Read De Bibel JHF 1. Mose 22 Bible Online

1. Mose 22 - De Bibel JHF bible

1. Mose 22

¹Un daut passieed no dise Dinj, daut Gott däm Abraham vesocht; un hee säd to am: Abraham! Un hee säd: Hia sie ekj!

²Un hee säd: Nemm dienen Sän, dienen eensjen, däm du leef hast, däm Isaak, un go han en daut Launt Morija, un opfa am doa selfst aus Brauntopfa opp eenem de Boaj, däm ekj die sajen woa.

³Un Abraham stunt tiedich Zemorjes opp un sodeld sienen Äsel un neem met sikj twee von siene Junges un Isaak, sienen Sän; un hee spoold Holt toom Brauntopfa un muak sikj opp un jinkj han aun däm Uat, däm Gott am jesajcht haud.

⁴Aum dredden Dach, doa hoof Abraham siene Uagen un sach däm Uat von wiet.

⁵Un Abraham säd to siene Junges: Jie blieft hia met däm Äsel; oba ekj un de Jung wellen bat doahan gonen un aunbäden un no junt trigjkomen.

⁶Un Abraham naum daut Holt toom Brauntopfa un läd daut opp Isaak, sienem Sän; un en siene Haunt naum hee daut Fia un daut Massa; un see jinjen beid metenaunda.

⁷Un Isaak räd too sienem Voda Abraham un säd: Mien Voda! Un hee säd: Hia sie ekj, mien Sän. Un hee säd; Kjikj, daut Fia un daut Holt; oba woa es daut Schop toom Brauntopfa?

⁸Un Abraham säd: Gott woat sikj daut Schop toom Brauntopfa utsäkjen, mien Sän. Un see jinjen beid metenaunda.

⁹Un see kaumen aun däm Uat, von däm Gott am jesajcht haud; un Abraham bud doa selfst eenen Aultoa un läd daut Holt doa nopp; un hee bung sienen Sän Isaak un läd am opp däm Aultoa bowen oppem Holt.

¹⁰Un Abraham strakjt siene Haunt ut un neem daut Massa, om sienen Sän too schlachten.

¹¹Doa roopt am de Enjel Gottes vom Himmel too un säd: Abraham, Abraham! Un hee säd: Hia sie ekj!

¹²Un hee säd: Strakj diene Haunt nom Jung nich ut, un doo am nuscht! Dan nu weet ekj, daut du Gott ferchst un dienen Sän, dienen eensjen, mie nich veschoont hast.

¹³Un Abraham hoof siene Uagen opp un sach, un kjikj, doa wia een Bock em Struck met siene Hieena faustjehoolen; un Abraham jinkj han un naum däm Bock un opfad am aus Brauntopfa aun sienem Sän siene Städ.

¹⁴Un Abraham jeef disem Uat däm Nomen: De Har sitt; doahäa sajcht maun bat Vondoag: Opp däm Boajch Gottes woat jeseenen woaren.

¹⁵Un de Enjel Gottes roopt Abraham een tweedet Mol vom Himmel

¹⁶un säd: Ekj schwia bie mie selfst, sajcht de Har, daut, wiels du dit jedonen un dienen Sän, dienen eensjen, mie nich veschoont hast,

¹⁷well ekj die sea säajnen un dienen Somen sea vemieren, aus de Stierns aum Himmel un aus de Saunt, dee aum Mäaeewa es; un dien Somen woat daut Dooa von diene Fiend besetten;

¹⁸un en dienem Somen woaren jesäajent aule Nazionen de Ieed: Doarom, daut du miene Stemm jehorcht hast.

¹⁹Un Abraham jinkj no siene Junges trigj, un see muaken sikj opp un jinjen metenaunda no Beerscheba; un Abraham wond en Beerscheba.

²⁰Un daut passieed no dise Dinj, doa wort däm Abraham berecht: Kjikj, Milka, uk see haft dienem Brooda Nahor Säns jebrocht:

²¹Uz, sienen Ieeschtjebuarnen, un Bus, sienen Brooda, un Kemuel, däm Voda Aram,

²²un Kesed un Haso un Pildasch un Jidlaf un Betuel.

²³Un Betuel jebua Rebekka. Dise acht jebua Milka däm Nahor, däm Brooda von Abraham.

²⁴Un siene Deenstfru, met Nomen Reuma, uk see jebua Tebach un Gacham un Tachasch un Maaka.