Read De Bibel JHF 2. Samuel 1 Bible Online

2. Samuel 1 - De Bibel JHF bible

2. Samuel 1

¹Un daut passieed no Saul sienem Doot, aus David von de Schlacht de Amalekita trigjjekomen wia, doa bleef David twee Doag en Ziklag.

²Un daut passieed aum dredden Dach, kjikj, doa kaum een Maun ut Saul sienem Häaloaga, siene Kjleeda wieren veräten, un Ieed wia opp sienem Haupt; un aus hee no David kaum, foll hee oppe Ieed un schmeet sikj han.

³Un David säd to am: Wua häa kjeemst du? Un hee säd to am: Ekj sie ut däm Häaloaga Israels wajchjerant.

⁴Un David säd to am: Woo steit de Sach? berecht mie doch. Un hee säd: Daut Volkj es ut däm Striet jerant, un uk väle vom Volkj sent jefollen un jestorwen, un uk Saul un sien Sän Jonatan sent doot.

⁵Un David säd to däm Jinjlinkj, dee am daut säd: Woo häa weitst du, daut Saul un sien Sän Jonatan doot sent?

⁶Un de Jinjlinkj, dee am daut berecht, säd: Ekj kaum derch toofaul oppe Boaj Gilboa, un kjikj, Saul länd sikj opp sien Spies; un kjikj, de Woages un de Rittasch juagen hinja am häa.

⁷Un hee dreid sikj om un sach mie un roopt mie, un ekj säd: Hia sie ekj.

⁸Un hee säd to mie: Wäa best du? Un ekj säd to am: Ekj sie een Amalekita.

⁹Un hee säd to mie: Komm doch häa no mie un moak mie doot, dan de Doodeskraump haft mie jejräpen; dan mien Läwen es noch gaunz en mie!

¹⁰Doa kaum ekj no am un muak am doot, dan ekj wist, daut hee sienen Faul nich äwaläwen wudd. Un ekj neem de Kroon, dee opp sienem Haupt wia, un dän Oarmrinkj, dee aun sienem Oarm wia, un ha dee no mienem Harn hiahäa jebrocht.

¹¹Doa fot David siene Kjleeda un vereet dee; un aule Mana, dee bie am wieren, deeden krakjt soo.

¹²Un see kloagden un hielden un fausten bat Oppenowent om Saul un sienem Sän Jonatan un om daut Volkj Gottes un om daut Hus Israel, wiels see derch daut Schwieet jefollen wieren.

¹³Un David säd toom Jinjlinkj, dee am daut berecht: Wua häa best du? Un hee säd: Ekj sie de Sän von eenem amalekitischen Framdlinkj.

¹⁴Un David säd to am: Woo hast du die nich jeenjst, diene Haunt opptohäwen, om däm Jesaulwden Gottes too vedoawen?

¹⁵Un David roopt eenem von de Jinjlinje un säd: Komm häa, faul äwa am häa! Un hee brocht am om, un hee storf.

¹⁶Un David säd to am: Dien Bloot kjemt opp dien Haupt! Dan dien Mul haft jäajen die jezeicht un jerät: Ekj ha däm Jesaulwden Gottes omjebrocht.

¹⁷Un David stemmd dit Kloagleet äwa Saul aun un äwa Jonatan, sienem Sän;

¹⁸un hee befool, daut maun de Kjinja Juda daut Leet von däm Boagen lieed; kjikj, daut es em Buak Jaschar jeschräwen:

¹⁹De Stolt Israels, es opp diene Hechten jeschloagen! Woo sent de Helden jefollen!

²⁰Sajcht daut nich en Gat, vekjindicht de Bootschoft nich oppe Gaussen von Askalon, daut de Dajchta de Filista sikj nich freien, daut de Dajchta de Onbeschnädne nich froo sent!

²¹Boajch von Gilboa, nich Deiw noch Räajen opp junt fält, noch oppe Felda de Häwopfa! Dan doa woat daut Schild de Helden wajchjeschmäten, Saul sien Schild, aus wia daut nich met Eelj jesaulft.

²²Vom Bloot de Jeschloagne, vom Fat de Helden jinkj Jonatan sien Boagen nich trigj, un Saul sien Schwieet kaum nich ladich trigj.

²³Saul un Jonatan, de Jeleewde un Leeftolje en äarem Läwen, sent uk en äarem Doot nich jetrant; see wieren schwind aus Odla, stoakj aus Leiws.

²⁴Dajchta Israels, hielt om Saul, dee junt en Karmesin kjleed, dee goldnet Schmuck äwa june Kjleeda henjd!

²⁵Woo sent de Helden em Striet jefollen! Woo es Jonatan opp diene Hechten jeschloagen!

²⁶Mie deit daut om die wee, mien Brooda Jonatan! Du wieescht mie sea leeftolich; wundaboa wia mie diene Leew, mea aus ne Frues Leew!

²⁷Woo sent de Helden jefollen, un omjekomen de Striedboare em Kjampf!