Read De Bibel JHF 1. Mose 49 Bible Online

1. Mose 49 - De Bibel JHF bible

1. Mose 49

¹Un Jakob roopt siene Säns un säd: Vesaumelt junt, un ekj well junt vekjindjen, waut junt aum Enj de Doag bejäajnen woat.

²Komt toop un hieet, jie, Jakob siene Säns, un hieet opp Israel, junem Voda!

³Ruben, du best mien Ieeschtjebuarna, miene Krauft un de Ieeschta von miene Krauft! De Väanämsta aun Huagheit un Väanämsta aun Krauft!

⁴Aus Wota äwaschument, du saust kjeen Väadeel haben, dan du hast daut Loaga von dienem Voda bestäajen; doa hast du daut entheilicht. Mien Bad haft hee bestäajen!

⁵Simeon un Levi sent Breeda, Jereetschoft de Jewault sent äare Jewäaren.

⁶Miene Seel kjemt nich en äa jeheemen Rot, miene Iea veeenicht sikj nich met äare Vesaumlunk! Dan en äarem Oaja ha see däm Maun dootjeschloagen un en äarem Moot däm Boll jelämt.

⁷Veflucht es äa Oaja, dan hee wia jewaultich, un äa Jrim, dan hee wia grausom! Ekj woa an en Jakob vedeelen un an en Israel vestreien.

⁸Die Juda, die woaren diene Breeda lowen; diene Haunt woat oppem Jenekj diene Fiend sennen, ver die woaren sikj de Säns von dienem Voda dol bekjen.

⁹Juda es een junga Leiw; vom Raup, mien Sän, best du nohecht jestäajen. Hee bekjt sikj, hee lajcht sikj dol aus een Leiw un aus eene Muttaleiw; wäa well am oppwakjen?

¹⁰Von Juda woat daut Zepta nich aufgonen, noch de Harschastock tweschen siene Feet, bat Schilo [Rubrinjenda] kjemt, un am woaren de Velkja sikj aunschluten.

¹¹Hee binjt aum Wienstock sien Äselfalm un aun de Edelrank daut Junge siene Äselin; hee wauscht em Wien sien Kjleet un em Bloot de Druwen siene Kjleeda;

¹²de Uagen sent dunkel vom Wien, un de Tänen witt von Malkj.

¹³Sebulon, aum Mäaeewa woat hee wonen, un aum Howen de Schepp woat hee sennen un siene Sied jäajen Sidon han.

¹⁴Isachar es een knoakja Äsel, dee sikj tweschen de Häaden loagat.

¹⁵Un hee sitt, daut de Ru goot un daut et Launt leeftolich es; un hee bicht siene Schulla toom Laustdroagen un woat toom pachtboarem Kjnajcht.

¹⁶Dan woat sien Volkj rechten, aus eena de Stam Israels.

¹⁷Dan woat eene Schlang aum Wajch sennen, een Otta aum Stich, dee doa de Pieed enne Hacken bit, un sien Ritta äwaridj felt.

¹⁸Opp diene Radinj lua ekj, Har!

¹⁹Gad, Reibaschoa woaren am drenjen, un hee, hee woat an oppe Hacken drenjen.

²⁰Von Aser kjemt Fatet, sien Broot; un hee, kjennichlichet scheenet Äten woat hee jäwen.

²¹Naftali es eene loosjelotne Herschkoo; hee, dee scheene Wieed moakt.

²²De Sän, een junga Fruchtboom, es Josef, de Sän von eenem Fruchtboom aune Kjwal; siene Asta klautre äwa de Mia.

²³Un daut reizen am un scheeten un bekjamfen am de Boagenkjamfa (Flitzboagenscheeta);

²⁴oba sien Boagen blieft faust, un stoakj sent de Oarms siene Henj derch de Henj Jakob siene Majchtje. Von doa häa es de Hoad, de Steen Israels:

²⁵Von dienem Voda sien Gott, un dee woat die halpen, un däm Aulmajchtjen, un hee woat die säajnen met Säajnungen vom Himmel bowen, met Säajnungen ut däm Deepen, dee unjen ligjen, met Säajnungen de Brosten un vom Muttalief.

²⁶De Säajnungen von dienem Voda äwatrafen de Säajnungen von miene Väaelren bat aune Jrensen de eewje Aunboajch (Welttiet Hechten). Dee woaren opp Josef sienem Haupt sennen un opp däm Schädel vom Ferscht unja siene Breeda.

²⁷Benjamin es een rietenda Wulf, Zemorjes veritt hee sien Raup, un Oppenowent vedeelt hee Raup.

²⁸Aul dise sent de 12 Stam Israels, un daut es daut, waut äa Voda to an räd un met waut hee an säajend; eenem jiedren no sienem Säajen säajend hee an.

²⁹Un hee befool an un säd to an: Ekj woa no mienem Volkj vesaumelt, soo begroft mie bie miene Vodasch enne Heel, dee opp däm Flekj Efraim, vom Hetita, es,

³⁰en de Heel, dee oppem Flekj Machpela ver Mamre es, em Launt Kanaan, daut Abraham met däm Flekj vom Efron, däm Hetita, toom Oawbejrafnis jekoft haud.

³¹Doa ha see Abraham begroft un siene Fru Sara; doa ha see Isaak begroft un siene Fru Rebekka; un doa ha ekj Lea begroft;

³²daut Flekj un de Heel, dee doa es, sent jekoft von de Kjinja Het.

³³Un aus Jakob toenj wia, siene Säns Befälen to jäwen, trock hee siene Feet oppem Bad un storf un wort too sienem Volkj vesaumelt.