Read De Bibel JHF 1. Mose 26 Bible Online

1. Mose 26 - De Bibel JHF bible

1. Mose 26

¹Un daut kjeem eene Hungaschnoot em Launt, buta de jewäsne Hungaschnoot, dee en Abraham siene Tieden jewast wia. Un Isaak jinkj no Abimelech, däm Kjennich äwa de Filista, no Gerar.

²Un de Har erschien am un säd: Go nich rauf no Ägipten; bliew em Launt; bliew en däm Launt, von däm ekj die saj.

³Hool die en disem Launt opp, un ekj woa met die sennen un die säajnen; dan die un dienem Somen woa ekj aule dise Lenda jäwen, un ekj woa däm Eit opprajcht hoolen, däm ekj dienem Voda Abraham jeschwuaren ha.

⁴Un ekj woa dienem Somen vemieren aus de Stierns aum Himmel un dienem Somen aule dise Lenda jäwen; un en dienem Somen woaren jesäajent woaren aule Nazionen de Ieed:

⁵Doafäa, daut Abraham miene Stemm jehorcht un miene Väaschreften beacht (jehoolen) haft, miene Jebooten, miene Sazungen un miene Jesazen.

⁶Soo bleef Isaak en Gerar.

⁷Un de Mana von däm Uat fruagen no siene Fru, un hee säd: See es miene Sesta. Dan hee haud Angst too sajen: Miene Fru, endäm hee docht: De Mana aun disem Uat moaken mie doot wäajen Rebekka; dan see es scheen vom Aunseenen.

⁸Un daut passieed, aus hee lenjre Tiet doa jewast wia, doa kjikjt Abimelech, de Kjennich äwa de Filista, derch daut Fensta, un hee sach, un kjikj, Isaak spost met Rebekka, siene Fru.

⁹Doa roopt Abimelech däm Isaak un säd: Kjikj, woarhauft, see es diene Fru; un woo hast du jesajcht: See es miene Sesta? Un Isaak säd to am: Wiels ekj mie säd: Daut ekj nich äat haulwen stoaw.

¹⁰Un Abimelech säd: Waut hast du ons doa jedonen! Woo leicht haud sikj wäa ut däm Volkj too diene Fru jelajcht haben, un du haudst eene Schult äwa ons jebrocht.

¹¹Un Abimelech befool aulem Volkj un säd: Wäa disem Maun un siene Fru auntaust, saul jewess omjebrocht woaren.

¹²Un Isaak seid en däm Launt un arnt en däm seljen Joa 100 Mol soo väl; un de Har säajend am.

¹³Un de Maun wort groot un wort emma jrata, bat hee sea groot wia.

¹⁴Un hee haud Häaden von Kjlienvee un Häaden von Rinda un väl Deena; un de Filista wieren äwa am aufjenstich.

¹⁵Un aule Borms, dee de Kjnajchts von sienem Voda en de Doag von sienem Voda Abraham jegroft hauden, vestopten de Filista un felden dee met Ieed.

¹⁶Un Abimelech säd to Isaak: Go wajch von ons, dan du best väl majchtja jeworden aus wie.

¹⁷Doa jinkj Isaak wajch un schluach sien Loaga em Tol Gerar opp un wond doa selfst.

¹⁸Un Isaak groof de Wotaborms wada op, dee see enne Doag von sienem Voda Abraham jegroft un dee de Filista no Abraham sienem Doot toojeschett hauden; un hee nand an met deeselwje Nomes, met dee sien Voda an jenant haud.

¹⁹Un Isaak siene Kjnajchts growe em Tol un fungen doa eenen Borm met läwendjen Wota.

²⁰Doa zankten de Hoads von Gerar met Isaak siene Hoads un säden: Daut Wota jehieet ons! Un hee jeef däm Borm däm Nomen Esek, wiels see met am jezankt hauden.

²¹Un see growe eenen aundren Borm, un see streeden uk äwa disem, un hee jeef am däm Nomen Sitna.

²²Un hee muak sikj von doa opp un groof eenen aundren Borm, un äwa disem streeden see nich; un hee jeef am däm Nomen Rehobot un säd: Dan nu haft Gott ons Rum jemoakt, un wie woaren em Launt fruchtboa sennen.

²³Un hee jinkj von doa no Beerscheba.

²⁴Un de Har erschien am aune selje Nacht un säd: Ekj sie de Gott von dienem Voda Abraham, fercht die nich, dan ekj sie met die, un ekj woa die säajnen un dienen Somen vemieren om Abraham, mienem Kjnajcht sienen wellen.

²⁵Un hee bud doa eenen Aultoa un roopt däm Nomen Gottes aun; un hee schluach doa sien Zelt opp; un de Kjnajchts von Isaak growe doa eenen Borm.

²⁶Un Abimelech kjeem no am von Gerar met Achusat, sienem Frint, un Pikol, sienem Häabowaschten.

²⁷Un Isaak säd to an: Wuarom kom jie no mie, doa jie mie doch haussen un mie von junt wajchjejoagt ha?

²⁸Un see säden: Wie ha dietlich jeseenen, daut Gott met die es; un wie ha ons jesajcht: Mucht doch een Eit tweschen ons sennen, tweschen ons un die, un wie wellen eenen Bunt met die moaken,

²⁹daut du ons nich Ieblet deist, soo aus wie die nich aunjetaust ha un aus wie die blooss Goodet jedonen un die en Fräd ha gonen loten. Du best eenmol de Jesäajenda Gottes.

³⁰Un hee muak an een Mol, un see auten un drunken.

³¹Un see stunden tiedich Zemorjes opp un schwuare eena däm aundren; un Isaak leet an gonen, un see jinjen von am en Fräd. -

³²Un daut passieed aun däm seljen Dach, doa kjeemen Isaak siene Kjnajchts un berechte am wäajen däm Borm, däm see jegroft hauden, un säden to am: Wie ha Wota jefungen.

³³Un hee nand am Sibea; doahäa de Nomen de Staut Beerscheba bat opp disem Dach.

³⁴Un Esau wia 40 Joa oolt, doa neem hee Judith to Fru, de Dochta Beeris, däm Hetita, un Basmat, de Dochta Elon, däm Hetita.

³⁵Un see wieren een Klopott fa Isaak un Rebekka.