Read De Bibel JHF 1. Kjennichs 1 Bible Online

1. Kjennichs 1 - De Bibel JHF bible

1. Kjennichs 1

¹Un de Kjennich David wia oolt, huach aun Doag; un see bedakjten am met Kjleeda, oba hee wort nich woam.

²Doa säden siene Kjnajchts to am: Maun sieekjt fa mienem Harn, däm Kjennich, eene Mejal, eene Junkfru; un see saul ver däm Kjennich stonen un am fläajen un aun sienem Bossem schlopen, daut mien Har, de Kjennich, woam woat.

³Un maun socht eene scheene Mejal, en aule Jrensen Israels; un maun funk Abischag, de Sunamitin, un brocht ar nom Kjennich.

⁴Un de Mejal wia sea scheen, un see fläajd däm Kjennich un bedeend am; oba de Kjennich erkjand ar nich.

⁵Oba Adonija, Haggit äa Sän, hoof sikj un säd: Ekj well Kjennich woaren! Un hee schauft sikj Woages un Rittasch aun, un 50 Maun, dee ver am häa randen.

⁶Un sien Voda haud am, soo lang hee läwd, nich betriept, daut hee jesajcht haud: Wuarom deist du aulsoo? Un uk hee wia sea scheen von Jestault; un Haggit haud am no Absalom jebuaren.

⁷Un hee haud eene Bespräkjung met Joab, Zeruja sienem Sän, un met Abjatar, däm Priesta; un see holpe Adonija un stunden hinja am.

⁸Oba Zadok, de Priesta, un Benaja, Jojada sien Sän, un Nathan, de Profeet, un Schimi un Rei, un de Helden, dee David haud, wieren nich met Adonija.

⁹Un Adonija schlacht Kjlienvee un Rinda un Mastvee bie däm Steen Sochelet, dee biem Borm Rogel es; un hee lod aul siene Breeda, de Kjennichssäns, un aule Mana von Juda, de Kjennichskjnajchts, en.

¹⁰Oba Nathan, de Profeet, un Benaja un de Helden un Salomo, sienem Brooda, lod hee nich en.

¹¹Doa räd Nathan too Bathseba, Salomo siene Mutta, un säd: Hast du nich jehieet, daut Adonija, Haggit äa Sän, Kjennich jeworden es? Un David ons Har weet daut nich.

¹²Soo komm nu, lot mie die doch eenen Rot jäwen, daut du dien Läwen un daut Läwen von dienem Sän Salomo radst.

¹³Go han un go nom Kjennich David nenn, un saj to am: Hast du, mien Har Kjennich, nich diene Deenstmejal jeschwuaren un jesajcht: Dien Sän Salomo saul no mie Kjennich sennen, un hee saul opp mienem Troon setten? Un wuarom es Adonija Kjennich jeworden?

¹⁴Kjikj, noch woascht du selfst met däm Kjennich räden, soo woa ekj no die nenkomen un diene Wieed bestädjen.

¹⁵Un Bathseba jinkj nom Kjennich nenn, enne Schlopstow; oba de Kjennich wia sea oolt, un Abischag, de Sunamitin, bedeend däm Kjennich.

¹⁶Un Bathseba venäjd sikj un bekjt sikj dol ver däm Kjennich. Un de Kjennich säd: Waut es met die?

¹⁷Un see säd to am: Mien Har, du hast diene Deenstmejal bie däm Harn, dienem Gott, jeschwuaren: Dien Sän Salomo saul no die Kjennich sennen, un hee saul opp dienem Troon setten;

¹⁸un nu, kjikj, Adonija es Kjennich jeworden, un du, mien Har Kjennich, weetst daut nich.

¹⁹Un hee haft väl Rinda un Mastvee un Kjlienvee jeschlacht, un haft aule Kjennichssäns un Abjatar, däm Priesta, un Joab, däm Häabowaschten, enjeloden; oba dienem Kjnajcht Salomo haft hee nich enjeloden.

²⁰Un du, mien Har Kjennich - de Uagen von gaunz Israel sent opp die jerecht, daut du an sajchst, wäa opp däm Troon von mienem Harn, däm Kjennich, no am setten saul.

²¹Un daut woat passieren, wan mien Har, de Kjennich, bie siene Vodasch licht, daut ekj un mien Sän Salomo woaren Schildna sennen mote.

²²Un kjikj, see räd noch met däm Kjennich, doa kaum de Profeet Nathan nenn.

²³Un maun berecht däm Kjennich un säd: De Profeet Nathan es doa! Un hee kaum ver däm Kjennich un bekjt sikj ver däm Kjennich met sienem Aunjesecht bat oppe Ieed.

²⁴Un Nathan säd: Mien Har Kjennich, hast du jesajcht: Adonija saul no mie Kjennich sennen, un hee saul opp mienem Troon setten?

²⁵Dan hee es vondoag raufjegonen un haft väl Rinda un Mastvee un Kjlienvee jeschlacht, un haft aule Kjennichssäns un de Bowaschte vom Häa un Abjatar, däm Priesta, enjeloden; un kjikj, see äten un drinkjen ver am un sajen: Daut läft de Kjennich Adonija!

²⁶Oba mie, dienem Kjnajcht, un Zadok, däm Priesta, un Benaja, Jojada sienem Sän, un Salomo, dienen Kjnajcht, haft hee nich enjeloden.

²⁷Es dise Sach von mienem Harn, däm Kjennich, befoolen worden? Un hast du nich dienem Kjnajcht jesajcht, wäa oppem Troon von mienem Harn, däm Kjennich, no am setten saul?

²⁸Doa auntwuad de Kjennich David un säd: Roopt mie Bathseba! Un see kaum nenn ver däm Kjennich un stunt ver däm Kjennich.

²⁹Un de Kjennich schwua un säd: Soo woa de Har läft, dee miene Seel ut aule Bedrenkjnisen erleest haft,

³⁰soo aus ekj die biem Harn, däm Gott Israels, jeschwuaren ha, endäm ekj säd: Dien Sän Salomo saul no mie Kjennich sennen, un hee saul opp mienem Troon aun miene Städ setten! Aulsoo woa ekj daut aun disem Dach doonen.

³¹Doa venäjd Bathseba sikj met däm Aunjesecht bat oppe Ieed un bekjt sikj ver däm Kjennich dol un säd: Daut läft mien Har, de Kjennich David, eewichlich!

³²Un de Kjennich David säd: Roopt mie Zadok, däm Priesta, un Nathan, däm Profeet, un Benaja, Jojada sienem Sän! Un see kaumen nenn ver däm Kjennich.

³³Un de Kjennich säd to an: Nämt junem Harn siene Kjnajchts met junt, un lot mienem Sän Salomo opp mienem Multia rieden, un fieet am no Gihon rauf.

³⁴Un Zadok, de Priesta, un Nathan, de Profeet, sellen am doa selfst toom Kjennich äwa Israel saulwen, un jie sellen en de Posaun blosen un sajen: Daut läft de Kjennich Salomo!

³⁵Un got hinja am nopp, un hee kjemt un sat sikj opp mienen Troon! Un hee saul Kjennich sennen aun miene Städ; un am ha ekj bestalt, daut hee Ferscht äwa Israel un äwa Juda es.

³⁶Un Benaja, Jojada sien Sän, auntwuad däm Kjennich un säd: Amen! Aulsoo sajcht de Har, de Gott von mienem Harn, däm Kjennich!

³⁷Soo aus de Har met mienem Harn, däm Kjennich, jewast es, aulsoo mucht hee met Salomo sennen, un hee mucht sienen Troon noch jrata moaken aus de Troon von mienem Harn, däm Kjennich David!

³⁸Un Zadok, de Priesta, un Nathan, de Profeet, un Benaja, Jojada sien Sän, un de Keretita un de Peletita jinjen rauf un leeten Salomo opp däm Multia vom Kjennich David rieden, un see fieeden am no Gihon.

³⁹Un Zadok, de Priesta, naum daut Eeljhuarn ut däm Zelt un saulwd Salomo; un see blosde enne Posaun, un aulet Volkj säd: Daut läft de Kjennich Salomo!

⁴⁰Un aulet Volkj jinkj nopp hinja am häa; un daut Volkj blosd opp Fleeten, un see freiden sikj met ne groote Freid, soo daut de Ieed zettad von äarem Jeschrecht.

⁴¹Un Adonija hieed daut un aul siene Jast, dee bie am wieren, aus see met däm Äten foadich wieren; un Joab hieed däm Posaunenschaul un säd: Waut saul dit Jeschrecht enne Staut?

⁴²Aus hee noch räd, kjikj, doa kaum Jonatan, Abjatar sien Sän, vom Priesta. Un Adonija säd: Komm, dan du best een kluaka Maun un woascht goode Bootschoft brinjen.

⁴³Doa auntwuad Jonatan un säd to Adonija: Nich doch! Ons Har, de Kjennich David, haft Salomo toom Kjennich jemoakt.

⁴⁴Un de Kjennich haft Zadok, däm Priesta, un Nathan, däm Profeet, un Benaja, Jojada sienem Sän, un de Keretita un de Peletita met am jeschekjt, un see ha am opp däm Kjennich sienem Multia rieden loten;

⁴⁵un Zadok, de Priesta, un Nathan, de Profeet, ha am en Gihon toom Kjennich jesaulft; un see sent von doa met Freid raufjegonen, un de Staut es en Bewäajunk. Daut es daut Jeschrecht, daut jie jehieet ha.

⁴⁶Un Salomo haft sikj uk opp däm kjennichlichen Troon jesat;

⁴⁷un uk de Kjnajchts vom Kjennich sent jekomen, om onsem Harn, däm Kjennich David, too säajnen, endäm see säden: Dien Gott moak Salomo sienem Nomen noch harlicha aus dienem Nomen, un moakt sienem Troon jrata aus dienem Troon! Un de Kjennich haft oppem Loaga aunjebät;

⁴⁸un de Kjennich haft uk soo jesajcht: Jeloft es de Har, de Gott Israels, dee vondoag eenen jejäft haft, dee opp mienem Troon sett, daut miene Uagen daut seenen!

⁴⁹Doa vefieeden sikj aule Enjelodne von Adonija un stunden opp un jinjen een jiedra sienem Wajch.

⁵⁰Un Adonija enjst sikj ver Salomo; un hee muak sikj opp un jinkj han un fot de Hieena vom Aultoa aun.

⁵¹Un daut wort Salomo berecht, doa maun säd: Kjikj, Adonija enjst sikj fa däm Kjennich Salomo, un kjikj, hee helt de Hieena vom Aultoa un sajcht: Daut schwia mie vondoag de Kjennich Salomo, daut hee sienem Kjnajcht nich met daut Schwieet ombrinjen well!

⁵²Un Salomo säd: Wan hee sikj aus een kluaka Maun bewiesen woat, soo saul von sienem Hoa kjeent oppe Ieed faulen; oba wan Beeset aun am jefungen woat, soo saul hee stoawen.

⁵³Un de Kjennich Salomo schekjt han, un see brochten am vom Aultoa rauf; un hee kaum un bekjt sikj dol ver däm Kjennich Salomo; un Salomo säd to am: Go en dien Hus.