Read Dagbani 1 Samuɛl 7 Bible Online

1 Samuɛl 7 - Dagbani bible

1 Samuɛl 7

¹ Ka Kiriatijiarimnim’ maa daa kana ti kpuɣi Yawɛ Daalikauli Adaka maa n-kuli ti zaŋ li tahi do’ so ŋun yuli daa booni Abinadab ka o yili be daboli zuɣu la yiŋa. Ka bɛ daa piig’ o bia Ɛliɛza ni o yuuni Yawɛ Daalikauli Adaka maa.

²Ka Naawuni Daalikauli Adaka maa daa be Kiriatijiarim maa yuui pam. Di daa niŋ la yuun’ pisi nimaani, ka Izraɛlnim’ zaa suhuri daa kul ye Yawɛ zuɣu.

³Di saha ka Samuɛl daa yɛli Izraɛlnim’ zaa, “Yi yi ni ŋmaligi labi Yawɛ sani ni yi suhuri zaa, dindina yin’ yihimiya tinzun buɣa la zaa n-tabili buɣ’ shɛli din yuli booni Ashitarɔt la yi kɔbili ni, ka zaŋ yimaŋ’ zaa ti Yawɛ n-jɛmd’ o kɔŋko, ka o fan ya Filistianim’ nuu ni bahi.”

⁴Ka Izraɛlnim’ daa zaŋ buɣ’ shɛŋa din daa be bɛ sani ka bɛ booni li Baalnim’ la mini buɣili Ashitarɔt labi, ka jɛmdila Yawɛ kɔŋko.

⁵Ka Samuɛl daa yɛli ba, “Laɣimmiya Izraɛlnim’ zaa Mizipa ka n ti suhi Yawɛ tin ya.”

⁶Ka bɛ daa laɣim Mizipa n-tooi kom booi bahi Yawɛ tooni nimaani ka lo noli dindali maa ka yɛli, “Ti tum alahichi Yawɛ sani.” Ka Samuɛl daa nyɛ Izraɛlnim’ zuɣulana Mizipa maa.

⁷Filistianim’ ni daa wum ni Izraɛlnim’ laɣimla Mizipa, ka bɛ nanim’ daa lo tɔbu n-chaŋ ni bɛ ti tuhi ba. Ka Izraɛlnim’ daa wum li ka dabiɛm gbahi ba.

⁸Ka Izraɛlnim’ maa daa yɛli Samuɛl, “Kul suhimi Yawɛ ŋun nyɛ ti Naawuni ŋɔ tim’ ti, ka o fa ti Filistianim’ ŋɔ nuu ni bahi.”

⁹Ka Samuɛl daa gbaai piɛbil’ ŋun na mɔɣiri kɔrigi n-zaŋ o zaɣ’ muni nyo buɣim mali sara ti Yawɛ. Ka o daa suhi Yawɛ ti Izraɛlnima, ka Yawɛ daa deei Samuɛl suhigu maa.

¹⁰Samuɛl ni daa na maani sara maa ka Filistianim’ maa vu m-mirina ni bɛ ti liri Izraɛlnima; amaa ka Yawɛ kukoli daa tahi pam dindali maa m-birim Filistianim’ maa ka bɛ ŋmaligi guui ka chɛ Izraɛlnima.

¹¹Ka Izraɛlnim’ maa daa dii yi Mizipa na n-kar’ doli Filistianim’ maa n-kuri ba hal ti miri Bɛtikar.

¹²Di saha ka Samuɛl daa bo kuɣili sa Mizipa mini Jɛshana sunsuuni, ka bol’ li Ɛbɛnɛza,[4] dama o daa yɛlimi, “Kpe ka Yawɛ sɔŋ ti.”

¹³Ka Izraɛlnim’ daa nyaŋ Filistianim’ maa, ka bɛ daa bi lan buɣisi ni bɛ liri ba bɛ tiŋgbani maa ni yaha, ka Yawɛ daa kul darigiri Filistianim’ maa tibili Samuɛl ʒiɛmani maa ni zaa.

¹⁴Ka Izraɛlnim’ daa lan deei Filistianim’ ni daa tuhi fa tiŋ’ shɛŋa bɛ sani zaa. Ɛkurɔn zaŋ hal ti kpa Gaat, bɛ daa fa bɛ tiŋgbana zaa Filistianim’ sani. Ka suhudoo daa lan niŋ bɛn’ Izraɛlnim’ maa mini Amɔrinim’ sunsuuni.

¹⁵Ka Samuɛl daa niŋ Izraɛl zuɣulana hal ni o nyɛvili tariga.

¹⁶O daa gindila Bɛtɛl mini Giligal ni Mizipa yuuni kam nti maani Izraɛlnim’ yɛla nimaani zaa.

¹⁷Di nyaaŋa ka o lab’ kuli o ya Rama. Ŋuna n-daa lan maani Izraɛlnim’ yɛla nimaani gba. O daa lan me sara maligu bimbini nimaani ti Yawɛ.