Read De Bibel JHF 1. Mose 16 Bible Online

1. Mose 16 - De Bibel JHF bible

1. Mose 16

¹Un Sarai, Abram siene Fru, jebua am nich. Un see haud eene ägiptische Deenstmejal, un äa Nomen wia Hagar.

²Un Sarai säd to Abram: Kjikj doch, de Har haft mie veschloten, daut ekj nich jebäaren kaun; go doch no miene Deenstmejal en, veleicht woa ekj ut ar erbut woaren. Un Abram hieed opp Sarai äare Stemm.

³Un Sarai, Abram siene Fru, neem Hagar, de ägiptische Deenstmejal, no 10 Joa, dee Abram em Launt Kanaan jeläft haud, un jeef ar Abram, äarem Maun, am to Fru.

⁴Un hee jinkj no Hagar en, un see wort schwanga; un aus see sach, daut see schwanga wia, doa wort äare Harin jerinj en äare Uagen.

⁵Un Sarai säd to Abram: Daut Orrajcht, daut mie traft, felt opp die! Ekj ha miene Deenstmejal en dienen Schoot jejäft; un doa see sitt, daut see schwanga jeworden es, sie ekj jerinj en äare Uagen. De Har recht tweschen mie un die!

⁶Un Abram säd to Sarai: Kjikj, diene Deenstmejal es en diene Henj; doo ar, waut en diene Uagen goot es. Un Sarai behaundeld ar hoat, un see rand von ar wajch.

⁷Un de Enjel Gottes funk ar enne Wieste aun eene Wotakjwal, aun de Kjwal oppem Wajch no Sur.

⁸Un hee säd: Hagar, Sarai äare Deenstmejal, wuahäa kjeemst du, un wuahan jeist du? Un see säd: Ekj ran wajch von miene Harin Sarai.

⁹Un de Enjel Gottes säd to ar; Go no diene Harin trigj un deemutij die unja äare Henj.

¹⁰Un de Enjel Gottes säd to ar: Ekj well dien Somen sea vemieren, daut hee fa de Menj nich jetalt woaren saul.

¹¹Un de Enjel Gottes säd to ar: Kjikj, du best schwanga un woascht eenen Sän jebäaren; un du saust am däm Nomen Ismael jäwen, dan de Har haft opp dien Älent jehieet.

¹²Un hee, hee woat een Wiltäsel von Mensch sennen; siene Haunt jäajen aule un aula Haunt jäajen am, un hee woat ver däm Aunjesecht aul siene Breeda wonen.

¹³Doa nand see däm Harn, dee to ar räd: Du best een Gott, dee sikj seenen lat! Dan see säd: Ha ekj nich uk hia jeseenen, nodäm hee sikj haft seenen loten?

¹⁴Doarom nand maun däm Borm: Beer-Lachai-Roi [Borm vom Läwendjen, dee mie sitt]; kjikj, dee es tweschen Kades un Bered.

¹⁵Un Hagar jebua däm Abram eenen Sän; un Abram jeef sienem Sän, däm Hagar jebuaren haud, däm Nomen Ismael.

¹⁶Un Abram wia 86 Joa oolt, aus Hagar däm Abram Ismael jebua.