Read De Bibel JHF 2. Samuel 20 Bible Online

2. Samuel 20 - De Bibel JHF bible

2. Samuel 20

¹Un doa wia een Belials Maun, sien Nomen wia Scheba, Bichri sien Sän, een Benjaminita; un hee blosd enne Posaun un säd: Wie ha kjeen Deel aun David un kjeen Oawdeel aun däm Sän Isai! Een jiedra go no sienem Zelt, Israel!

²Doa jinjen aule Mana von Israel von David wajch, Scheba, däm Sän Bikris, hinjaraun. Oba de Mana von Juda bleewen bie äarem Kjennich, vom Jordan bat Jerusalem.

³Un David kaum no sienem Hus, no Jerusalem. Un de Kjennich neem de 10 Näbenfrues, dee hee trigjjeloten haud, om daut Hus too bewoaken, un deed an oppoat en een Hus, un vesorjd an; oba hee jinkj nich no an en; un see wieren enjeschloten bat äarem Doodesdach, un läwden aus Wätfrues.

⁴Un de Kjennich säd to Amasa: Roop mie de Mana von Juda toom dredden Dach, un stal die selfst hia han.

⁵Un Amasa jinkj han, Juda to roopen; oba hee vetrock daut äwa de bestemde Tiet, dee hee am bestemt haud.

⁶Doa säd David too Abisai: Nu woat ons Scheba, Bikris sien Sän, mea Iebel doonen aus Absalom. Nemm du dee, dienem Harn siene Kjnajchts un joag am no, daut hee nich fauste Städa fa sikj jewent un soo ut onse Uagen wajchrant.

⁷Doa jinjen Joab siene Mana ut, am hinjaraun, un de Keretita un de Peletita un aul de Helden; un see jinjen von Jerusalem ut, om Scheba, Bikris sienem Sän, hinjaraun too joagen.

⁸See wieren biem groote Steen, dee bie Gibeon es, doa kaum Amasa an entjäajen. Un Joab wia met sienem Jewäarock aus met sienem Kjleet bekjleet, un doaräwa wia de Jirtel met daut Schwieet, daut en siene Schajcht aun siene Lenden faust jemoakt wia; un aus hee väakaum, foll daut rut.

⁹Un Joab säd to Amasa: Jeit die daut goot, mien Brooda? Un Joab pakt met de rajchte Haunt Amasa sienen Boat, om am to kussen.

¹⁰Oba Amasa acht nich opp daut Schwieet, daut en Joab siene Haunt wia; un Joab schluach am doamet em Buck un schedd sien Ennaschte ut, oppe Ieed, un jeef am kjeenen tweeden Schlach; un hee storf. Oba Joab un Abisai, sien Brooda, juagen Scheba, Bikris sienem Sän, no.

¹¹Un een Maun von Joab siene Deena bleef bie Amasa stonen un säd: Wäa Joab leew haft un wäa fa David es, dee folj Joab no.

¹²Oba Amasa wälsd sikj em Bloot medden oppe Gauss; un aus de Maun sach, daut aulet Volkj stonen bleef, schauft hee Amasa vonne Gauss oppem Flekj un schmeet een Bowakjleet äwa am, doa hee sach, daut jiedra, dee no am noda kaum, stonen bleef.

¹³Aus hee vonne Gauss wajch jeschauft wia jinjen aula vebie, hinja Joab, om Scheba, Bikris sienem Sän notojoagen.

¹⁴Un see jinjen derch aule Stam Israels bat no Abel un Bat-Maaka un gaunz Berim; un see vesaumelden sikj un kaumen am hinjaraun.

¹⁵Un see kaumen un beloagaden am en Abel-Bat-Maaka, un see schedden eenen Waul jäajen de Staut opp, bat aun de väaschte Mia; un aulet Volkj, daut met Joab wia, neemen de Mia un wullen dee dolrieten.

¹⁶Doa roopt eene kluake Fru ut de Staut: Hieet, hieet! Sajcht doch too Joab: Komm hiahäa, daut ekj to die räd!

¹⁷Un hee kaum noda no ar. Un de Fru säd: Best du Joab? Un hee säd: Ekj sie et. Un see säd to am: Hea de Wieed von diene Deenstmejal! Un hee säd: Ekj hia.

¹⁸Un see räd un säd. Ver Tieden räd maun un säd: Maun frajcht blooss en Abel; un soo wia maun foadich.

¹⁹Ekj sie eene von de Frädsaume, de True Israels; du sieekjst eene Staut un Mutta en Israel omtobrinjen. Wuarom west du daut Oawdeel Gottes vedoawen?

²⁰Un Joab auntwuad un säd: Daut es wiet, wiet es daut von mie, daut ekj venicht un daut ekj vedoawen sull! De Sach es nich aulsoo;

²¹sonda een Maun vonne Boaj Efraim, sien Nomen es Scheba, Bikris sien Sän, haft siene Haunt jäajen däm Kjennich, jäajen David, oppjehowen; am auleen jeft rut, soo well ekj vonne Staut wajch gonen. Un de Fru säd to Joab: Kjikj, sien Kopp saul die äwa de Mia jeschmäten woaren.

²²Un de Fru kaum nom gaunzen Volkj met äare Weisheit; un see hakte Scheba, Bikris sienem Sän, däm Kopp auf un schmeeten däm Joab han. Un hee blosd enne Posaun, un see vestreide sikj von de Staut, een jiedra no sienem Zelt; un Joab jinkj nom Kjennich no Jerusalem trigj.

²³Un Joab wia äwa daut gaunze Häa Israels; un Benaja, Jojada sien Sän, wia äwa de Keretita un äwa de Peletita;

²⁴un Adoram wia äwa de Opploag; un Josafat, Ahilud sien Sän, wia Jeschicht Schriewa;

²⁵un Scheja wia Schriewa, un Zadok un Abjatar wieren Priesta;

²⁶un uk Ira, de Jairita, wia David sien Priesta.