Read De Bibel JHF 2. Samuel 4 Bible Online

2. Samuel 4 - De Bibel JHF bible

2. Samuel 4

¹Un aus Saul sien Sän hieed, daut Abner en Hebron jestorwen wia, doa worden siene Henj schlaup, un gaunz Israel wia truarich.

²Un 2 Mana wieren Schoa Bowaschte von Saul sienem Sän, de Nomen von däm eenen wia Baana, un de Nomen vom aundren Rechab, Säns Rimmon, vom Beerotita, von de Kjinja Benjamin. Dan uk Beerot wort too Benjamin jeräakjent;

³oba de Beerotita randen no Gittaim un ha sikj doa aus Framde oppjehoolen bat opp disem Dach.

⁴Un Jonatan, Saul sien Sän, haud eenen Sän, dee aun beid Feet lom wia. Hee wia fief Joa oolt, aus de Norecht von Saul un Jonatan ut Jesreel kaum; doa naum siene Kjinjamejal am un rand wajch. Un daut passieed, aus see sikj spood un rand, doabie foll hee un wort lom; un sien Nomen wia Mefiboseth.

⁵Un de Säns Rimmon, vom Beerotita, Rechab un Baana, jinjen han un kaumen om de Meddachstiet en Isboseth sienem Hus, aus hee sienen Meddachsschlop hilt.

⁶Un see kaumen doahan, bat em bennaschten Hus, aus wan see Weit holen wullen, un see stuaken am em Buck. Un Rechab un sien Brooda Baana randen wajch.

⁷See kaumen en sien Hus, aus hee en siene Schlopstow opp sienem Bad lach, un see stuaken am un brochten am om un hakte am däm Kopp auf; un see naumen sienem Kopp un jinjen wajch - de gaunze Nacht derch de Läacht.

⁸Un see brochten däm Kopp von Isboseth no David en Hebron un säden toom Kjennich: Kjikj doa, de Kopp von Isboseth, Saul sienem Sän, dienem Fiend, dee no dienem Läwen tracht; un soo haft de Har mienem Harn, däm Kjennich, aun disem Dach aun Saul Rach veschauft un aun sienem Somen.

⁹Doa auntwuad David däm Rechab un Baana, sienem Brooda, de Säns Rimmon, däm Beerotita, un säd to an: Soo woa de Har läft, dee miene Seel ut aule Bedrenkjnisen erleest haft,

¹⁰däm, dee mie berecht un säd: Kjikj, Saul es doot! Un dee en siene Uagen een gooda Boote wia, däm pakt ekj un muak am en Ziklag doot, om am soo Bootenloon to jäwen;

¹¹wooväl mea, doa gottloose Mana eenen jerajchten Maun en sienem Hus opp sienem Loaga omjebrocht ha, sull ekj nu nich sien Bloot von june Henj fodren un junt vonne Ieed wajchschaufen.

¹²Un David befool siene Kjnajchts, un see brochten an om un hakte an de Henj un Feet auf, un henjde an aum Läch bie Hebron opp; oba daut Haupt von Isboseth naumen see un begrowen daut en Abner sienem Grauf en Hebron.