, ka kɔŋ Bɛso kulibɔŋ maa dubu.

¹¹Ka Dauda niriba maa daa ti nya Ijipti nachimbil’ so mɔɣu maa ni n-zaŋ o ka Dauda sanna nti ti o bɔrɔbɔro ka o ŋubi, ka ti o kom ka o nyu.

¹²Ka bɛ daa lan ti o bɛ ni zaŋ fiig tihi wala m-pahi mali mahi’ shɛŋa mini wain wal’ kuma yila ayi. O ni daa di n-naai ka o nini neei, dama o daa bi di shɛli bee n-nyu kom wuntaŋ’ ni mini yuŋ dabisi’ muna ata.

¹³Ka Dauda daa bɔh’ o, “Tiŋ’ kani ka a lee yina? Ŋuni n-lee su a?” Ka o garigi yɛli, “N nyɛla Ijipti nachimbila, ka nyɛ ŋun tumdi Amalɛk do’ so tuma. N daa kala alaafee, ka ŋun su ma maa chɛ ma bahi ka chaŋ, di zuŋɔ daba ata m-bɔŋɔ.

¹⁴Ti daa chaŋmi ti ŋme Nɛgɛb din nyɛ Chɛrɛtinim’ tiŋ’ ka be Juda tiŋgban’ ni la, ka di bɛ nɛma. Ka ti daa lan chaŋ ti ŋme Nɛgɛb shɛli din nyɛ Kalɛb daŋ niriba tiŋ’ la gba ka di bɛ nɛma; ka nyo Zikilag yiya zaa buɣim.”

¹⁵Ka Dauda daa bɔh’ o, “A ni saɣi tahi ma ŋmɛnditoya maa sani?” Ka o garigi yɛli Dauda, “Pom’ Naawuni ni a ku ku ma bee n-zaŋ ma niŋ n dan’ maa nuu ni pɔi, ka n naanyi zaŋ a tahi bɛ sani.”

¹⁶O ni daa zaŋ o tahi bɛ sani, ŋmɛnditoya maa daa woliwolila taba ʒiya diri ka nyura, ka wari wahi, bɛ ni ŋme n-di neen’ shɛŋa Filistia mini Juda tiŋgbana ni maa zuɣu.

¹⁷Ka Dauda daa daŋ yibu asibaasi n-liri ba n-tuhi ba hal ni zaawuni, ka do’ so daa bi zo n-tiligi naɣila nachimba kɔbisinahi n-daa ba laakumnim’ zo n-tiligi.

¹⁸Ka Dauda daa lan fa Amalɛknim’ maa ni daa ŋme n-di binshɛŋa maa zaa, ka lan fa o paɣiba ayi la gba.

¹⁹Dauda daa bi chɛ ka binshɛli kpalim nimaani. Neem’ bihi bee neen’ kara bee bidibisi bee bipuɣinsi ni bɛ ni daa tuhi di neen’ shɛŋa la mini Amalɛknim’ maa ni daa kpuɣi bɛ neen’ shɛŋa zaa, Dauda daa zaŋ di zaa lab’ kuli.

²⁰Dauda daa lan tuhi fa piɛri mini niɣi, ka o niriba maa daa taɣiri niɣi maa be tooni ka yɛra, “Dauda ni tuhi fa neen’ shɛŋa m-bɔŋɔ.”

²¹Ka Dauda daa labina ti paai ninvuɣ’ kɔbisiyi shɛb’ bɛn daa gbarigi ka kɔŋ o doli chaŋ, ka o daa chɛ ba bahi Bɛso kulibɔŋ ni la sani, ka bɛ daa yina ni bɛ ti tuhi Dauda min’ o niriba bɛn daa be o sani maa soli; ka Dauda daa kana ti miri niriba maa m-puhi ba.

²²Amaa ka putɔɣulaannim’ mini ninvuɣ’ yoya bɛn daa pahi doli Dauda chaŋ maa yɛli, “Ti bi yɛn ti ba ti ni tuhi fa neen’ shɛŋa ŋɔ shɛli, naɣila bɛ paɣiba mini bɛ bihi ka ti ni zaŋ ti ba ka bɛ chaŋ, dama bɛ daa bi dol’ ti chaŋ.”

²³Amaa ka Dauda daa yɛli, “M mabihi, di bi simdi ni yi niŋ Yawɛ ni ti ti binshɛŋa maa lala, dama ŋuna n-daa gul’ ti ka zaŋ ŋmɛnditoya bɛn daa kana ti liri ti maa niŋ ti nuu ni.

²⁴Ŋuni n-lee ni saɣi yi ni yɛli shɛm maa yɛlli ŋɔ puuni? Ŋun chaŋ tɔb’ maa tuhibu shee tarili ni nyɛ shɛm, ŋun ʒiya guli nɛma gba tarili yɛn nyɛla lala. Bɛ zaa tarili yɛn nyɛla yim.”

²⁵Ka Dauda daa zaŋ li lee kali ni zaligu Izraɛlnim’ zaa sani, ka bɛ dol’ li hal ni zuŋɔ.

²⁶Dauda ni daa labi Zikilag, o daa piila o ni tuhi di neen’ shɛŋa maa shɛli nti ti o zɔnim’ bɛn daa nyɛ Juda kpamba la ka yɛli ba, “N ni tuhi Yawɛ dimnim’ ka di neen’ shɛŋa ka m pii tin ya na maa.”

²⁷O daa tila Bɛtɛlnim’ mini Ramɔt din be Nɛgɛb Jatir tiŋgban’ ni la nima

²⁸ni bɛn be Aroa mini bɛn be Sifimɔt ni bɛn be Ɛshitɛmɔa

²⁹ni Rakalnima ni Jɛramiilnim’ tinsi ni Kɛnnim’ tinsi

³⁰ni Hɔrimanim’ ni Bɔrashannima ni Ataknima

³¹ni Hiburɔnnima ni ŋun Dauda min’ o niriba maa ni daa gɔri chani tiŋ’ shɛŋa zaa la nima.