Read De Bibel JHF 1. Mose 19 Bible Online

1. Mose 19 - De Bibel JHF bible

1. Mose 19

¹Un dee beid Enjel kaumen Oppenowent no Sodom; un Loot saut aum Dooa von Sodom. Un aus Loot an sach, stunt hee opp, an entjäajen, un bekjt sikj rauf, met däm Aunjesecht bat to Ieed;

²un hee säd: Ach kjikjt, miene Harn! Komt doch en daut Hus von junem Kjnajcht un äwanacht un wauscht june Feet; un jie moaken junt tiedich opp un got junem Wajch. Oba see säden: Ne, sonda wie wellen oppem Plauz äwanachten.

³Un hee kroagd an sea; un see jinjen bie am nenn un kaumen en sien Hus. Un hee muak an een Mol, un hee backt onjesuade Kuaken, un see auten.

⁴Noch hauden see sikj nich doljelajcht, doa omrinjden de Mana de Staut, de Mana von Sodom, daut Hus, von Jinjlinkj bat toom Jreis, daut gaunze Volkj von aule Enj de Staut.

⁵Un see roopten Loot un säden to am: Woa sent de Mana, dee dise Nacht no die jekomen sent? Brinj an no ons rut, daut wie an erkjanen!

⁶Un Loot jinkj no an rut aun däm Engank un schlot de Däa hinja sikj too;

⁷un hee säd: Doot doch nich iebel, miene Breeda!

⁸Kjikj doch, ekj ha twee Dajchta, dee kjeen Maun erkjant ha; lot mie an doch no junt rutfieren, un doot an, aus et goot es en june Uagen; blooss dise Mana doot nuscht, doa see nu eenmol unja däm Schauten von mienem Dak jekomen sent.

⁹Oba see säden: Go wajch! Un see säden: Doa, de eena es jekomen, aus een Framdlinkj om hia too bliewen, un well däm Rechta spälen? Nu, wie wellen die oaja doonen aus jane. Un see jreepen hoat aun opp däm Maun, opp Loot, un kjeemen doatoo, om de Däa optobräakjen.

¹⁰Un de Mana strakjte äare Henj ut un brochten Loot no sikj em Hus un veschlooten de Däa.

¹¹Un de Mana, dee em Engank vom Hus wieren, schluagen see met Blintheit, vom kjlansten bat toom jratsten; un see worden meed, däm Engank too finjen.

¹²Un de Mana säden to Loot: Hast du noch wäm hia, eenen Schwiasän un diene Säns un diene Dajchta un wäm irjent du enne Staut hast, leid an ut disem Uat rut!

¹³Dan wie wellen disem Uat vedoawen, wiels äa Jeschrecht groot jeworden es ver Gott; un de Har haft ons jeschekjt, de Staut too vedoawen.

¹⁴Un Loot jinkj rut un räd to siene Schwiasäns, dee siene Dajchta nämen sullen, un säd: Moakt junt opp, got ut disem Uat; dan Gott well dise Staut vedoawen. Oba hee wia enne Uagen von siene Schwiasäns aus eena, dee Spoos drift.

¹⁵Un soo aus daut Morjenroot oppjinkj, doa drenjden de Enjel en Loot un säden: Moak die opp, nemm diene Fru un diene twee Dajchta, dee doa sent, doamet du nich wajchjeropt woascht en de Ojjerajchtichkjeit de Staut!

¹⁶Un aus hee daut vetrock, pakten de Mana siene Haunt un de Haunt von siene Fru un de Haunt siene twee Dajchta, wiels de Har am veschoond, un fieed am rut un leet am butre Staut.

¹⁷Un daut passieed, aus see an en Frieen rutjefieet hauden, doa säd hee: Rad die om dien Läwen wellen; kjikj nich hinja die, un bliew nich enne Läacht stonen; rad die oppe Boaj, doamet du nich wajchjeräten woascht!

¹⁸Un Loot säd to an: Nich doch, Har!

¹⁹Kjikj doch, dien Kjnajcht haft Jnod jefungen en diene Uagen, un du hast diene Jnod groot jemoakt, dee du aun mie erwesse hast, miene Seel aum Läwen too erhoolen; oba ekj kaun mie nich opp de Boaj raden, doa kaun mie daut Onjlekj ennholen, daut ekj stoaw.

²⁰Kjikj doch, dise Staut es dichtbie, om doahan too ranen, un see es kjlien; lot mie doch doahan - mie to raden, (es see nich kjlien?), doamet miene Seel aum Läwen blift.

²¹Un hee säd to am: Kjikj, uk en disem Stekj ha ekj die erhieet, daut ekj de Staut nich vedoaw, von dee du jerät hast.

²²Spood die, rad die doahan; dan ekj kaun nuscht doonen, bat du doa han jekomen best. Doahäa haft maun de Staut däm Nomen Zoar jejäft.

²³De Sonn jinkj äwa de Ieed opp, aus Loot en Zoar aunkaum.

²⁴Un de Har leet opp Sodom un opp Gomorra Schwäwel un Fia räajnen vom Harn ut däm Himmel;

²⁵un hee dreit dise Städa om un de gaunze Läacht un aule Bewona de Städa un daut waut oppem Launt jewossen wia.

²⁶Un [Loot] siene Fru kjikjt sikj no hinjen om un wort too eenen Soltstenda.

²⁷Un Abraham muak sikj Zemorjes tiedich opp aun däm Uat, wua hee ver däm Harn jestonen haud;

²⁸Un hee kjikjt no Sodom un Gomorra han un nom gaunzen Läachtlaunt; un hee sach: Un kjikj, een Ruak stieech vonne Ieed opp, aus de Ruak von eenem Schmeltowen.

²⁹Un daut passieed, aus Gott de Städa enne Läacht vedorw, doa docht Gott aun Abraham un fieed Loot medden ut däm Vedoawen, aus hee de Städa omdreid, en dee Loot jewont haud.

³⁰Un Loot jinkj nopp von Zoar un wond oppe Boaj, un siene beid Dajchta met am; dan hee haud Angst, en Zoar too wonen. Un hee wond en eene Heel, hee un siene beid Dajchta.

³¹Un de Ieeschtjebuarne säd to de Jinjre: Ons Voda es oolt, un kjeen Maun es em Launt, om no ons entogonen no de Wies aula Welt.

³²Komm, lot ons onsem Voda Wien to drinkjen jäwen un bie am ligjen, doamet wie von onsem Voda Somen aum Läwen erhoolen.

³³Un see gauwen äarem Voda Wien to drinkjen en dee selje Nacht, un de Ieeschtjebuarne jinkj nenn un läd sikj bie äaren Voda dol; un hee wist nich om äa Hanlajen noch om äa Oppstonen.

³⁴Un daut passieed aum Morjen, doa säd de Ieeschtjebuarne to de Jinjre: Kjikj, ekj ha jistren Nacht bie mienem Voda jeläajen; lot ons am uk dise Nacht Wien to drinkjen jäwen, un go nenn, ligj bie am, doamet wie von onsem Voda Somen aum Läwen erhoolen.

³⁵Un see gauwen uk en dee selje Nacht äarem Voda Wien to drinkjen, un de Jinjre stunt opp un läd sikj bie am; un hee wist nich om äa Hanlajen noch om äa oppstonen.

³⁶Un de beid Dajchta von Loot worden schwanga von äarem Voda.

³⁷Un de Ieeschtjebuarne jebua eenen Sän, un see jeef am däm Nomen Moab; disa es de Voda de Moabita bat opp disem Dach.

³⁸Un de Jinjre, uk see jebua eenen Sän, un see jeef am däm Nomen Ben Ammi; disa es de Voda de Kjinja Amon bat opp disem Dach.