Read De Bibel JHF 2. Samuel 13 Bible Online

2. Samuel 13 - De Bibel JHF bible

2. Samuel 13

¹Un nodäm passieed daut: Absalom, David sien Sän, haud eene scheene Sesta, äa Nomen wia Tamar; un Amnon, David sien Sän, leewd ar.

²Un däm Amnon deed daut om siene Sesta wee, toom Krank woaren; dan see wia eene Junkfru, un daut wia en Amnon siene Uagen ommäajlich, ar daut Jerinjste aun todoonen.

³Un Amnon haud eenen Frint, sien Nomen wia Jonadab, Schimea sien Sän, von David sienem Brooda; un Jonadab wia een sea kluaka Maun.

⁴Un hee säd to am: Wuarom best du soo doljeschloagen, Kjennichssän, Morjen fa Morjen? West du mie daut nich sajen? Un Amnon säd to am: Ekj leew Tamar, de Sesta von mienem Brooda Absalom.

⁵Un Jonadab säd to am: Laj die opp dien Loaga un stal die krank aun; un wan dien Voda kjemt, om die to seenen, soo saj to am: Lot doch miene Sesta Tamar komen un mie Äten brinjen, un ver miene Uagen daut Äten reedmoaken, doamet ekj tookjikj un ut äare Haunt ät.

⁶Un Amnon läd sikj un stald sikj krank aun. Un aus de Kjennich kaum, om am to seenen, doa säd Amnon toom Kjennich: Lot doch miene Sesta Tamar komen un ver miene Uagen 2 Kuaken reedmoaken, daut ekj ut äare Haunt ät.

⁷Doa schekjt David no Tamar em Hus un leet sajen: Go doch en daut Hus von dienem Brooda Amnon un moak am daut Äten reed.

⁸Un Tamar jinkj en daut Hus von äarem Brooda Amnon; oba hee lach em Bad. Un see neem een Dieech un kjneed am, un muak ver siene Uagen Kuaken un backt de Kuaken.

⁹Un see neem de Paun un schedd de ver am ut. Oba hee wäad sikj to äten. Un Amnon säd: Lot aule von mie rutgonen! Un aula jinjen rut.

¹⁰Doa säd Amnon too Tamar: Brinj daut Äten enne bennaschte Stow, daut ekj von diene Haunt ät. Un Tamar neem de Kuak, dee see reedjemoakt haud, un brocht dee äarem Brooda Amnon enne bennaschte Stow.

¹¹Un aus see am daut Äten hanrieekjt, doa jreep hee ar un säd to ar: Komm, ligj bie mie, miene Sesta!

¹²Un see säd to am: Ne, mien Brooda! Nemm mie nich de Iea, dan aulsoo deit maun nich en Israel; doo nich dise Schaunddot!

¹³Un ekj, wuahan saul ekj miene Schaund droagen? Un du, du woascht aus eena de Schentelje en Israel sennen. Un nu räd doch toom Kjennich, dan hee woat mie die nich aufsajen.

¹⁴Oba hee wull nich opp äare Stemm hieren; un hee äwawaultijd ar un neem ar de Iea un schleep bie ar.

¹⁵Un Amnon haust ar met eenem groote Hauss; dan de Hauss, met waut hee ar haust, wia jrata aus de Leew, met waut hee ar jeleeft haud. Un Amnon säd to ar: Sto opp, go!

¹⁶Un see säd to am: Daut jeft kjeene Uasoak to disem Iebel, mie wajch too joagen, daut jrata es aus daut aundre, daut du mie aunjedonen hast. Oba hee wull nich opp ar hieren.

¹⁷Un hee roopt sienem Jung, sienem Deena, un säd: Joag dise doch rut, von mie wajch, un veschlut de Däa hinja ar!

¹⁸Oba see druach een langet Kjleet; dan aulsoo wieren de Kjennichsdajchta, de Junkfrues, met Kjleeda jekjleet. Un sien Deena fieed ar rut un veschloot de Däa hinja ar.

¹⁹Doa naum Tamar Ausch opp äa Haupt un vereet daut lange Kjleet, daut see aunhaud, un see läd äare Henj opp äa Haupt un jinkj schrijend doavon.

²⁰Un äa Brooda Absalom säd to ar: Es dien Brooda Amnon bie die jewast? Nu, miene Sesta, sie stell, hee es dien Brooda, neem die dise Sach nich too Hoaten! Doa bleef Tamar, un zwoa eensom, em Hus von äarem Brooda Absalom.

²¹Un de Kjennich David hieed aul dise Dinj, un hee wort sea oajalich.

²²Un Absalom räd met Amnon nich Beeset noch Goodet; dan Absalom haust Amnon, doarom daut hee siene Sesta Tamar vejewaulticht haud.

²³Un no 2 vollen Joa passieed daut, doa haud Absalom Schop Schäara en Baal-Hazor, daut bie Efraim licht; un Absalom lod aule Kjennichssäns en.

²⁴Un Absalom kaum nom Kjennich un säd: Kjikj doch, dien Kjnajcht haft de Schop Schäara; daut jeit doch de Kjennich met siene Kjnajchts met dienem Kjnajcht.

²⁵Oba de Kjennich säd to Absalom: Nich doch, mien Sän! Lot ons doch nich aula toop gonen, daut wie die nich too schwoa woaren. Un hee jinkj en am; oba hee wull nich gonen, un hee säajend am.

²⁶Doa säd Absalom: Wan nich, soo lot doch mienem Brooda Amnon met ons gonen! Un de Kjennich säd to am: Wuarom saul hee met die gonen?

²⁷Oba Absalom drung en am; doa leet hee Amnon un aule Kjennichssäns met am gonen.

²⁸Un Absalom befool sienem Kjnajcht un säd: Kjikj too, wan Amnon von Hoaten vom Wien froo woat, un ekj to junt saj: Schlot Amnon! Soo brinjt am om, enjst junt nich! Sie ekj daut nich de junt daut befoolen haft? Siet stoakj un siet brow!

²⁹Un Absalom siene Jinjlinje deeden däm Amnon, soo aus Absalom befoolen haud. Doa stunden de Kjennichssäns opp un een jiedra sad sikj opp sien Multia un rand.

³⁰Un daut passieed, aus see noch oppem Wajch wieren, doa kaum daut Jeräd no David, endäm maun säd: Absalom haft aule Kjennichssäns omjebrocht, un nich eena von an es äwajebläwen.

³¹Doa stunt de Kjennich opp un vereet siene Kjleeda un läd sikj oppe Ieed; un aul siene Kjnajchts stunden doa met verätne Kjleeda.

³²Doa hoof Jonadab, de Sän von Schimea, von David sienem Brooda, aun un säd: Mien Har denkj nich, daut aule Jinjlinje, de Kjennichssäns, doot sent; dan Amnon auleen es doot; dan nom Väahaben von Absalom wia daut vom ieeschten Dach aun faust, doa hee siene Sesta Tamar vejewaulticht haud.

³³Un nu nemm mien Har, de Kjennich, de Sach nich too Hoaten, daut hee sajcht: Aule Kjennichssäns sent doot; sonda Amnon auleen es doot.

³⁴Un Absalom rand wajch. Un de Jinjlinkj, de Wajchta, hoof siene Uagen un sach: Un kjikj, väl Volkj kaum oppem Wajch hinja am, vonne Boajchsied.

³⁵Doa säd Jonadab toom Kjennich: Kjikj, de Kjennichssäns komen; aus dien Kjnajcht jesajcht haft, aulsoo es daut passieet.

³⁶Un daut passieed, soo aus hee utjeräd haud, kjikj, doa kaumen de Kjennichssäns un hoowen äare Stemm un hielden; un uk de Kjennich un aul siene Kjnajchts hielden sea.

³⁷Oba Absalom rand wajch un jinkj no Talmai, däm Sän von Ammihur, däm Kjennich von Gesur. Un David truad om sienen Sän aule Doag.

³⁸Oba Absalom rand wajch un jinkj no Gesur; un hee wia doa selfst dree Joa.

³⁹Un de Kjennich David hieed opp, no Absalom uttogonen; dan hee haud sikj äwa Amnon jetreest, daut hee doot wia.