Read De Bibel JHF 2. Samuel 9 Bible Online

2. Samuel 9 - De Bibel JHF bible

2. Samuel 9

¹Un David säd: Es nich eena doa, dee von Saul sienem Hus äwajebläwen es, daut ekj aun am Goots doo om Jonatan sienen wellen?

²Oba daut wia een Kjnajcht von Saul sienem Hus, sien Nomen wia Ziba; un see roopten am no David. Un de Kjennich räd to am: Best du Ziba? Un hee säd: Jo, dien Kjnajcht.

³Un de Kjennich säd: Es noch wäa von Saul sienem Hus, daut ekj Gottes Boarmhoatichkjeit aun am doo? Un Ziba säd toom Kjennich: Daut es noch een Sän von Jonatan doa, dee aune Feet lom es.

⁴Un de Kjennich säd to am: Wua es hee? Un Ziba säd toom Kjennich: Kjikj, hee es en Makir sienem Hus, vom Sän Ammiel, en Lodebar.

⁵Doa schekjt de Kjennich David han un leet am ut däm Hus Makir, vom Sän Ammiel, holen, von Lodebar.

⁶Un Mefiboseth, Jonatan sien Sän, däm Sän von Saul, kaum no David; un hee foll opp sien Aunjesecht un venäjd sikj. Un David säd: Mefiboseth! Un hee säd: Kjikj, dien Kjnajcht.

⁷Un David säd to am: Enjst die nich; dan ekj well Goodet aun die doonen om dienem Voda Jonatan sienem wellen, un well die aule Felda von dienem Voda Saul trigj jäwen; oba du saust bestendich aun mienem Desch äten.

⁸Un hee venäjd sikj un säd: Waut es dien Kjnajcht, daut du die no eenem doodjen Hund jedreit hast, aus ekj eena sie?

⁹Doa roopt de Kjennich Ziba, Saul sienem Deena, un säd to am: Aules, waut Saul un sienem gaunzen Hus jehieet haft, ha ekj däm Sän von dienem Harn jejäft.

¹⁰Un du saust am daut Launt beoabeiden, du un diene Säns un diene Kjnajchts, un de Arnt ennbrinjen, doamet de Sän von dienem Harn Broot to äten haft. Un Mefiboseth, de Sän von dienem Harn, saul bestendich aun mienem Desch äten. Un Ziba haud 15 Säns un 20 Kjnajchts.

¹¹Un Ziba säd toom Kjennich: No aulem, waut mien Har, de Kjennich, sienem Kjnajcht befält, aulsoo woat dien Kjnajcht doonen. Un Mefiboseth, säd de Kjennich, woat aun mienem Desch äten, aus eena von de Kjennichssäns.

¹²Un Mefiboseth haud eenen kjlienen Sän, sien Nomen wia Micha. Un aula, dee en Ziba sienem Hus wonden, wieren Mefiboseth siene Kjnajchts.

¹³Un Mefiboseth wond en Jerusalem, dan hee aut bestendich aum Kjennichsdesch. Oba hee wia lom aun beid Feet.