Read De Bibel JHF 1. Mose 32 Bible Online

1. Mose 32 - De Bibel JHF bible

1. Mose 32

¹Un Laban stunt tiedich Zemorjes opp un kust siene Säns un siene Dajchta un säajend an; un Laban jinkj han un kaum trigj aun sienem Uat.

²Un Jakob jinkj sienen Wajch, un daut bejäajende am Enjel Gottes.

³Un Jakob säd, aus hee an sach: Dit es daut Häaloaga Gottes. Un hee jeef janem Uat däm Nomen Machanaim.

⁴Un Jakob schekjt Booten ver sikj häa no sienem Brooda Esau, en daut Launt Seir, de Jäajent Edom.

⁵Un hee befool an un säd: Soo sell jie to mienem Harn, too Esau, sajen: Soo sajcht dien Kjnajcht Jakob: Bie Laban ha ekj mie oppjehoolen un sie bat nu doa jebläwen;

⁶un ekj ha Rinda un Äsel, Kjlienvee un Kjnajchts un Deenstmejales jekjräajen; un ekj ha jeschekjt, daut mienem Harn weeten to loten, om Jnod en diene Uagen too finjen.

⁷De Booten kjeemen no Jakob trigj un säden: Wie sent no dienem Brooda, no Esau, jekomen, un hee kjemt die uk entjäajen un 400 Maun met am.

⁸Doa haud Jakob sea Angst; un hee deeld daut Volkj, daut bie am wia, un daut Kjlienvee un de Rinda un de Kameelen en 2 Loaga.

⁹Un hee säd: Wan Esau jäajen daut eene Loaga kjemt un an schleit, soo woat daut äwajebläwne Loaga wajchranen kjennen.

¹⁰Un Jakob säd: Gott von mienem Voda Abraham un Gott von mienem Voda Isaak, de Har, dee du to mie jerät hast: Komm trigj en dien Launt un no dien Frintschoft, un ekj well die Goots doonen!

¹¹Ekj sie too jerinj aul de Boarmhoatichkjeit un aul dee True, dee du dienem Kjnajcht erwäsen hast; dan met mienem Stock sie ekj äwa disem Jordan jegonen, un nu sie ekj too 2 Häasch jeworden.

¹²Rad mie doch von mienem Brooda siene Haunt, vonne Haunt Esau! Dan ekj ha fa am Angst, daut hee kjemt un mie schleit, de Mutta met de Kjinja.

¹³Du hast doch jesajcht: Jewess woa ekj die Goots doonen un woa dienen Somen aus däm Saunt aum Mäa moaken, dee fa de Menj nich too talen es.

¹⁴Un hee äwanacht doa selfst jane Nacht; un hee neem von däm, waut en siene Haunt jekomen wia, een Jeschenkj fa sienem Brooda Esau:

¹⁵200 Kose un 20 Bakj, 200 Muttaschop un 20 Schopsbakj,

¹⁶30 suende Kameelen met äare Falms, 40 Kjäj un 10 Bolles, 20 Äselinen un 10 junge Äsel.

¹⁷Un hee jeef dee enne Henj siene Kjnajchts, je eene Häad oppoat, un hee säd to siene Kjnajchts: Got ver mie han un lot Rum tweschen Häad un Häad.

¹⁸Un hee befool däm ieeschten un säd: Wan mien Brooda Esau die bejäajent un die frajcht un sajcht: Wäm jehieescht du aun, un wuahan jeist du, un wäm jehieet dit doa ver die?

¹⁹Soo saust du sajen: Dienem Kjnajcht Jakob; daut es een Jeschenkj, daut mienem Harn, däm Esau jeschekjt woat; un kjikj, hee selfst es hinja ons.

²⁰Un hee befool uk däm tweeden, uk däm dredden, uk aule, dee hinjre Häaden jinjen, un säd: No dise Wieed sell jie too Esau räden, wan jie am finjen,

²¹un sellen sajen: Kjikj, dien Kjnajcht Jakob es selfst hinja ons. Dan hee säd: Ekj well am derch daut Jeschenkj veseenen, daut ver mie hanjeit, un dan noch well ekj sien Aunjesecht seenen; veleicht woat hee mie aunnämen.

²²Un daut Jeschenkj jinkj ver am häa, un hee äwanacht en jane Nacht em Loaga.

²³Un hee stunt en jane Nacht opp un neem siene twee Frues un siene 2 Deenstmejales un siene 11 Säns un jinkj äwa däm Jabok Stroom (Riefa);

²⁴un hee neem an un fieed an äwa däm Fluss un fieed aules äwa waut hee haud.

²⁵Un Jakob bleef auleen äwa; un daut runk (rauseld) een Maun met am, bat daut Morjenroot oppjinkj.

²⁶Un aus hee sach, daut hee am nich dwung, doa schieed hee sien Hoftjelenkj aun; un Jakob sien Hoftjelenkj wia beschädicht, endäm hee met am rinjd.

²⁷Doa säd hee: Lot mie loos, dan de Morjenroot es oppjegonen; un hee säd: Ekj lot die nich loos, dan du säajenst mie.

²⁸Doa säd hee to am: Woo es dien Nomen? Un hee säd: Jakob.

²⁹Doa säd hee: Dien Nomen saul nich mea Jakob heeten, sonda Israel; dan du hast met Gott un met Menschen jekjamft un hast jewonnen.

³⁰Un Jakob fruach un säd: Doo mie doch dienen Nomen to weeten! Doa säd hee: Wuarom frajchst du no mienem Nomen? Un hee säajend am doa selfst.

³¹Un Jakob jeef däm Uat däm Nomen Pniel: Dan ekj ha Gott von Aunjesecht too Aunjesecht jeseenen, un miene Seel es jerat worden!

³²Un de Sonn jinkj am opp, aus hee äwa Pniel jekomen wia; un hee hinkjt aun siene Hoft.

³³Doarom äten de Kjinja Israel nich de Sänen, dee äwa däm Hoftjelenkj sent, bat opp disem Dach, wiels hee Jakob sien Hoftjelenkj, de Hoftsän, aunjereat haft.