Read De Bibel JHF 2. Samuel 24 Bible Online

2. Samuel 24 - De Bibel JHF bible

2. Samuel 24

¹Un de Oaja Gottes flaumd wada jäajen Israel opp; un hee reizt David jäajen an, endäm hee säd: Go han, tall Israel un Juda!

²Doa säd de Kjennich too Joab, Häabowaschten, dee bie am wia: Go doch derch de Stam Israels, von Dan bat Beerscheba, un mosta daut Volkj, doamet ekj de Volkjszol weet.

³Un Joab säd toom Kjennich: Daut mucht de Har, dien Gott, to däm Volkj, soo väl see uk sent, 100 Mol soo väl doatodoonen, daut de Uagen von mienem Harn, däm Kjennich, daut seenen! Oba wuarom haft mien Har, de Kjennich, Jefaulen aun dise Sach?

⁴Oba daut Kjennichswuat bleef faust jäajen Joab un jäajen de Bowaschte vom Häa. Un Joab un de Bowaschte vom Häa jinjen ut ver däm Kjennich, om daut Volkj Israel too mostren.

⁵Un see jinjen äwa däm Jordan un loagaden sikj en Aroer, rajchtsch von de Staut, dee medden enne Bachläacht von Gad licht, un no Jaser han.

⁶Un see kaumen no Gilead un en daut Launt Tachtim-Hodschi; un see kaumen no Dan-Jaan un en de Jäajent von Sidon;

⁷un see kaumen no de fauste Staut Tierus un no aule Städa de Hewita un de Kanaanita; un see jinjen rut nom Sieden von Juda no Beerscheba.

⁸Un see jinjen omhäa derch daut gaunze Launt, un kaumen aum Enj von 9 Moonat un 20 Doag trigj no Jerusalem.

⁹Un Joab jeef de Zol vom jemostaden Volkj däm Kjennich aun; un daut wieren en Israel 800 000 Kjrichsmana, dee daut Schwieet trocken, un de Mana von Juda 500 000 Maun.

¹⁰Oba David schluach daut Hoat, nodäm hee daut Volkj jetalt haud; un David säd toom Harn: Ekj ha sea jesindicht en däm, waut ekj jedonen ha; un nu, Har, lot doch dienem Kjnajcht siene Ojjerajchtichkjeit vebiegonen, dan ekj ha sea onbedocht jehaundelt!

¹¹Un aus David Zemorjes oppstunt, doa wia daut Wuat Gottes too Gad, däm Profeet, David sienem Seena, endäm hee säd:

¹²Go han un räd too David: Soo sajcht de Har: 3 Dinj laj ekj die väa; wäl die eent doavon, daut ekj die daut doo.

¹³Un Gad kaum no David un säd am daut un räd to am: Sellen die 7 Hungaschjoaren en dien Launt komen? Ooda west du 3 Moonat ver diene Fiend ranen, endäm see die vefoljen? Ooda saul dree Doag eene Past en dienem Launt sennen? Nu weet un kjikj, waut vere Auntwuat ekj däm trigjbrinjen saul, dee mie jeschekjt haft.

¹⁴Un David säd to Gad: Mie es sea Angst! Mucht wie doch enne Henj Gottes faulen, dan sien Erboarmen es groot; oba lot mie nich enne Menschenhenj faulen!

¹⁵Doa schekjt de Har eene Past unja Israel, von Zemorjes aun bat to bestemde Tiet; un daut storwen vom Volkj, von Dan bat Beerscheba, 70 000 Maun.

¹⁶Un aus de Enjel siene Haunt äwa Jerusalem utstrakjt, om daut to vedoawen, doa deed däm Harn daut Iebel leet, un hee säd toom Enjel, dee unja däm Volkj vedoawd: Jenuach! Trakj diene Haunt trigj. Oba de Enjel Gottes wia bie de Draschdäl Arawna, däm Jebusita.

¹⁷Un aus David däm Enjel sach, dee unjrem Volkj schluach, räd hee toom Harn un säd. Kjikj, ekj ha jesindicht, un ekj ha vekjieet jehaundelt; oba dise Schop, waut ha see jedonen? Daut es doch diene Haunt jäajen mie, un jäajen mienem Vodahus!

¹⁸Un Gad kaum no David aun janem Dach un säd to am. Go nopp, recht däm Harn eenen Aultoa oppe Draschdäl Arawna, vom Jebusita, opp.

¹⁹Doa jinkj David nopp, no Gad sienem Wuat, soo aus de Har befoolen haud.

²⁰Un Arawna kjikjt han un sach däm Kjennich un siene Kjnajchts no am äwakomen; doa jinkj Arawna rut venäjd sikj ver däm Kjennich, met sienem Aunjesecht bat oppe Ieed.

²¹Un Arawna säd: Wuarom kjemt mien Har, de Kjennich, no sienem Kjnajcht? Un David säd: De Draschdäl von die to kjeepen, om däm Harn eenen Aultoa too buen, doamet de Ploag von däm Volkj aufjedonen woat.

²²Doa säd Arawna too David: Mien Har, de Kjennich, nemm un opfa, waut en diene Uagen goot es; kjikj, de Rinda sent toom Brauntopfa, un de Draschwoages, un daut Jereetschoft de Rinda, too Holt:

²³Daut aules, oo Kjennich, jeft Arawna däm Kjennich. Un Arawna säd toom Kjennich: De Har, dien Gott, es die jnädich!

²⁴Oba de Kjennich säd to Arawna. Ne, sonda kjeepen well ekj daut von die, fa eenem Pries, un ekj well däm Harn, mienem Gott, nich emsonst Brauntopfa opfren. Un David koft de Draschdäl un de Rinda fa 50 Schekel Selwa.

²⁵Un David bud doa selfst däm Harn eenen Aultoa, un opfad Brauntopfa un Dankopfa. Un de Har erboarmd sikj om daut Launt, un de Ploag wort von Israel aufjeweat.