Read De Bibel JHF 1. Kjennichs 11 Bible Online

1. Kjennichs 11 - De Bibel JHF bible

1. Kjennichs 11

¹Un de Kjennich Salomo leewd väl framde Frues, buta de Dochta vom Farao; moabitische, ammonitische, edomitische, zidonische, hethitische,

²von de Nazionen, von dee de Har to de Kjinja Israel jesajcht haud: Jie sellen nich unja an komen, un see sellen nich unja junt komen; jewess, see woaren june Hoaten neije äare Jetta notofolje! Aun disem hong Salomo met Leew.

³Un hee haud 700 ferschtliche Frues un 300 Näbenfrues; un siene Frues neijde sien Hoat.

⁴Un daut passieed aun de Tiet, aus Salomo oolt wia, doa neijde siene Frues sien Hoat aundre Jetta no; un sien Hoat wia nich mea soo vollkomen met däm Harn, sienem Gott, aus daut Hoat von sienem Voda David.

⁵Un Salomo jinkj de Astoret no, de Jettin de Zidonia, un däm Milkom, däm Aufschu de Amonita.

⁶Un Salomo deed, waut enne Uagen Gottes bees wia, un hee jinkj däm Harn nich vollkomen no aus sien Voda David.

⁷Doa bud Salomo eene Hecht däm Kamos, däm Aufschu de Moabita, oppem Boajch, dee ver Jerusalem licht, un däm Molech, däm Aufschu de Kjinja Amon.

⁸Un aulsoo deed hee fa aul siene Framde Frues, dee äare Jetta rieekjade un opfaden.

⁹Doa wort de Har oajalich jäajen Salomo, wiels hee sien Hoat von däm Harn, däm Gott Israels, aufjedreit haud, dee am twee Mol erschienen wia,

¹⁰un am betrafs dise Sach befoolen haud, aundre Jetta nich notogonen; oba hee beoobacht nich, waut de Har befoolen haud.

¹¹Un de Har säd to Salomo: Doarom daut soowaut bie die jewast es, un du mienen Bunt nich jehoolen hast un miene Sazungen, dee ekj die befoolen ha, soo woa ekj die daut Kjennichrikj wajchnämen un daut dienem Kjnajcht jäwen.

¹²Doch en diene Doag well ekj daut nich doonen, om dienem Voda David sienem wellen; utte Haunt von dienem Sän woa ekj daut rieten;

¹³nu well ekj am nich daut gaunze Kjennichrikj wajchnäme; eenen Staum well ekj dienem Sän jäwen, om mienem Kjnajcht David sienem wellen un om Jerusalems wellen, daut ekj erwält ha.

¹⁴Un de Har erwakjt Salomo eenen Jäajna, Hadad, däm Edomieta, hee wia vom Kjennichs Somen en Edom.

¹⁵Daut wia, aus David en Edom wia, aus Joab, de bowaschta fa daut Häa, noppjinkj, om de jeschloagne too begrowen, un hee aulet Menliche en Edom schluach,

¹⁶(dan Joab bleef sas Moonat doa selfst met gaunz Israel, bat hee aulet Menliche en Edom utjerot haud).

¹⁷Doa rand Hadad wajch, hee un edomitische Mana von sienem Voda siene Kjnajchts met am, om no Ägipten to gonen; oba Hadad wia een kjliena Jung.

¹⁸Un see muaken sikj opp von Midian un kaumen no Paran; un see naumen Mana ut Paran met sikj un kaumen no Ägipten nom Farao, däm Kjennich von Ägipten. Un hee jeef am een Hus un Noarinj un jeef am Launt.

¹⁹Un Hadad funk groote Jnod en Farao siene Uagen, un hee jeef am de Sesta von siene Fru, de Sesta de Kjennijin Tachpena, to Fru.

²⁰Un de Sesta de Tachpena jebua am Genubat, sienem Sän, un Tachpena fläajd am em Hus vom Farao, un soo wia Genubat en Farao sienem Hus, unja däm Farao siene Säns.

²¹Un aus Hadad en Ägipten hieed, daut David sikj to siene Vodasch jelajcht haud, un daut Joab, de Häabowaschta, doot wia, doa säd Hadad toom Farao: Lot mie gonen, daut ekj en mien Launt go.

²²Un de Farao säd to am: Waut fält die bie mie? Un kjikj, du west en dien Launt gonen? Un hee säd: Nuscht; oba lot mie gonen!

²³Un Gott erwakjt am eenen Jäajna, Reson, Eljada sienen Sän, dee von Hadadesa, däm Kjennich von Zoba, sienem Harn, wajch jerant wia.

²⁴Un hee saumeld Mana om sikj un wort Bowaschta von siene Schoa, aus David de Zobaita ombrocht; un see jinjen no Damaskus un wonden doa, un see rejeade en Damaskus.

²⁵Un hee wort een Jäajna Israels, aule Doag von Salomo, buta däm Iebel, daut Hadad deed; un hee haud Aufschu jäajen Israel, un hee wort Kjennich äwa Sierien.

²⁶Un Jerobeam, Nebat sien Sän, een Efratita, von Zereda; (un de Nomen von siene Mutta wia Zerua, eene Wätfru), een Kjnajcht von Salomo, uk hee hoof siene Haunt jäajen däm Kjennich.

²⁷Un dit wia de Sach, wuarom hee de Haunt jäajen däm Kjennich opphoof: Salomo bud daut Millo un muak de Städen foadich dee twei wieren von sienem Voda David siene Staut.

²⁸Oba de Maun Jerobeam wia een kluaka Maun; un aus Salomo däm Jinjlinkj sach, daut hee oabeitsaum wia, stald hee am äwa aule Laustoabeida vom Josef sienem Hus.

²⁹Un too jane Tiet passieed daut, aus Jerobeam eenmol ut Jerusalem rutjinkj, doa funk am de Profeet Achija, de Silonita, oppem Wajch; un hee haud een nieet Bowakjleet aunjetrocken, un see beid wieren auleen oppem Flekj.

³⁰Doa fot Achija daut niee Bowakjleet, daut hee aunhaud, un vereet daut en 12 Stekja;

³¹un hee säd to Jerobeam: Nemm die 10 Stekja; dan soo sajcht de Har, de Gott Israels: Kjikj, ekj well daut Kjennichrikj ut Salomo siene Haunt rieten un well die 10 Stam jäwen,

³²(oba eenen Staum saul hee hoolen om mienem Kjnajcht David sienem wellen un om Jerusalems wellen, de Staut, dee ekj erwält ha ut aule Stam Israels);

³³doarom, daut see mie veloten un sikj ver Astoret dol jebekjt ha, de Jettin de Zedonia, ver Kamos, däm Gott de Moabita, un ver Milkom, däm Gott de Kjinja Amon, un nich opp miene Wäaj jegonen sent, soo to doonen, waut en miene Uagen rajcht es, un miene Sazungen un miene Rajchte too hoolen, aus sien Voda David.

³⁴Doch, ekj well nich daut gaunze Kjennichrikj ut siene Haunt nämen, sonda well am aul siene Läwensdoag toom Ferscht saten, om mienen Kjnajcht David sienem wellen, däm ekj erwält ha, dee miene Jebooten un miene Sazungen jehoolen haft.

³⁵Oba ut de Haunt von sienem Sän well ekj daut Kjennichrikj nämen un daut die jäwen, dee 10 Stam;

³⁶un sienem Sän well ekj eenen Staum jäwen, om daut mien Kjnajcht David aule Doag een Licht en Jerusalem ver mie haft, de Staut, dee ekj mie erwält ha, om mienem Nomen doahan too saten.

³⁷Un die well ekj nämen, daut du äwa aules rejieescht, waut diene Seel wenschen woat, un Kjennich best äwa Israel.

³⁸Un daut woat passieren, wan du opp aules hieren woascht, waut ekj die Befäl, un opp miene Wäaj gonen un doonen woascht, waut en miene Uagen rajcht es, endäm du miene Sazungen un miene Jebooten doonen woascht, aus mien Kjnajcht David jedonen haft, soo woa ekj met die sennen un die een bestendjet Hus buen, aus ekj daut däm David jebut ha, un woa die Israel jäwen;

³⁹un ekj woa däm David sienem Somen doa wäajen deemutje, doch nich fa emma.

⁴⁰Un Salomo socht Jerobeam omtobrinjen; doa muak Jerobeam sikj opp un rand wajch no Ägipten no Sisak, däm Kjennich von Ägipten; un hee wia en Ägipten bat Salomo sienem Doot.

⁴¹Un daut äwaje de Jeschicht von Salomo un aules, waut hee jedonen haft, un siene Weisheit, es daut nich em Buak de Jeschichte von Salomo jeschräwen?

⁴²Un de Doag, dee Salomo en Jerusalem äwa gaunz Israel rejieed, wieren 40 Joa.

⁴³Un Salomo läd sikj to siene Vodasch, un hee wort begroft en sienem Voda David siene Staut. Un Rehabeam, sien Sän, wort aun siene Städ Kjennich.