Read De Bibel JHF 2. Samuel 5 Bible Online

2. Samuel 5 - De Bibel JHF bible

2. Samuel 5

¹Un aule Stam Israels kaumen no David en Hebron, un see säden: Kjikj, wie sent dien Knoaken un dien Fleesch.

²Aul emma, aus Saul Kjennich äwa ons wia, best du daut jewast, dee Israel ut- un en fieed; un de Har haft to die jesajcht: Du saust mien Volkj Israel weiden, un du saust äwa Israel Ferscht sennen.

³Un aule Eltestasch Israels kaumen nom Kjennich no Hebron, un de Kjennich David muak eenen Bunt met an en Hebron, ver däm Harn; un see saulwden David toom Kjennich äwa Israel.

⁴30 Joa wia David oolt, aus hee Kjennich wort; hee rejieed 40 Joa.

⁵En Hebron rejieed hee säwen Joa en sas Moonat äwa Juda, un en Jerusalem rejieed hee 33 Joa äwa gaunz Israel un Juda.

⁶Un de Kjennich jinkj met siene Mana no Jerusalem jäajen de Jebusita, de Bewona vom Launt. Un see räden too David un säden: Du woascht nich hia enennkomen, sonda de Blinje un de Lome woaren die wajchjoagen; see wullen doamet sajen: David woat nich hia enennkomen.

⁷Oba David neem de Burjch Zion en, daut es David siene Staut.

⁸Un David säd aun däm seljen Dach: Wäa de Jebusita schleit un aun de Wotaleidinj kjemt, un de Lome un de Blinje schleit, dee David siene Seel haussen ...! Doahäa sajcht maun: Een Blinja un een Loma doaf nich em Hus komen.

⁹Un David wond enne Burjch, un hee nand ar David siene Staut. Un David bud runtom, vom Wal aun no bennen han.

¹⁰Un David wort emma jrata, un de Har, de Gott de Häaschoa, wia met am.

¹¹Un Hiram, de Kjennich von Tierus, schekjt Booten no David, un Zeedaholt un Holtoabeida un Steenschnieda; un see buden David een Hus.

¹²Un David erkjand, daut de Har am toom Kjennich äwa Israel bestädicht, un daut hee sien Kjennichrikj toom Aunseenen jebrocht haft om sien Volkj Israels wellen.

¹³Un David neem noch Näbenfrues un Frues ut Jerusalem, nodäm hee ut Hebron jekomen wia; un daut worden David noch Säns un Dajchta jebuaren.

¹⁴Un dit sent de Nomes dee am en Jerusalem jebuaren worden: Schammua un Schobab un Nathan un Salomo,

¹⁵un Jibchar un Elischua un Nefeg un Jafija,

¹⁶un Elischama un Eljada un Elifelet.

¹⁷Un aus de Filista hieeden, daut maun David aus Kjennich äwa Israel jesaulft haud, doa jinjen aule Filista nopp, om David too sieekjen. Un David hieed daut un jinkj rauf enne Burjch.

¹⁸Un de Filista kaumen un breeden sikj em Tol Refaim ut.

¹⁹Un David befruach däm Harn un säd: Saul ekj jäajen de Filista noppgonen? West du an en miene Haunt jäwen? Un de Har säd to David: Go nopp, dan ekj woa de Filista en diene Haunt jäwen.

²⁰Doa kaum David no Baal-Perazim. Un David schluach an doa selfst, un hee säd: De Har haft miene Fiend ver mie von eenaunda jeräten, aus daut Wota eenen Daum veritt. Doahäa jeef hee janem Uat däm Nomen Baal-Perazim.

²¹Un see leeten doa äare Jetta, un David un siene Mana naumen dee wajch.

²²Un de Filista jinjen wada nopp un breeden sikj em Tol Refaim ut.

²³Un David befruach däm Harn; un hee säd: Du saust nich noppgonen; drei die an em Rigjen, daut du aun an bie de Mulbäabeem jäajenäwa kjeemst.

²⁴Un sooboolt du daut Ruzhen enne Spetzen de Mulbäabeem hieescht, dan spood die; dan es de Har ver die utjegonen, om daut Filista Häa too schlonen.

²⁵Un David deed soo, aus de Har am befoolen haud; un hee schluach de Filista von Geba, bat maun no Geser kaum.