Read De Bibel JHF 2. Samuel 10 Bible Online

2. Samuel 10 - De Bibel JHF bible

2. Samuel 10

¹Un nodäm passieed daut, doa storf de Kjennich äwa de Kjinja Amon; un Hanun, sien Sän, wort aun siene Städ Kjennich.

²Un David säd: Ekj well Goodet aun Hanun doonen, däm Sän Nahas, soo aus sien Voda Goodet aun mie jedonen haft. Un David schekjt han, om am derch siene Kjnajchts wäajen sienem Voda too treesten. Un David siene Kjnajchts kaumen en daut Launt de Kjinja Amon.

³Doa säden de Ferschten de Kjinja Amon too Hanun, äarem Harn: Eat woll David dienen Voda en diene Uagen, daut hee Treesta no die jeschekjt haft? Haft David nich siene Kjnajchts no die jeschekjt, om de Staut uttoforsche un to beseenen un to venichten?

⁴Doa naum Hanun David siene Kjnajchts un leet an de Halft vom Boat aufscheere un äare Bowakjleeda de Halft aufschnieden, bat aun äare Huck; un hee leet an gonen.

⁵Un maun säd David daut. Doa schekjt hee an entjäajen, dan de Mana schämden sikj sea; un de Kjennich leet an sajen: Blieft en Jericho, bat jun Boat jewossen es, dan komt trigj.

⁶Aus nu de Kjinja Amon sagen, daut see sikj bie David stinkjent jemoakt hauden, doa schekjten de Kjinja Amon han un bedden de Siera von Bat-Rehob un von Zoba, 20 000 Maun too Foot, un däm Kjennich von Maaka, 1 000 Maun, un de Mana von Tob, 12 000 Maun.

⁷Un aus David daut hieed, schekjt hee Joab han un daut gaunze Häa, de Helden.

⁸Un de Kjinja Amon jinjen ut un stalden sikj em Engank von Dooa en Schlachtordninj opp; un de Siera von Zoba un Rehob un de Mana von Tob un Maacha wieren fa sikj oppem Flekj.

⁹Un aus Joab sach, daut de Kaumf von väarenun von hinjen jäajen an jerecht wia, doa wäld hee von aule Uterwälde Israels un stald sikj opp, de Siera jäajenäwa;

¹⁰un daut äwaje Volkj äwajeef hee de Haunt von sienem Brooda Abisai, un disa stald sikj opp, de Kjinja Amon jäajenäwa.

¹¹Un hee säd: Wan de Siera mie too stoakj sent, soo saust du mie too Help komen; un wan de Kjinja Amon die too stoakj sent, soo well ekj komen, om die too halpen.

¹²Sie stoakj un lot ons fa ons Volkj stoakj sennen un fa de Städa von onsem Gott! Un de Har woat doonen, waut en siene Uagen goot es.

¹³Doa jinkj Joab un daut Volkj daut bie am wia, väa toom Kaumf jäajen de Siera; un see randen ver am.

¹⁴Un aus de Kjinja Amon sagen, daut de Siera wajch jerant wieren, doa randen uk see ver Abisai un jinjen trigj enne Staut. Un Joab kaum von de Kjinja Amon trigj un kaum no Jerusalem.

¹⁵Un aus de Siera sagen, daut see von Israel jeschloagen wieren, doa vesaumelden see sikj aula toop.

¹⁶Un Hadadesa schekjt han un leet de Siera utgonen, dee aun jane Sied vom Stroom wieren; un see kaumen no Helam, un Schobak, Hadadesa sien Häabowaschta, ver an häa.

¹⁷Un daut wort David berecht; doa vesaumeld hee gaunz Israel un jinkj äwa däm Jordan un kaum no Helam; un de Siera stalden sikj David jäajenäwa opp un kjamften met am.

¹⁸Un de Siera randen ver Israel, un David schluach von de Siera 700 Woages un 40 000 Rittasch; un hee schluach Schobak, äarem Häabowaschten, un hee storf doa selfst.

¹⁹Un aus aule Kjennichs, de Kjnajchts von Hadadesa wieren, sagen, daut see von Israel jeschloagen wieren, doa muaken see Fräd met Israel un deenden an. Un de Siera enjsten sikj, de Kjinja Amon wiedahan too halpen.