Read De Bibel JHF 1. Kjennichs 20 Bible Online

1. Kjennichs 20 - De Bibel JHF bible

1. Kjennichs 20

¹Un Ben-Hadad, de Kjennich von Sierien, vesaumeld siene gaunze Häamacht; 32 Kjennichs wieren met am un Pieed un Woages; un hee jinkj nopp un beloagad Samaria un street jäajen an.

²Un hee schekjt Booten no Ahab, däm Kjennich von Israel, enne Staut,

³un leet am sajen: Soo sajcht Ben-Hadad: Dien Selwa un dien Golt es mient, un diene Frues un diene Säns, de baste, sent miene.

⁴Un de Kjennich von Israel auntwuad un säd: No dienem Wuat, mien Har Kjennich; diena sie ekj met aulem, waut mient es.

⁵Un de Booten kaumen wada un säden: Soo sajcht Ben-Hadad un sajcht: Wiels ekj no die jeschekj un die ha sajen loten: Dien Selwa un dien Golt, un diene Frues un diene Säns saust du mie jäwen;

⁶soo well ekj morjen om dise Tiet miene Kjnajchts no die schekjen, un see woaren dien Hus un de Hiesa von diene Kjnajchts derchsäkjen; un daut woat passieren, aules waut diene Uagen leeftolich es, woaren see en äare Henj nämen un metnäme.

⁷Doa roopt de Kjennich von Israel aule Laundeselteste un säd: Erkjant un kjikjt, daut disa beeset sieekjt; dan hee haft no mie jeschekjt om miene Frues un miene Säns, un mien Selwa un mien Golt, un ekj ha am daut nich aufjesajcht.

⁸Un aule Eltestasch un aulet Volkj säden to am: Jehorch nich un welij nich en!

⁹Un hee säd to de Booten von Ben-Hadad: Sajcht mienem Harn, däm Kjennich: Aules, waut du dienem Kjnajcht ieescht jesajcht hast, well ekj doonen; oba dise Sach kaun ekj nich doonen. Un de Booten jinjen han un brochten am de Auntwuat.

¹⁰Doa schekjt Ben-Hadad no am un leet sajen: Soo sellen mie de Jetta doonen un doatoo doonen, wan de Stoff von Samaria uträkjen sull fa aule ladje Volkjshenj, daut met mie es!

¹¹Un de Kjennich von Israel auntwuad un säd: Sajcht am: Daut saul sikj nich riemen dee daut Schwieet drajcht aus dee daut aufjelajcht haft!

¹²Un daut passieed, aus hee dit Wuat hieed, - hee drunk krakjt, hee un de Kjennichs, enne Zelten - doa säd hee to siene Kjnajchts: Stalt junt opp! Un see stalden sikj jäajen de Staut.

¹³Un kjikj, een Profeet kaum no Ahab, däm Kjennich von Israel, un säd: Soo sajcht de Har: Hast du disem groote Hupe jeseenen? Kjikj, ekj jäw am vondoag en diene Haunt, un du saust weeten, daut ekj de Har sie.

¹⁴Un Ahab säd: Derch wäm? Un hee säd: Soo sajcht de Har: Derch de Kjnajchts de Bowaschte de Lenda. Un hee säd: Wäa saul däm Kaumf aunfangen? Un hee säd: Du.

¹⁵Doa mostad hee de Kjnajchts de Laundesbowaschten, un daut wieren 232; un no an mostad hee daut gaunze Volkj, aule Kjinja Israel, 7000 Maun.

¹⁶Un see jinjen opp Meddach ut. Oba Ben-Hadad drunk un bedrunk sikj em Zelt, hee un de Kjennichs, dee 32 Kjennichs, dee am holpe.

¹⁷Un de Bowaschte vonne Lenda äare Kjnajchts jinjen de ieeschte rut. Un Ben-Hadad schekjt han, un maun berecht am un säd: Daut sent Mana ut Samaria jekomen.

¹⁸Doa säd hee: Wan see en Fräd utjegonen sent, soo jriept an läwendich; un wan see toom Kaumf utjegonen sent, soo jriept an läwendich.

¹⁹Oba dise jinjen ut de Staut; de Laundesbowaschten äare Kjnajchts un daut Häa, daut hinja an jinkj.

²⁰Un een jiedra schluach sienen Maun, un de Siera randen, un Israel juach an no; un Ben-Hadad, de Kjennich von Sierien, kaum wajch opp eenem Pieet met eenje Rittasch.

²¹Doa jinkj de Kjennich von Israel ut un schluach Pieed un Woages, un hee recht unja de Siera eene groote Schlacht aun.

²²Doa kaum de Profeet nom Kjennich von Israel un säd to am: Go han, stoakj die, un erkjan un kjikj too, waut du to doonen hast; dan de Kjennich von Sierien woat jäajen die noppkomen, wan daut Joa vebie es.

²³Un de Kjnajchts von Kjennich von Sierien säden to am: Äare Jetta sent Boajchjetta, doarom ha see ons äwawaultijt; doch lot ons enne Läacht jäajen an strieden, auf wie an nich äwawaultjen!

²⁴Oba doo dit: Doo de Kjennichs wajch, eenen jiedren von sienem Uat, un sat Stauthoola aun äare Städ;

²⁵un du, veschauf die een Häa aus daut Häa, daut du veloaren hast, un Pieed aus dee Pieed, un Woages aus dee Woages; un wie wellen enne Läacht jäajen an strieden, auf wie an nich äwawaultjen! Un hee hieed opp äare Stemm un deed aulsoo.

²⁶Aus nu daut Joa vebie wia, doa mostad Ben-Hadad de Siera, un hee jinkj nopp no Afek toom Kaumf met Israel.

²⁷Un de Kjinja Israel worden jemostat un vesorcht, un see jinjen an entjäajen; un de Kjinja Israel loagaden sikj an jäajenäwa aus 2 kjliene Häaden Kose; oba de Siera felden daut Launt.

²⁸Doa kaum de Maun Gottes doatoo un räd toom Kjennich von Israel un säd: Soo sajcht de Har: Wiels de Siera jesajcht ha: De Har es een Gott de Boaj un nich een Gott de Läachten, soo well ekj disem gaunz groote Hupe en diene Haunt jäwen; un jie woaren erkjanen, daut ekj de Har sie.

²⁹Un see loagaden, dise jane jäajenäwa, säwen Doag. Un daut passieed aum säwenden Dach, doa funk de Schlacht aun; un de Kjinja Israel schluagen de Siera, 100 000 Maun too Foot, aun eenem Dach.

³⁰Un de Äwaje randen no Afek enne Staut. Doa foll de Mia opp de 27 000 Maun, dee äwa jebläwen wieren. Un Ben-Hadad rand un kaum enne Staut, un rand ut eene Stow enne aundre.

³¹Doa säden siene Kjnajchts to am: Kjikj doch, wie ha jehieet, daut de Kjennichs vom Hus Israel boarmhoatje Kjennichs sent; lot ons doch Sakduak om onse Lenden binjen un Strenj om onse Heipta, un nom Kjennich von Israel rutgonen; veleicht lat hee diene Seel aum Läwen.

³²Un see bungen sikj Sakduak om äare Lenden un Strenj om äare Heipta, un kaumen nom Kjennich von Israel un säden: Dien Kjnajcht Ben-Hadad sajcht: Lot doch miene Seel aum Läwen! Un hee säd: Läft hee noch? Hee es mien Brooda.

³³Un de Mana neemen daut aus een goodet Tieekjen opp, un spooden sikj daut bestädjen to loten, auf hee daut werkjlich soo meent, un säden: Dien Brooda Ben-Hadad. Un hee säd: Got, holt am. Doa jinkj Ben-Hadad no am rut, un hee leet am no sikj oppem Woagen stieen.

³⁴Un Ben-Hadad säd: De Städa, dee mien Voda dienem Voda jenomen haft, well ekj die trigj jäwen, un du kaust die Gaussen en Damaskus aunlajen, soo aus mien Voda sikj dee en Samaria aunjelajcht haft. Un ekj, säd Ahab, well die met disem Bunt gonen loten. Un hee muak eenen Bunt met am un leet am gonen.

³⁵Un een Maun von de Profeeten Säns säd to siene Frind derch daut Wuat Gottes: Schloh mie doch! Oba de Maun wäad sikj, am to schlonen.

³⁶Doa säd hee to am: Doarom daut du nich oppe Stemm Gottes jehieet hast, kjikj, sooboolt du von mie wajchjeist, woat die een Leiw dootmoaken. Un aus hee von am wajchjinkj, doa funk am een Leiw un muak am doot.

³⁷Un hee troff eenen aundren Maun un säd: Schloh mie doch! Un de Maun schluach am, schluach un vewund am.

³⁸Doa jinkj de Profeet han un stald sikj oppem Kjennichswajch, un jeef sikj nich too erkjanen, endäm hee de Koppbinj äwa siene Uagen trock.

³⁹Un daut passieed, aus de Kjennich vebie jinkj, doa schrieech hee däm Kjennich aun un säd: Dien Kjnajcht wia medden em Striet jegonen, un kjikj, doa dreid sikj de Maun no am un brocht eenen Maun no am un säd: Bewoak disem Maun; wan hee veschwinjt, soo saul dien Läwen aun staut sienem Läwen sennen, ooda du saust een Talent Selwa aufwäaje.

⁴⁰Un daut passieed, nu wiels dien Kjnajcht hia un dort to doonen haft, doa wia hee wajch. Un de Kjennich von Israel säd to am: Aulsoo es dien Uadeel, du selfst wust daut soo.

⁴¹Doa deed hee schwind sien Koppbaunt von siene Uagen, un de Kjennich von Israel erkjand am, daut hee vonne Profeeten wia.

⁴²Un hee säd to am: Soo sajcht de Har. Wiels du däm Maun, däm ekj vebaunt ha, ut diene Haunt loosjeloten hast, soo saul dien Läwen staut sienem Läwen sennen un dien Volkj staut sien Volkj!

⁴³Un de Kjennich von Israel jinkj no sienem Hus, oppjeräacht un oajalich, un kaum no Samaria.