Read Dargi Мәтта 28 Bible Online

Мәтта 28 - Dargi bible

Мәтта 28

¹Сут бархІи шалгІеббухъи гІергъи, цархІил жумягІла бехІбихьудла цаибил бархІи савли Мария Магдалинара, цархІил Марияра хІяб чебаэс бакІиб.

²ИлхІели цІакьли мерсдакьун, сенкІун зубразивад кацІибси Аллагьла малаик, хІябла унзаличибад къаркъа убкасили, иличи кайилри.

³Илала куц лямцІлагъунари, иличирти палтарра дяхІиван цІублири.

⁴Илизибад урухбиубли, къараулбирути руржесбииб ва бебкІибтигъунбиуб.

⁵Малаикли, хьунул адамтачи дугьайзурли, иб: «УрухмакІудая. Балулра хІуша къанчличи чеветяхъибси ГІисагІир умцІули диъни.

⁶Ил ишав агара – Ил, бурибси кьяйдали, мицІиркайуб. Гъамдиубли хІердизирая Аричи кайхьунси мерличи

⁷ва, къалабали дякьи, Илала мутагІялимтази бурая, Сай вебкІибихІивад мицІириубли, хІушаб гьалав Галилеялизи аркьули сай ва илав чейида, или. ХІера, хІушази нуни бурира».

⁸Къалабали хІяблизибад дурабухъи, Илала мутагІялимтази багьахъес халаси урехиличил ва разидешличил дуцІбухъун.

⁹Илала мутагІялимтази багьахъес илди аркьухІели, илдас ГІиса цугикиб ва иб: «Разидиирая!» Илди, гъамбиубли, Илала кьяшми дуциб ва Илис икрамбариб.

¹⁰ИлхІели илдази ГІисани иб: «УрухмакІудая, дякьи, Дила узбази бурая Галилеялизи букьяхъес, Илав Ну илдани чейура».

¹¹Илди аркьухІели, цацабехІти къараултани, шагьарлизи бухІнабухъи, хала кашишунази бетаурсиличила буриб.

¹²Хала кашишуни халкьла тямадабачил гьунибаили, мажлис барили, бургъантас дахъал арц дедиб ва иб:

¹³«Бурая, нуша дусухІели, Илала мутагІялимти бакІили, дугели Ил вигІун или.

¹⁴Эгер ил хабар улкала бекІличи баалли, хІушаб селра хІебарахъес нушани къайгъибирехІе».

¹⁵Илдани, арц касили, чузи бурибсиван бариб. Ил хабар гьанналичи бикайчи жугьутІунала ургаб тІинтІбиубли саби.

¹⁶ВецІнуцара мутагІялим биалли, ГІисани букьяхъес хъарбарибси, Галилеялизибси дубурличи арбякьун.

¹⁷Илав Ил чеили, икрамбариб, амма цацабехІти васвасбухъун.

¹⁸Гъамиубли, ГІисани илдази иб: «Ванзалара заклара ари Набзи гибси саби.

¹⁹Илбагьандан, ардякьи, лебилра халкьани бурсибарая, Дудешла, Уршила ва Дурхъати РухІла у багьандан бизахъули,

²⁰Нуни хІушачи хъарбарибсиван гьар секІал дузахъес руркъули. Ну хІушачил вирусра лерилра замунтазив, ахирличи бикайчи. Амин».