Read De Bibel JHF 1. Mose 20 Bible Online

1. Mose 20 - De Bibel JHF bible

1. Mose 20

¹Un Abraham jinkj von doa nom Meddachlaunt un wond tweschen Kades un Sur; un hee hilt sikj en Gerar opp.

²Un Abraham säd von Sara, siene Fru: See es miene Sesta. Doa schekjt Abimelech, de Kjennich von Gerar, un leet Sara holen.

³Un Gott kaum no Abimelech en eenem Droom de Nacht un säd to am: Kjikj, du woascht wäajen de Fru stoawen, dee du jenomen hast; dan see es eenem Maun sien Ehefru.

⁴Oba Abimelech haud ar nich bereat; un hee säd: Har, west du uk eene jerajchte Nazion ombrinjen?

⁵Haft hee nich to mie jesajcht: See es miene Sesta? Un uk see selfst haud jesajcht: Hee es mien Brooda. Ekj ha daut en eenfeltjen Hoaten un oschuldje Henj jedonen.

⁶Un Gott säd to am em Droom: Uk ekj weet, daut du dit en eenfeltjen Hoaten jedonen hast, un soo ha ekj die uk doavon aufjehoolen, jäajen mie too sindjen; doarom ha ekj die nich erlaubt, ar too berieren.

⁷Un nu jeff de Fru däm Maun trigj; dan hee es een Profeet un woat fa die bedden, un du woascht aum Läwen bliewen. Oba wan du ar nich trigj jefst, soo weet, daut du jewess stoawen woascht, du un aules, waut dien es!

⁸Un Abimelech stunt tiedich Zemorjes opp un roopt aul siene Kjnajchts un säd aul dise Wieed ver äare Uaren; un de Mana ferchten sikj sea.

⁹Un Abimelech roopt Abraham un säd to am: Waut hast du ons aunjedonen! Un waut ha ekj jäajen die jesindicht, daut du äwa mie un äwa mien Rikj eene groote Sind jebrocht hast? Dinj, dee nich jedonen woaren sullen, hast du mie aunjedonen.

¹⁰Un Abimelech säd to Abraham: Waut haudst du väa, daut du dit jedonen hast?

¹¹Un Abraham säd: Wiels ekj mie säd: Jewess es kjeene Gottesforcht aun disem Uat, un see woaren mie wäajen miene Fru ombrinjen.

¹²See es uk woarhauft miene Sesta, de Dochta von mienem Voda, oba nich de Dochta von miene Mutta; un see es miene Fru jeworden.

¹³Un daut passieed, aus Gott mie ut mien Vodahus befool uttowaundren, doa säd ekj to ar: Dit es dien Jefaulen, dee du mie erwiesen muchst; aun jiedrem Uat, wuahan wie komen woaren, saj von mie: Hee es mien Brooda.

¹⁴Doa neem Abimelech Kjlienvee un Rinda un Kjnajchts un Deenstmejales un jeef dee däm Abraham; un hee jeef am Sara, siene Fru, trigj.

¹⁵Un Abimelech säd: Kjikj, mien Launt es ver die; won, woa daut goot es en diene Uagen.

¹⁶Un too Sara säd hee: Kjikj, ekj ha dienem Brooda 1000 Selwaschekel jejäft; kjikj, daut saul die eene Uagendakj ver aule sennen, dee bie die sent, un betrafs opp aules es de Sach rajchtlich vollstrakjt.

¹⁷Un Abraham bäd too Gott; un Gott heeld Abimelech un siene Fru un siene Deenstmejales, soo daut see Kjinja kjräajen.

¹⁸Dan de Har haud wäajen Sara, de Fru von Abraham, jiedret Muttalief em Hus Abimelech jenslich veschloten.