Read Dagbani 1 Samuɛl 6 Bible Online

1 Samuɛl 6 - Dagbani bible

1 Samuɛl 6

¹Yawɛ Daalikauli Adaka maa daa be Filistianim’ tiŋgbɔŋ ni la chira ayopɔin.

²Ka Filistianim’ daa ti tim boli tindaannim’ mini laasabuniŋdiba na ti bɔhi ba, “Wula ka ti lee yɛn niŋ Izraɛlnim’ Yawɛ Daalikauli Adaka ŋɔ? Ka ti yi yɛn zaŋ li labisi di biɛhigu shee, bɔ ka ti lee yɛn zaŋ pahi di zuɣu labisi?”

³Ka bɛ daa yɛli ba, “Yi yi yɛn zaŋ Izraɛlnim’ Naawuni Daalikauli Adaka maa labisi, yin’ di zaŋya di kɔŋko labisi, amaa yin’ zaŋmiya alahichi sanyoo pini m-pahi di zuɣu din ni chɛ ka yi nya faako ka baŋ o ni darigiri yi tibili daliri shɛli zuɣu maa.”

⁴Ka bɛ daa bɔhi, “Bɔ n-lee nyɛ alahichi sanyoo pini ka ti yɛn zaŋ pahi ti ti o?” Ka bɛ daa yɛli ba, “Salima alɔbo diba anu mini salima jɛŋgbaris’ anu kaman yi tiŋgbɔŋ ŋɔ ni nanim’ kalinli ni nyɛ shɛm. Dama alɔbo yini maa n-daa lu yi mini yi nanim’ maa zaa zuɣu.

⁵Di simdi ka yi niŋ alɔbo shɛŋa mini jɛŋgbar’ shɛb’ bɛn bahi yi tiŋgbani ŋɔ yoli maa kɔtomsi, ka di lan simdi ni yi ti Izraɛlnim’ Naawuni maa jilima, di pa shɛli o ku lan darigi yi mini yi buɣa ni yi tiŋgbɔŋ ŋɔ tibili yaha.

⁶Bɔzuɣu ka yi yɛn niŋ tipawumli kaman Ijiptinim’ mini Firawuna ni daa niŋ tipawumli shɛm la? O ni daa chɛ ka bɛ tum jɛrilim la nyaaŋa, pa bɛmaŋmaŋa n-daa ti chɛ ka niriba maa chaŋ?

⁷Dinzuɣu pumpɔŋɔ malimiya tɔroko palli, ka bo niɣ’ ayi bɛn bihi na mɔɣira, ka nyɛ bɛ ni ʒi n-zaŋ dapuhi ga shɛba nti zaŋ tɔroko maa ga ba, amaa ka taɣiya bɛ bihi kuli yiŋ’ ka chɛ ba.

⁸Ka zaŋya Yawɛ Daalikauli Adaka maa niŋ tɔroko maa ni, ka zaŋ salima binyara din nyɛ yi daalahichi sanyoo pini la zali baɣili di luɣili ni n-daai li bahi n-chɛ ka di chaŋ di ni bɔri shɛli polo.

⁹Ka yi yuuni li n-nya di ni yɛn kpa shɛli polo. Di yi kpala dimaŋmaŋ’ ya Bɛtishɛmɛshi polo, yin’ baŋmiya ni ŋuna n-tum ti barina titaŋa ŋɔ zaa, amaa di yi bi kpa ni polo, ti lan baŋ ni o nuu ka ti daalɔbo maa ni, amaa di kul nyɛla din lu ti zuɣu dimaŋmaŋa.”

¹⁰Ka niriba maa daa niŋ lala, ka daa bo niɣ’ ayi bɛn bihi na mɔɣiri na nti zaŋ tɔroko maa ga ba, ka zaŋ naɣibihi maa niŋ duu n-yo ba niŋ di ni.

¹¹Ka bɛ daa zaŋ Yawɛ Daalikauli Adaka maa niŋ di puuni, ka zaŋ salima jɛŋgbaris’ adaka mini alɔbo kɔtomsi la niŋ di ni.

¹²Ka niɣi maa daa dii zaŋ li lu solɔɣu n-kpa Bɛtishɛmɛshi polo, bɛ daa bi birigi kpa nudirigu polo bee nuzaa polo, bɛ daa kul chanimi ka kuhira. Ka Filistia nanim’ daa dol’ ba hal ni Bɛtishɛmɛshi tintariga.

¹³Di saha Bɛtishɛmɛshinim’ daa bela vinvamli ni n-chɛri alikama, bɛ ni daa ti kpuɣi bɛ zuɣuri lihi nya Naawuni Daalikauli Adaka maa ka di niŋ ba suhupiɛlli.

¹⁴Ka tɔroko maa daa chaŋ ti kpalim zani Bɛtishɛmɛshi maa do’ so ŋun yuli daa booni Jɔshua la puu ni. Kuɣ’ titali daa do nimaani, ka bɛ daa wɔri tɔroko maa dari n-kɔri niɣi maa pa di zuɣu n-nyo buɣim m-mali sara ti Yawɛ.

¹⁵Ka Lɛvinim’ daa kpuɣi Yawɛ Daalikauli Adaka maa mini adaka shɛli din daa pahi di zuɣu ka salima binyara be di ni la n-zaŋ li ti tam kuɣ’ titali maa zuɣu, ka Bɛtishɛmɛshinim’ zaŋ binyara nyo buɣim m-mali sara. Ka daa lan mali sara maligu shɛŋa ti Yawɛ dindali maa.

¹⁶Ka Filistia nanim’ anu maa ni daa nya lala maa, ka bɛ lab’ kul Ɛkurɔn dindali maa.

¹⁷Filistianim’ ni daa zaŋ bintɔra kɔtomsi salima din nyɛ alahichi sanyoo pini m-pahi ti ti Yawɛ la zaɣ’ yini daa nyɛla Ashidɔdnim’ dini, ka yini nyɛ Gazanim’ dini, ka yini nyɛ Ashikɛlɔnnim’ dini, ka yini nyɛ Gaatinim’ dini, ka yini mi nyɛ Ɛkurɔn nim’ dini.

¹⁸Lala n-daa nyɛ salima jɛŋgbarisi la gba kaman Filistia nanim’ maa ni daa su fɔntiŋ’ kar’ shɛŋa bɛ ni daa me goondahi gili kalinli ni daa nyɛ shɛm zaŋ tabili tiŋkpansi din daa ka goma. Bɛ ni daa zaŋ Yawɛ Daalikauli Adaka maa tam kuɣ’ tital’ shɛli zuɣu maa na kul beni hal ni zuŋɔ n-nyɛ din daa niŋ Bɛtishɛmɛshi Jɔshua puu ni la shɛhira.

¹⁹Ka Bɛtishɛmɛshi ninvuɣ’ shɛba daa lihi Yawɛ Daalikauli Adaka maa puuni, ka o daa ku bɛ ninvuɣ’ pisopɔin zaa. Ka niriba daa kum bɛ zuɣu, Yawɛ ni daa ku ba pam shɛm maa zuɣu.

²⁰Di saha ka Bɛtishɛmɛshinim’ maa daa yɛli, “Ŋuni n-lee ni tooi zani Yawɛ ŋun nyɛ Naawuni ŋun be kasi ŋɔ tooni? Ka o yi yi ti sani, banim’ sani ka o lee yɛn chaŋ?”

²¹Dinzuɣu ka bɛ daa tim tuumba Kiriatijiarimnim’ sani ti yɛli ba, “Filistianim’ labisi Yawɛ Daalikauli Adaka la na, kamiyana ti kpuɣi li.”