Read De Bibel JHF 1. Kjennichs 14 Bible Online

1. Kjennichs 14 - De Bibel JHF bible

1. Kjennichs 14

¹Too de Tiet wort Abija krank, Jerobeam sien Sän.

²Un Jerobeam säd to siene Fru: Moak die doch opp un vestall die, doamet maun nich weet, daut du Jerobeam siene Fru best, un go no Silo; kjikj, doa selfst es Ahija, de Profeet; hee es daut, dee äwa mie jerät haft, daut ekj Kjennich äwa dit Volkj sennen woa.

³Un nemm 10 Brood met die un Kuaken un eene Kruck Honnich un go no am; hee woat die sajen, waut met däm Jung sennen woat.

⁴Un Jerobeam siene Fru deed soo; see muak sikj opp un jinkj no Silo un kaum en Achija sienem Hus. Oba Ahija kunn nich seenen, dan siene Uagen wieren schwak wäajen sienem Ella.

⁵Un de Har haud too Ahija jesajcht: Kjikj, Jerobeam siene Fru kjemt, om die betrafs äarem Sän too befroagen, dan hee es krank; soo un soo saust du to ar räden; oba daut woat passieren, wan see nenn kjemt, soo woat see sikj framd aunstalen.

⁶Un daut passieed, aus Ahija daut leise nenkomen von äare Feet hieed, aus see toom Engank nenn kaum, doa säd hee: Komm nenn, Jerobeam siene Fru! Wuarom stalst du die framd aun? Ekj sie met hoade Wieed no die jeschekjt worden.

⁷Go han, räd too Jerobeam: Soo sajcht de Har, de Gott Israels: Wiels ekj die ut de Medd vom Volkj erhowen un die aus Ferscht jesat ha äwa mien Volkj Israel,

⁸un daut Kjennichrikj von David sienem Hus jeräten un die daut jejäft ha; oba du best nich aus mien Kjnajcht David, dee miene Jebooten jehoolen haft un mie nojefolcht es met sienem gaunzen Hoaten, daut blooss hee deed, waut en miene Uagen rajcht es;

⁹sonda hast daut oaja aus aula jemoakt, dee ver die jewast sent, un best hanjegonen un hast die aundre Jetta un jegotne Bilda jemoakt, om mie too reizen, un hast mie hinja dienem Rigjen jeschmäten;

¹⁰doarom, kjikj, well ekj Onjlekj äwa Jerobeam sien Hus brinjen, un ekj woa von Jerobeam utroden, waut menlich es, däm Jebungnen un däm Frieen en Israel; un ekj woa hinja däm Hus von Jerobeam utfeaje, aus maun daut Mest utfeajt, bat daut met am ut es.

¹¹Wäa von Jerobeam enne Staut stoaft, däm sellen de Hunj fräten, un wäa oppe Stap stoaft, däm sellen de Himmels Väajel fräten; dan de Har haft daut jesajcht!

¹²Un du, moak die opp, go no dienem Hus; wan diene Feet en diene Staut komen, woat daut Kjint stoawen.

¹³Un gaunz Israel woat om am kloagen un am begrowen; dan von Jerobeam woat disa auleen en een Grauf komen, wiels aun am waut Goodet jäajen däm Harn, däm Gott Israels, jefungen worden es en Jerobeam sienem Hus.

¹⁴Un de Har woat sikj eenen Kjennich äwa Israel erwakjen, dee daut Hus Jerobeam aun janem Dach utroden woat; Un waut saul ekj sajen? Daut fangt aul nu aun.

¹⁵Un de Har woat Israel schlonen, aus daut Rua em Wota schwäwt; un hee woat Israel ut disem gooden Launt rutrieten, daut hee äare Vodasch jejäft haft, un woat an aun jane Sied vom Stroom vestreien, doarom daut see äare Ascherim jemoakt ha, endäm see dän Harn reizten.

¹⁶Un hee woat Israel doahan jäwen wäajen de Sinden Jerobeam, dee hee begonen un derch dee hee Israel sindich jemoakt haft.

¹⁷Un Jerobeam siene Fru muak sikj opp un jinkj un kaum no Tirza; see wia krakjt soo aune Husschwal jekomen, doa storf de Jung.

¹⁸Un gaunz Israel begrow am un kloagd om am, nom Wuat Gottes, daut hee derch sienem Kjnajcht Ahija, däm Profeet, jerät haud.

¹⁹Un daut Äwaje de Jeschicht Jerobeam, woo hee jesträden un woo hee rejieet haft, kjikj, daut es em Buak de Chronik de Kjennichs von Israel jeschräwen.

²⁰Un de Doag, dee Jerobeam rejieed, wieren 22 Joa; un hee läd sikj to siene Vodasch. Un Nadab, sien Sän, wort Kjennich aun siene Städ.

²¹Un Rehabeam, Salomo sien Sän, rejieed en Juda. 41 Joa wia Rehabeam oolt, aus hee Kjennich wort, un hee rejieed 17 Joa en Jerusalem, dee Staut, dee de Har ut aule Stam Israels erwält haud, om sienem Nomen doahan too saten. Un de Nomen von siene Mutta wia Naama, de Ammonitin.

²²Un Juda deed woat enne Uagen Gottes bees wia; un see reizte am to Aufgonst derch äare Sinden, dee see deeden, mea aus aules, waut äare Vodasch jedonen hauden.

²³Un uk see buden sikj Hechten un Biltstendasch un Ascherim opp aule huage Aunboaj un unja jiedrem jreenen Boom.

²⁴Un daut wieren uk Huara em Launt; see deeden no aulem Aufschu de Nazionen, dee de Har vere Kjinja Israel rutjejoacht haud.

²⁵Un daut passieed aum feften Joa von Kjennich Rehabeam, doa jinkj Sisak, de Kjennich von Ägipten, jäajen Jerusalem nopp.

²⁶Un hee neem däm Schauz ut däm Hus Gottes wajch un däm Schauz ut däm Kjennichshus, jo, aules naum hee, un hee naum aule goldne Schilda, dee Salomo jemoakt haud.

²⁷Un de Kjennich Rehabeam muak aun äare Städ koppane Schilda, un hee befool dee unjre Haunt de Bowaschte de Kjennichswajchta, dee däm Engank von Kjennichshus bewoakten.

²⁸Un daut passieed: Soo foaken de Kjennich em Hus Gottes jinkj, druagen de Kjennichswajchta dee un brochten dee wada enne Kjennichswajchtastow trigj.

²⁹Un daut Äwaje de Jeschicht von Rehabeam un aules, waut hee jedonen haft, es daut nich em Buak de Chronik de Kjennichs von Juda jeschräwen?

³⁰Un daut wia Kjrich tweschen Rehabeam un Jerobeam aule Doag.

³¹Un Rehabeam läd sikj to siene Vodasch, un hee wort begroft bie siene Vodasch en David siene Staut. Un de Nomen siene Mutta wia Naama, de Ammonitin. Un Abijam, sien Sän, wort Kjennich aun siene Städ.