Read De Bibel JHF 2. Samuel 23 Bible Online

2. Samuel 23 - De Bibel JHF bible

2. Samuel 23

¹Un dit sent David siene latste Wieed: Daut säd David, Isai sien Sän, un daut räd de huach jestalda Maun, de Jesaulwda von Jakob sienem Gott un de Leeftolja em Jesank Israels:

²De Jeist Gottes haft derch mie jerät, un sien Wuat wia opp miene Tung.

³Daut haft de Gott Israels jerät, de Fels Israels haft to mie jerät: Een Harscha unja de Menschen, jerajcht, een Harscha enne Forcht Gottes;

⁴un hee woat aus daut Morjenlicht sennen, wan de Sonn oppjeit, een Morjen onen Wolkjen: Von äarem Glauns nom Räajen waust daut Jreens ut de Ieed.

⁵Es mien Hus dan nich faust bie Gott? Soo haft hee doch eenen eewjen Bunt met mie jeschloten, en aulem enjerecht un vestoaken; dan daut es aul miene Radinj un aul mien Wensch, sull hee daut nich waussen loten?

⁶Oba de Säns Belial sent aula toop aus Hachels, dee maun wajch schmitt; dan met de Haunt fot maun dee nich aun;

⁷un de Maun, dee an aunschieet, nemt Iesa un eene Spiessstang enne Haunt; un met Fia woat see jenslich vebrennen aun äare Städ.

⁸Dit sent de Nomes de Helden, dee David haud: Joscheb-Baschebet, de Tachkemonita, daut Haupt de Aunfiera; hee, Adino, de Eznita, wia jäajen 800, dee hee opp eenmol schluach.

⁹Un no am Eleasar, Dodo sien Sän, de Sän von eenem Achochita; hee wia unja de dree Helden met David, aus see de Filista vespotten, dee doa toom Kaumf vesaumeld wieren, un aus de Mana von Israel wajchjinjen.

¹⁰Hee muak sikj opp un schluach unja de Filista, bat siene Haunt meed wort un aum Schwieet faust jebackt wia; un de Har schauft aun janem Dach eene groote Radinj. Oba daut Volkj dreid om, hinja am häa, blooss om to plindre.

¹¹Un no am Schamma, Ages sien Sän, de Hararita. Un de Filista vesaumelden sikj to eene Schoa; un daut wia doa een Akastekj voll Lensen; oba daut Volkj rand fa de Filista.

¹²Doa stald hee sikj medden oppem Feldstekj un rad daut un schluach de Filista; un de Har schauft eene groote Radinj.

¹³Un 3 von dee 30 Heipta jinjen rauf un kaumen too Arnttiet no David, enne Heel Adullam; un eene Schoa de Filista loagaden enne Läacht Refaim.

¹⁴Oba David wia enne Boajch Fastinj, un eene Grupp Filista wia doa noch en Betlehem.

¹⁵Un David haud een Velangen (Janka) un säd: Wäa woat mie Wota to drinkjen jäwen ut däm Borm von Betlehem, dee aum Dooa es?

¹⁶Doa bruaken de dree Helden derch daut Loaga de Filista un schapte Wota ut däm Borm von Betlehem, dee aum Dooa es, un druagen daut un brochten daut no David. Oba hee wull daut nich drinkjen un goot daut aus Drinkjopfa ver däm Harn ut;

¹⁷un hee säd: Daut es wiet von mie, Har, daut ekj soowaut doo! Sull ekj daut Bloot de Mana drinkjen, dee en Läwensjefoa hanjegonen sent? Un hee wull daut nich drinkjen. Daut deeden dee 3 Helden.

¹⁸Un Abisai, Joab sien Brooda, de Sän von Zeruja, wia daut Haupt dee 3. Un hee trock sien Spies äwa 300, dee hee schluach; un hee haud eenen Nomen unja dee 3.

¹⁹Wia hee ver dee 3 nich jeieet, soo daut hee äa Bowaschta wort? Oba aun de Ieeschte 3 kaum hee nich.

²⁰Un Benaja, Jojada sien Sän, de Sän von eenem browen Maun, groot aun Doten, von Kabzeel, hee schluach 2 Leiws [Helden] von Moab. Un hee jinkj rauf un schluach däm Leiw enne Kul aun eenem Schneedach.

²¹Un hee wia daut, dee eenen ägiptischen Maun schluach, eenen stoakjen Maun. Un de Ägipta haud een Spies en siene Haunt; oba hee jinkj no am rauf met eenem Stock, un reet däm Ägipta däm Spies ut de Haunt un muak am met sienem Spies doot.

²²Daut deed Benaja, Jojada sien Sän; un hee haud eenen Nomen unja dee 3 Helden.

²³Ver dee 30 wia hee jeieet, oba aun de Ieeschte 3 kaum hee nich. Un David sad am en sienem jeheimen Rot.

²⁴Asael, Joab sien Brooda, wia unja dee 30; Elchanan, Dodo sien Sän, von Betlehem;

²⁵Schamma, de Harodita; Elika, de Harodita;

²⁶Helez, de Paltita; Ira, Ikkesch sien Sän, de Tekoita;

²⁷Abiesa, de Anatotita; Mebunnai, de Huschatita;

²⁸Zalmon, de Achochita; Maharai, de Netofatita;

²⁹Heleb, Baana sien Sän, de Netofatita; Ittai, Ribai sien Sän, von Gibea de Kjinja Benjamin;

³⁰Benaja, de Pirhatonita; Hiddai, von Nachale-Gaas;

³¹Abi-Albon, de Arbatita; Asmawet, de Barchumita;

³²Eljachba, de Schaalbonita; von de Säns Bne-Jaschen; Jonatan;

³³Schamma, de Hararita; Achiam, Scharar sien Sän, de Ararita;

³⁴Elifelet, Achasbai sien Sän, de Sän von Maakatita; Eliam, Ahitofel sien Sän, de Gilonita:

³⁵Hezrai, de Karmelita, Paarai, de Arbita;

³⁶Jigal, Nathan sien Sän, von Zoba; Bani, de Gadita;

³⁷Zelek, de Amonita; Nacharai, de Beerotita, Joab sien Jewäadroaga, Zeruja sienem Sän;

³⁸Ira, de Jitrita; Gareb, de Jitrita;

³⁹Uria, de Hetita: En aulem 37.