Read De Bibel JHF 2. Samuel 17 Bible Online

2. Samuel 17 - De Bibel JHF bible

2. Samuel 17

¹Un Ahitofel säd to Absalom: Lot mie 12 000 Maun utläsen, un mie oppmoaken un dise Nacht David nojoagen;

²un ekj woa äwa am komen, wiels hee meed un schlaup aune Henj es, un am en Schrakj vesaten; un aulet Volkj, daut bie am es, woat ranen, un ekj woa däm Kjennich auleen schlonen;

³un soo woa ekj aulet Volkj no die trigj brinjen. Wan sikj aula von däm Maun aufdreien, däm du sieekjst; daut gaunze Volkj woat en Fräd sennen.

⁴Un daut Wuat wia en Absalom siene Uagen goot un enne Uagen von aule Eltestasch Israels.

⁵Un Absalom säd: Roop uk Husai, däm Arkita, daut wie uk hieren waut hee sajcht.

⁶Un Husai kaum no Absalom; un Absalom räd to am un säd: No disem Wuat haft Ahitofel jerät; sell wie sien Rot utfieren? Wan nich, soo räd du!

⁷Doa säd Husai too Absalom: De Rot es nich goot, däm Ahitofel ditmol jejäft haft.

⁸Un Husai säd: Du kjanst doch dienen Voda un de Mana, daut see Helden, un daut see vebettade Jemieda sent, aus eene däa äare Junge beroowde Boaremutta oppe Stap; un dien Voda es een Kjrichsmaun: Hee woat nich biem Volkj äwanachten.

⁹Kjikj, hee haft sikj nu en irjent eene Schlucht ooda sest aun eenem Uat vestoaken. Un daut woat passieren, wan aum Aunfank atelje unja an faulen, soo woat jiedra, dee daut hieet, sajen: Daut es daut Volkj jeschloagen worden, daut Absalom nofolcht!

¹⁰Un es hee nich een deaja Maun, sien Hoat es aus een Leiwshoat, soo woat hee secha vezoagen; dan gaunz Israel weet, daut dien Voda een Held es, un dee bie am deaje Mana sent.

¹¹Sonda ekj rod: Daut woat gaunz Israel no die vesaumelt, von Dan bat Beerscheba, aus de Saunt aum Mäa es, aun Menj; un diene Persoon jeit met em Kaumf.

¹²Un wie woaren äwa am komen aun eenem de Städen, wua hee sikj opphelt, un ons opp am raufloten, aus de Deiw oppe Ieed fält; un daut woat von am un von aul de Mana, dee bie am sent, uk nich eena äwabliewen.

¹³Un wan hee sikj en eene Staut trigjtrakjt, soo saul gaunz Israel Strenj aun jane Staut lajen, un wie schlapen ar aun däm Bach, bat doa nich een Steenkje jefungen woat.

¹⁴Un Absalom un aule Mana von Israel säden: De Rot Husai, vom Arkita, es bäta aus Ahitofel sien Rot. Oba de Har haft daut soo befoolen, om däm gooden Rot von Ahitofel tonicht to moaken, doamet de Har daut Onjlekj äwa Absalom brocht.

¹⁵Un Husai säd to Zadok un to Abjatar, de Priesta: Soo un soo haft Ahitofel däm Absalom un de Eltestasch von Israel jerode, un soo un soo ha ekj jerode.

¹⁶Soo schekj schwind han un berecht David un sajcht: Äwanacht dise Nacht nich enne Wiesteläacht, sonda go schwind äwa, doamet nich de Kjennich un aulet Volkj, daut bie am es, veschlungen woat.

¹⁷Oba Jonatan, un Achimaaz stunden aune Rogel-Tjwal; (un eene Deenstmejal jinkj han un berecht an, un see jinjen han un berechten däm Kjennich David; dan see sullen sikj nich seenen loten, endäm see enne Staut kaume).

¹⁸Un een Jung sach an un berecht daut Absalom. Doa jinjen see beid schwind un kaumen en daut Hus von eenem Maun en Bachurim; dee haud eenen Borm en sienem Hoff, un see stieejen doa nenn.

¹⁹Un de Fru neem eene Dakj un spreed de äwa däm Borm, un streid Jrett doaräwa ut, soo daut maun nuscht moakjt.

²⁰Un Absalom siene Kjnajchts kaumen no de Fru em Hus un säden: Woa sent Achimaaz un Jonatan? Un de Fru säd to an: See sent äwa däm Bach jegonen. Un see sochten, oba see fungen nuscht, un jinjen trigj no Jerusalem.

²¹Un daut passieed, nodäm see wajchjegonen wieren, doa stieejen see ut däm Borm nopp un jinjen han un berechten dän Kjennich David; un see säden to David: Moakt junt opp un got schwind äwa daut Wota, dan soo haft Ahitofel jäajen junt jerät.

²²Doa muak David sikj opp, un aulet Volkj, daut bie am wia, un see jinjen äwa dän Jordan; bat daut zemorjes dach wort, wia uk nich eena veloaren jegonen, dee nich äwa dän Jordan jegonen wia.

²³Oba aus Ahitofel sach, daut sien Rot nich utjefieet wort, sodeld hee sienen Äsel un muak sikj opp un jinkj no sienem Hus, no siene Staut; un hee bestald sien Hus un henjd sikj opp; un hee storf un wort em Grauf siene Vodasch begroft.

²⁴Un David kaum no Machanaim; un Absalom jinkj äwa däm Jordan, hee un aule Mana von Israel met am.

²⁵Un Absalom sad Amasa aun Joab siene Städ äwa daut Häa. Oba Amasa wia de Sän von eenem Maun, däm sien Nomen wia Jitra, de Israelit, dee no Abigajil enjegonen wia, de Dochta von Nahas, de Sesta von Zeruja, de Mutta von Joab.

²⁶Un Israel un Absalom loagaden sikj em Launt Gilead.

²⁷Un daut passieed, aus David no Mahanajim kaum, doa brocht Schobi, de Sän von Nahas, ut Rabba de Kjinja Amon, un Makir, de Sän von Ammiel, ut Lodebar, un Barsillai, de Gileadita, ut Rogelim,

²⁸Baden un Kommen un Jescherr un Weit un Joascht un Mäl un jereeschte Kjieena un Schaublen un Lensen un doavon Jereeschtet

²⁹un Honnich un Botta un Kjlienvee un Kookjees no David un nom Volkj, daut bie am wia, daut see auten; dan see säden: Daut Volkj es hungrich un meed un darschtich enne Wieste.