Read De Bibel JHF 1. Kjennichs 10 Bible Online

1. Kjennichs 10 - De Bibel JHF bible

1. Kjennichs 10

¹Un de Kjennijin von Scheba hieed däm Roop äwa Salomo wäajen däm Nomen Gottes; un see kaum, om am met Rotsel too vesieekjen.

²Un see kaum no Jerusalem met sea väl Bejleita, met Kameelen, de Jewerzen un Golt druagen, en groote Menje, un Adelsteena. Un see kaum no Salomo un räd to am aules, waut en äarem Hoaten wia.

³Un Salomo erkjläad ar aules, om waut see fruach; kjeene Sach wia däm Kjennich veborje, dee hee ar nich erkjläat haud.

⁴Un aus de Kjennijin von Scheba aul de Weisheit von Salomo sach, un daut Hus, daut hee jebut haud,

⁵un daut Äten opp sienem Desch, un de Wonunk von siene Kjnajchts, un daut Oppträden von siene Deena, un äare Kjleeda un siene Ennschenkja, un siene Brauntopfa, dee em Hus Gottes jebrocht worden, doa kaum see utasich.

⁶Un see säd toom Kjennich: Daut Wuat es de Woarheit jewast, daut ekj en mienem Launt äwa diene Sachen un äwa diene Weisheit jehieet ha;

⁷un ekj ha de Wieed nich jejleeft, bat ekj jekomen sie un miene Uagen daut jeseenen ha. Un kjikj, nich de Halft es mie jesajcht worden; du hast mea Weisheit un Rikjtom aus daut Jeräd, daut ekj jehieet ha.

⁸Jlekjlich sent diene Lied, seelich dise diene Kjnajchts, dee emma ver die stonen, dee diene Weisheit hieren!

⁹Jeloft es de Har, dien Gott, dee aun die Jefaulen haft, die oppem Troon Israels too saten! Wiels de Har Israel eewichlich leeft, haft hee die toom Kjennich enjesat, om Rajcht un Jerajchtichkjeit too eewen.

¹⁰Un see jeef däm Kjennich 120 Talent Golt un Jewerzen en sea groote Menj un Adelsteena; niemols es soo eene groote Menj Jewerz jekomen aus dise, dee de Kjennijin von Scheba däm Kjennich Salomo jeef.

¹¹(Un uk Hiram siene Schäp, dee Golt ut Ofir holden, brochten ut Ofir Sandelholt [rodet Holt] un sea väl Adelsteena.

¹²Un de Kjennich muak von däm Sandelholt Jeländasprote fa daut Hus Gottes un fa daut Kjennichshus, un Zitta un Hope fa de Senja; aulsoo es kjeen Sandelholt jekomen noch jeseenen worden bat opp disem Dach).

¹³Un de Kjennich Salomo jeef de Kjennijin von Scheba no aul äarem Wensch, daut see velangd, buta däm, met waut Salomo ar kjennichlich beschenkjt. Un see jinkj trigj en äa Launt, see un äare Kjnajchts.

¹⁴Un daut Jewicht vom Golt, daut däm Salomo en eenem Joa enjebrocht wort, wia 666 Talent Golt,

¹⁵buta däm, waut vonne Hendla un däm Haundel de Haundelslied un von aule Kjennichs von Arabien un de Laundesstauthoola enjebrocht wort.

¹⁶Un de Kjennich Salomo muak 200 von Haunt utjeschloagne goldne Schilda: 600 Schekel Golt trock hee äwa jiedret Schild;

¹⁷un 300 kjliene goldne Schilda von Haunt utjeschloagnem Golt; 3 Mine Golt trock hee äwa jiedret kjliene Schild; un de Kjennich deed dee en daut Hus em Woolt en Libanon.

¹⁸Un de Kjennich muak eenen groote Troon von Aulfenbeen un äwatrock am met reinem Golt.

¹⁹6 Stoopen wieren aun däm Troon, un de bowaschta Deel vom Troon wia no hinjen rund; un Oarmläne wieren opp dise un opp jane Sied vom Sett, un 2 Leiws stunden bie de Oarmläne;

²⁰un 12 Leiws stunden opp de 6 Stoopen, opp dise un opp jane Sied. Soowaut es nich jemoakt worden en irjent eenem Kjennichrikj.

²¹Un aule drinkj Jefässa vom Kjennich Salomo wieren ut Golt, un aulet Jereetschoft em Wooldhus en Libanon wieren von reinem Golt; nuscht wia von Selwa, daut wort aune Doag von Salomo fa nuscht jeacht.

²²Dan de Kjennich haud Tarsis Schäp oppem Mäa met Hiram siene Schäp; eenmol en dree Joa kaumen de Tarsis Schäp, beloden met Golt un Selwa, Aulfenbeen un Ope un Peiheena.

²³Un de Kjennich Salomo wia jrata aus aule Kjennichs de Ieed aun Rikjtum un Weisheit.

²⁴Un de gaunze Ieed socht Salomo sien Aunjesecht, om siene Weisheit to hieren, dee Gott en sienem Hoaten jejäft haud.

²⁵Un see brochten een jiedra sien Jeschenkj: Jereetschoft von Selwa un Jereetschoft von Golt, un Kjleeda un Jewäaren, un Jewerzen, Pieed un Multieren, Joaressautz jieda Joa.

²⁶Un Salomo brocht Woages un Rittasch toop, un hee haud 1400 Woages un 12 000 Rittasch; un hee veloagad dee enne Woagesstäda un nom Kjennich en Jerusalem.

²⁷Un de Kjennich muak daut Selwa en Jerusalem de Steena jlikj, un de Zeeda muak hee de Fiejebeem jlikj, dee enne Läacht en Menje sent.

²⁸Un maun brocht däm Salomo Pieed ut Ägipten un Koe (Kilikien); un däm Kjennich siene Haundelslied koften dee fa Jelt.

²⁹Un een Woagen ut Ägipten kaum opp 600 Schekel Selwa, un een Pieet opp 150. Un aulsoo brocht maun an derch äare Haunt aule Kjennichs de Hetita un de Kjennichs von Sierien.