Read De Bibel JHF 1. Kjennichs 19 Bible Online

1. Kjennichs 19 - De Bibel JHF bible

1. Kjennichs 19

¹Un Ahab berecht aules de Isebel, waut Elia jedonen haud, un aules, woo hee de Profeeten met daut Schwieet omjebrocht haud.

²Doa schekjt Isebel eenen Boote no Elia un leet am sajen: Soo sellen mie de Jetta doonen un daut doatoo doonen, wan ekj nich morjen om dise Tiet dien Läwen däm Läwen von jane eenem jlikj moak!

³Un aus hee daut sach, muak hee sikj opp un jinkj wajch om sien Läwen too raden, un kaum no Beerscheba, daut Juda jehieet; un hee leet sienen Jung doa trigj.

⁴Oba hee selfst jinkj enne Wieste, eene Doagesreis wiet, un kaum un sad sikj unja eenem Jinsta. Un hee bedd, daut siene Seel stoaft, un säd: Daut es jenuach; nemm nu, Har, miene Seel, dan ekj sie nich bäta aus miene Vodasch.

⁵Un hee läd sikj dol un schleep unja däm Jinsta en. Un kjikj doa, een Enjel schieed am aun un säd to am: Sto opp, at!

⁶Un aus hee hankjikjt, kjikj, doa lach aun sienem Haupt eene Kuak, opp eenem heeten Steen jebackt, un eene Kruck Wota. Un hee aut un drunk un läd sikj wada han.

⁷Un de Enjel Gottes kaum toom tweeden Mol un schieed am aun un säd: Sto opp, at! Dan du hast eenen wieden Wajch ver die.

⁸Un hee stunt opp un aut un drunk, un hee jinkj enne Krauft von disem Äten 40 Doag un 40 Nachten bat aun däm Boajch Gottes, däm Horeb.

⁹Un hee jinkj doa selfst enne Heel un bleef doa äwanacht. Un kjikj, daut Wuat Gottes wia to am, un hee säd to am: Waut deist du hia, Elia?

¹⁰Un hee säd: Ekj ha sea fa däm Harn jeiewat, däm Gott de Häaschoa; dan de Kjinja Israel ha dienen Bunt veloten, diene Aultoaren doljeräten un diene Profeeten met daut Schwieet omjebrocht; un ekj auleen sie äwajebläwen, un see sieekjen doano, mie daut Läwen too nämen.

¹¹Un hee säd: Go rut un stal die oppem Boajch ver däm Harn! Un kjikj, de Har jinkj vebie, un een Wint, groot un stoakj, vereet de Boaj un veschmatad de Steena ver däm Harn häa; de Har wia nich em Wint. Un nom Wint een Ieedbäben; de Har wia nich en däm Ieedbäben.

¹²Un nom Ieedbäben een Fia; de Har wia nich em Fia. Un nom Fia ne Stemm von eenem saunften Ruzhen.

¹³Un daut passieed, aus Elia daut hieed, doa vestuak hee sien Aunjesecht met sienen Mauntel, un jinkj rut un stald sikj aun däm Engank de Heel. Un kjikj, eene Stemm wia to am aulsoo: Waut deist du hia, Elia?

¹⁴Un hee säd: Ekj ha sea fa däm Harn jeiewat, däm Gott de Häaschoa; dan de Kjinja Israel ha dienen Bunt veloten, diene Aultoaren doljeräten un diene Profeeten met daut Schwieet omjebrocht; un ekj auleen sie äwajebläwen, un see sieekjen doano, mie daut Läwen too nämen!

¹⁵Un de Har säd to am: Go, go trigj opp dienem Wajch; no de Wieste von Damaskus; un wan du aunjekomen best, soo saulw Hasael toom Kjennich äwa Sierien.

¹⁶Un Jehu, Nimschi sien Sän, saust du toom Kjennich äwa Israel saulwen; un Elisa, Safat sien Sän, von Abel-Mehola, saust du toom Profeet saulwen aun diene Städ.

¹⁷Un daut saul passieren: Wäa vom Schwieet Hasael entkjeemt, däm woat Jehu ombrinjen; un wäa daut Schwieet von Jehu entkjeemt, dän woat Elisa ombrinjen.

¹⁸Oba ekj ha 7 000 en Israel äwajeloten, aul dee, dee Kjnee, dee sikj nich ver däm Baal jeboagen ha, un jiedret Mul, dee am nich jekusst haft.

¹⁹Un hee jinkj von doa wajch un funk Elisa, Safat sienem Sän, dee krakjt met 12 Joch Rinda ver sikj häa pläjd, un hee selfst wia bie de 12-te; un Elia jinkj no am han un schmeet sienen Mauntel opp am.

²⁰Un hee veleet de Rinda un rand Elia hinjaraun un säd: Lot mie doch mienem Voda un miene Mutta kussen, dan well ekj die nofoljen. Un hee säd to am: Go, un komm trigj! Dan waut ha ekj die jedonen?

²¹Un hee jinkj von am trigj un naum daut Joch Rinda un schlacht dee, un met däm Rinda Jescherr koakt hee daut Fleesch un jeef daut däm Volkj, un see auten; un hee muak sikj opp un jinkj met Elia un deend am.