Read De Bibel JHF 1. Kjennichs 16 Bible Online

1. Kjennichs 16 - De Bibel JHF bible

1. Kjennichs 16

¹Un daut wia daut Wuat Gottes too Jehu, Hanani sienem Sän, jäajen Bascha aulsoo:

²Wiels ekj die ut däm Stoff oppjehowen un die aus Ferscht äwa mien Volkj Israel jesat ha, oba du opp Jerobeam siene Wäaj jeist un mien Volkj Israel too Sinden veleidst, soo daut see mie reizen derch äare Sinden;

³kjikj, soo woa ekj hinja Bascha un hinja sienem Hus utfeaje un woa dien Hus aus daut Hus von Jerobeam moaken, vom Sän Nebat.

⁴Wäa von Bascha enne Staut stoaft, däm sellen de Hunj fräten, un wäa von am oppe Stap stoaft, däm sellen de Himmelsväajel fräten.

⁵Un daut Äwaje de Jeschicht von Bascha un waut hee jedonen haft, un siene Macht, es daut nich en däm Buak de Chronik de Kjennichs von Israel jeschräwen?

⁶Un Baesa läd sikj to siene Vodasch, un hee wort en Tirza begroft. Un Ela, sien Sän, wort Kjennich aun siene Städ.

⁷Un uk derch Jehu wia, däm Sän Hanani, däm Profeet, daut Wuat Gottes jäajen Bascha un jäajen sien Hus, soo aus wäajen aul daut Beese, daut hee enne Uagen Gottes jedonen haud, om am derch daut doonen siene Henj too reizen, soo daut hee aus Jerobeam sien Hus wia, un wiels hee daut jeschloagen haud.

⁸Aum 26-sten Joa von Asa, däm Kjennich von Juda, wort Ela, de Sän von Baesa, Kjennich äwa Israel en Tirza, twee Joa.

⁹Un sien Kjnajcht Simri, de Bowaschta äwa de Halft de Woages, muak eene Veschwierunk jäajen am. Oba hee drunk un bedrunk sikj en Tirza, en Arzas sienem Hus, dee äwa daut Hus en Tirza wia.

¹⁰Un Simri kaum nenn un schluach am un muak am doot aum 27-sten Joa Asa, däm Kjennich von Juda; un hee wort Kjennich aun siene Städ.

¹¹Un daut passieed, aus hee Kjennich wia, sooboolt hee opp sienem Troon saut, schluach hee daut gaunze Hus Bascha; hee leet nuscht von am äwa, waut menlich wia, noch sien Bloot Frintschoft noch siene Frind.

¹²Soo vetiljd Simri daut Hus Baesa nom Wuat Gottes, daut hee derch Jehu, däm Profeet, jäajen Bascha jerät haud:

¹³Wäajen aul de Sinden Baesa un de Sinden Ela, sienem Sän, dee see begonen un Israel toom sindjen veleit hauden, soo daut see däm Harn, däm Gott Israels, reizte derch äare Jetta.

¹⁴Un daut Äwaje de Jeschicht Ela un aules, waut hee jedonen haft, es daut nich em Buak de Chronik de Kjennichs von Israel jeschräwen?

¹⁵Aum 27-sten Joa von Asa, däm Kjennich von Juda, rejieed Simri säwen Doag en Tirza. Daut Volkj beloagad Gibbeton, daut de Filista jehieed.

¹⁶Un aus daut Volkj em Loaga sajen hieed: Simri haft eene Veschwierunk jemoakt, un haft uk däm Kjennich jeschloagen, doa muak gaunz Israel Omri, däm Häabowaschten, aun däm seljen Dach, em Loaga, toom Kjennich äwa Israel.

¹⁷Un Omri, un gaunz Israel met am, jinkj von Gibbeton nopp, un see beloagaden Tirza.

¹⁸Un daut passieed, aus Simri sach, daut de Staut enjenomen wia, doa jinkj hee enne Burjch vom Kjennichshus un vebrend sikj met däm Kjennichshus met Fia un hee storf;

¹⁹wäajen siene Sinden, dee hee begonen haud, endäm hee deed, waut enne Uagen Gottes bees wia, endäm hee opp Jerobeam siene Wäaj jinkj un en siene Sinden, dee hee deed, soo daut hee Israel toom sindjen veleit haud.

²⁰Un de Äwaje Jeschicht Simri un siene Veschwierunk, dee hee jemoakt haud, es daut nich em Buak de Chronik de Kjennichs von Israel jeschräwen?

²¹Donn deeld daut Volkj sikj en 2 Halfte: De eene Halft vom Volkj jinkj met Tibni, Ginat sienem Sän, om am toom Kjennich too moaken; un de aundre Halft met Omri.

²²Oba daut Volkj, daut met Omri wia, wia stoakja aus daut Volkj, daut Tibni, Ginat sienem Sän, foljd; un Tibni storf, un Omri wort Kjennich.

²³Aum 31-sten Joa Asa, däm Kjennich von Juda, wort Omri Kjennich äwa Israel, 12 Joa; en Tirza rejieed hee sas Joa.

²⁴Un hee koft däm Boajch Samaria vom Schema fa 2 Talent Selwa; un hee bebud däm Boajch un jeef de Staut, dee hee jebut haud, däm Nomen Samaria, nom Nomen Schema, däm Harn vom Boajch.

²⁵Un Omri deed, waut enne Uagen Gottes bees wia; un hee muak daut oaja aus aule, dee ver am jewast wieren.

²⁶Un hee jinkj opp Jerobeam siene aule Wäaj, Nebat sienem Sän, un en siene Sinden, wuaderch hee Israel toom sindjen veleit haud, soo daut see däm Harn, däm Gott Israels, reizte derch äare nuschtje Jetze.

²⁷Un daut Äwaje de Jeschicht von Omri, waut hee jedonen, un siene Macht, dee hee utjeewt haud, es daut nich em Buak de Chronik de Kjennichs von Israel jeschräwen?

²⁸Un Omri läd sikj to siene Vodasch, un hee wort en Samaria begroft. Un Ahab, sien Sän, wort aun siene Städ Kjennich.

²⁹Un Ahab, Omri sien Sän, wort Kjennich äwa Israel aum 38-sten Joa von Asa, däm Kjennich von Juda; un Ahab, Omri sien Sän, rejieed 22 Joa äwa Israel en Samaria.

³⁰Un Ahab, Omri sien Sän, deed, waut enne Uagen Gottes bees wia, mea aus aula, dee ver am jewast wieren.

³¹Un daut passieed - wia daut to weinich, daut hee en Jerobeam siene Sinden, von Nebat sienem Sän, jinkj? - Daut hee Isebel, Etbaal siene Dochta, vom Kjennich äwa de Zidonita, to Fru neem; un hee jinkj han un deend däm Baal un bäd am aun.

³²Un hee recht däm Baal eenen Aultoa opp en Baal sienem Hus daut hee en Samaria jebut haud;

³³Ahab muak uk de Aschera. Un Ahab deed mea, om däm Harn, däm Gott Israels, too reizen, aus aule Kjennichs Israels, dee ver am jewast wieren.

³⁴Aun dee selje Tiet bud Hiel, de Betelita, Jericho wada opp. Met Abiram, sienem Ieeschtjebuarnen, läd hee däm Grunt, un met Segub, sienem Jinjsten, stald hee äare Dooasch opp, nom Wuat Gottes, daut hee derch Josua, Nuns sienem Sän, jerät haud.