Read De Bibel JHF 1. Mose 13 Bible Online

1. Mose 13 - De Bibel JHF bible

1. Mose 13

¹Un Abram jinkj nopp ut Ägipten, hee un siene Fru un aules, waut hee haud, un Loot met am, nom Sieden (vom Launt Kanaan).

²Un Abram wia sea rikj aun Vee, aun Selwa un aun Golt.

³Un hee jinkj opp siene Stiej vom Sieden bat Betel, bat däm Uat, woa aum Aunfank sien Zelt jewast wia, tweschen Betel un Ai,

⁴no dee Städ vom Aultoa, däm hee doa verhäa jemoakt haud. Un Abram roopt doa selfst däm Nomen det Harn aun.

⁵Un uk Loot, dee met Abram trock, haud Kjlienvee un Rinda un Zelten.

⁶Un daut Launt vekrauft daut nich, daut see toop wonden; dan äa Hab un Goot wia groot, un see kunnen nich toop wonen.

⁷Un daut jeef Striet tweschen de Hoads von Abram un de Hoads von Loot sienem Vee. Un de Kanaanita un de Perisita wonden doa noch em Launt.

⁸Doa säd Abram too Loot: Lot doch kjeen Striet tweschen mie un die un tweschen miene Hoads un diene Hoads sennen; dan wie sent Breeda!

⁹Es nich daut gaunze Launt ver die? Trann die doch von mie! West du too Linkjen, soo well ekj mie too Rajchten dreien, un west du too Rajchten, soo well ekj mie too Linkjen dreien.

¹⁰Un Loot hoof siene Uagen opp un sach de gaunze Läacht vom Jordan, daut dee gaunze Jäajent feicht wia [ver däm Har Sodom un Gomorra vetilcht haud] aus de Goaden Gottes, aus daut Ägiptenlaunt, bat no Zoar han.

¹¹Un Loot erwäld sikj de gaunze Läacht vom Jordan, un Loot jinkj nom Oosten; un see tranden sikj von eenaunda.

¹²Abram wond em Launt Kanaan, un Loot wond en de Städa enne Läacht un schluach Zelten opp bat no Sodom.

¹³Un de Lied von Sodom wieren bees un groote Sinda ver däm Harn.

¹⁴Un de Har säd to Abram, nodäm Loot sikj von am jetrant haud: Häw diene Uagen opp un kjikj von däm Uat, woa du best, nom Nuaden un nom Sieden un nom Oosten un nom Wasten!

¹⁵Dan daut gaunze Launt, daut du sitst, ekj well die daut jäwen un dienem Somen opp eewich.

¹⁶Un ekj well dien Somen aus daut Stoff oppe Ieed moaken, soo daut, wan wia däm Stoff oppe Ieed talen kaun, soo woat uk dien Somen jetalt woaren.

¹⁷Moak die opp un derchwaunda daut Launt no siene Lenj un no siene Breed; dan die well ekj daut jäwen.

¹⁸Un Abram schluach Zelten opp, un kaum un wond unjre Terebinten Mamre, de bie Hebron sent; un hee bud doa selfst däm Harn een Aultoa.