Read Dagbani 1 Samuɛl 8 Bible Online

1 Samuɛl 8 - Dagbani bible

1 Samuɛl 8

¹Samuɛl ni daa ti kurigi, o daa zaŋla o bidibisi n-leei Izraɛlnim’ zuɣulaannima.

²O bidib’ kpɛm’ sani yuli daa boonila Joɛl, ka ŋun paya mi yuli booni Abija; Bɛ daa nyɛla Bɛrishiiba zuɣulaannima.

³Amaa o bihi maa bɛn daa bi dol’ o naba, ka zaŋ bɛ zaŋsim niŋla bun’ ni, ka deeri birapu niriba sani, ka bi doli yɛlimaŋli soli maani bɛ yɛla.

⁴Di saha ka Izraɛl kpamba zaa daa laɣim taba n-chaŋ Samuɛl sani Rama

⁵ nti yɛl’ o, “Nyama, pumpɔŋɔ a kurigiya, ka a bihi ŋɔ mi bi dol’ a naba, dinzuɣu bom’ naa ti ti ka o su ti kaman zuliya kam ni mali nanim’ shɛm ŋɔ.”

⁶Amaa bɛ ni daa yɛli Samuɛl, “Tim’ ti naa ka o su ti maa,” di daa bi palig’ o suhu; ka o daa suhi Yawɛ.

⁷Ka Yawɛ yɛl’ o, “Wummi niriba maa ni yɛl’ a shɛlikam maa zaa, dama pa nyini ka bɛ zaɣisi, amaa mani ka bɛ zaɣisi ni n di lan nyɛ bɛ naa maa.

⁸Saha shɛli n ni daa yihi ba Ijipti tiŋgbɔŋ ni na hal ni zuŋɔ, bɛ tuma zaa kul wuhirila lala, bɛ zaɣisi ma ka jɛmdila buɣa, lala ka bɛ niŋd’ a gba maa.

⁹Dinzuɣu pumpɔŋɔ wummi bɛ ni yɛli shɛm maa, amaa lee kpahimi bɛ zuɣu ni, ka wuhi ba na’ so ŋun ti yɛn su ba biɛhigu ni ti yɛn nyɛ shɛm bɛ sani.”

¹⁰Ka Samuɛl daa yɛli ninvuɣ’ shɛb’ bɛn zaa daa yɛl’ o ni o bom’ naa ti ba maa Yawɛ ni yɛli shɛm zaa.

¹¹O daa yɛli ba, “Na’ so ŋun ti yɛn sun ya biɛhigu ni ti yɛn nyɛ shɛm yi sani m-bɔŋɔ, o ni ti zaŋ yi bidibisi niŋ chɛchɛbumbariba mini wɔribariba, ka bɛ be o chɛchɛbuŋ’ tooni.

¹²O ni ti zaŋ shɛb’ leeg’ o tɔbbi’ kpamba n-chɛ ka bɛ su tɔbbihi tuhilituhili, ka shɛb’ mi su pihinunu; ka zaŋ shɛb’ leeg’ o pukpariba, ka bɛ kɔr’ o puu ka kpuɣir’ o puu atam, ka shɛb’ mi maani o chɛchɛbunsi min’ o tɔbutuhiri’ nɛma.

¹³O ni ti zaŋ yi bipuɣinsi leeg o tulaalɛmaaniba min’ o bindir’ duɣiriba ni o bɔrɔbɔro shɛriba.

¹⁴O ni ti fa yi puri mini yi wain tihi ni yi Olivi tihi puri zaa din mali vuhim n-zaŋ ti o tumtumdiba.

¹⁵O ni ti deei yi bindira mini yi wain tihi wala pirigibu bupia kam puuni vaabu yim ti o kpambaliba min’ o tumtumdiba.

¹⁶O ni ti fa yi tumtumdi’ dɔbba mini paɣiba, ka deei yi naɣ’ viɛla mini yi bun’ viɛla zaa ka bɛ tumd’ o tuma.

¹⁷O ni ti yihi biŋkɔb’ yino yi biŋkɔbiri pia kam puuni ka yi ti leeg’ o daba.

¹⁸Di saha maa, yi ni ti fabili pam yi ni pii na’ so maa zuɣu, amaa ka Yawɛ ti ku garigi ya dindali maa.”

¹⁹Ka niriba maa daa zaɣisi Samuɛl yɛligu maa wumbu ka yɛli, “Aai! Ti bɔri ni ti mali naa ka o su ti.

²⁰Ka ti gba biɛhigu ŋmani zuliya shɛb’ biɛhigu, ti naa maa ni su ti, ka ni yina n-gari tooni zaŋ ti tuhi tɔb’ kam.”

²¹Samuɛl ni daa wum niriba maa yɛligu maa, ka o gba daa lan zaŋ li yɛli Yawɛ.

²²Ka Yawɛ yɛli Samuɛl, “Wummi bɛ ni yɛli shɛm maa, ka bo naa ti ba.” Di saha ka Samuɛl daa yɛli Izraɛlnim’ maa, “Sokam labimi kul’ o ya.”