Read De Bibel JHF 1. Kjennichs 15 Bible Online

1. Kjennichs 15 - De Bibel JHF bible

1. Kjennichs 15

¹Aum 18-den Rejierungsjoa vom Kjennich Jerobeam, Nebat sienem Sän, wort Abijam Kjennich äwa Juda.

²Hee rejieed dree Joa en Jerusalem; un de Nomen von siene Mutta wia Maaka, Absalom siene Dochta.

³Un hee waundeld en aule Sinden von sienem Voda, dee disa ver am jedonen haud; un sien Hoat wia nich vollstendich met däm Harn, sienem Gott, aus daut Hoat von sienem Voda David.

⁴Dannoch jeef am de Har, sien Gott, om David sienem wellen eenen dachen Schien en Jerusalem, endäm hee sienem Sän no am oppstonen leet un Jerusalem bestonen leet;

⁵wiels David jedonen haud, waut enne Uagen Gottes rajcht wia un von aulem, waut hee am befoolen haud, nich aufjegonen wia aule Doag en sienem Läwen, buta de Sach met Uria, däm Hetita.

⁶Un daut wia Kjrich tweschen Rehabeam un Jerobeam aule Doag en äarem Läwen.

⁷Un daut Äwaje de Jeschicht von Abijam un aules, waut hee jedonen haft, es daut nich em Buak de Chronik de Kjennichs von Juda jeschräwen? Un daut wia Kjrich tweschen Abijam un Jerobeam.

⁸Un Abijam läd sikj to siene Vodasch, un maun begrow am en David siene Staut. Un Asa, sien Sän, wort Kjennich aun siene Städ.

⁹Un aum 20-ten Joa Jerobeam, däm Kjennich von Israel, wort Asa Kjennich äwa Juda-

¹⁰Un hee rejieed 41 Joa en Jerusalem; un de Nomen von siene Mutta wia Maaka, Absalom siene Dochta.

¹¹Un Asa deed, waut enne Uagen Gottes rajcht wia, aus sien Voda David.

¹²Un hee schauft de Huara ut däm Launt un deed aule Jetta wajch, dee siene Vodasch jemoakt hauden.

¹³Un uk Maaka, siene Mutta, dee sad hee auf, daut see nich mea Kjennijin wia, wiels see de Aschera een Jetzenbilt jemoakt haud; un Asa rott äa Jetzenbilt ut un vebrend daut enne Läacht Kidron.

¹⁴Oba de Hechten deed hee nich wajch; doch Asa sien Hoat wia vollstendich met däm Harn sien Läwen lank.

¹⁵Un hee brocht de jeheilichte Dinj von sienem Voda un siene jeheilichte Dinj en daut Hus Gottes: Selwa un Golt un Jereetschoft.

¹⁶Un daut wia tweschen Asa un Baesa Kjrich, däm Kjennich von Israel, aul äare Doag.

¹⁷Un Baesa, de Kjennich von Israel, jinkj jäajen Juda nopp; un hee bud Rama, om Asa, däm Kjennich von Juda, nich mea noch ut- noch nengonen to loten.

¹⁸Doa neem Asa aulet Selwa un Golt, daut em Schauzhus Gottes un däm Schauz em Kjennichshus äwajebläwen wia; un jeef daut enne Henj von de Kjnajchts; un de Kjennich Asa schekjt dee no Ben-Hadad, Tabrimmon sienem Sän, vom Sän Hesjon, däm Kjennich von Sierien, dee en Damaskus wond, un leet am sajen:

¹⁹Een Bunt es tweschen mie un die, tweschen mienem Voda un dienem Voda. Kjikj, ekj schekj die een Jeschenkj von Selwa un Golt; go han, bräakj dien Bunt met Baesa, däm Kjennich von Israel, daut hee von mie wajchjeit.

²⁰Un Ben-Hadad hieed opp däm Kjennich Asa, un hee schekj sienen Häabowaschten jäajen de Städa Israels un schluach Ijon un Dan un Abel-Bat-Maaka, un gaunz Kinneroth met däm gaunzen Launt Naftali.

²¹Un daut passieed, aus Baesa daut hieed, doa leet hee von Rama sienem buen auf un bleef en Tirza.

²²Oba de Kjennich Asa leet gaunz Juda tooproopen, kjeena wia frie; un see schaufte de Steena von Rama un daut Holt wajch, met waut Baesa jebut haud; un de Kjennich Asa bud doamet Geba-Benjamin un Mizpa.

²³Un daut Äwaje de gaunze Jeschicht Asa un aul siene Macht, un aules, waut hee jedonen, un de Städa, dee hee jebut haud, es daut nich en däm Buak de Chronik de Kjennichs von Juda jeschräwen? Doch too Tiet aus hee ella wort, wia hee aun siene Feet krank.

²⁴Un Asa läd sikj to siene Vodasch, un hee wort bie siene Vodasch begroft enne Staut von sienem Voda David. Un Josafat, sien Sän, wort Kjennich aun siene Städ.

²⁵Un Nadab, Jerobeam sien Sän, wort en Israel Kjennich aum tweeden Joa von Asa, däm Kjennich von Juda; un hee rejieed twee Joa äwa Israel.

²⁶Un hee deed, waut bees wia en de Uagen Gottes, un jinkj oppe Wäaj von sienem Voda un en siene Sinden, wuaderch hee Israel toom sindjen veleit haud.

²⁷Baesa, Achija sien Sän, vom Hus Isachar, muak eene Veschwierunk jäajen am; un Baesa schluach am en Gibbeton doot, daut de Filista jehieed, aus Nadab un gaunz Israel Gibbeton beloagaden.

²⁸Un Baesa brocht am om aum dredden Joa Asa, vom Kjennich von Juda, un wort Kjennich en siene Städ.

²⁹Un daut passieed, sooboolt hee Kjennich jeworden wia, brocht hee daut gaunze Hus Jerobeam om; hee leet von Jerobeam nuscht äwa, waut Odem haud, bat hee am vetilcht haud, nom Wuat Gottes, daut derch sienem Kjnajcht Achija, däm Silonita, jerät haud;

³⁰wäajen Jerobeam siene Sinden, dee hee begonen un wuaderch hee Israel too sindjen veleit haud, derch sienem reizen, wuaderch hee däm Harn, däm Gott Israels, jereizt haud.

³¹Un daut Äwaje de Jeschicht Nadab un aules, waut hee jedonen haft, es daut nich en däm Buak de Chronik de Kjennichs von Israel jeschräwen?

³²Un daut wia Kjrich tweschen Asa un Baesa, däm Kjennich von Israel, äa Läwen lank.

³³Aum dredden Joa von Asa, däm Kjennich von Juda, wort Bascha, Achija sien Sän, Kjennich äwa gaunz Israel en Tirza, 24 Joa.

³⁴Un hee deed, waut bees enne Uagen Gottes wia un jinkj oppe Wäaj von Jerobeam un en siene Sinden, wuaderch hee Israel toom sindjen veleit haud.