Read De Bibel JHF 1. Kjennichs 21 Bible Online

1. Kjennichs 21 - De Bibel JHF bible

1. Kjennichs 21

¹Un no dise Dinj passieed daut: Nabot, de Jesreelita, haud eenen Wienboajch, dee en Jesreel wia, bie Ahab sienem Paulaust, däm Kjennich von Samaria.

²Un Ahab räd too Nabot un säd: Jeff mie dienen Wienboajch, daut hee mien Jemiesgoaden woat, dan hee es dicht bie mienem Hus; un ekj well die staut däm eenen bätren Wienboajch jäwen; ooda wan daut en diene Uagen goot es, well ekj die Jelt jäwen, soo väl hee jelt.

³Oba Nabot säd to Ahab: Daut lot de Har wiet von mie sennen, daut ekj die daut Oawdeel von mienem Voda jäwen sull!

⁴Un Ahab kaum en sien Hus, oppjeräacht un oajalich äwa daut Wuat, daut Nabot, de Jisreelita, to am jerät haud, endäm hee säd: Ekj well die daut Oawdeel von mienem Voda nich jäwen. Un hee läd sikj opp sien Bad un dreid sien Aunjesecht auf un aut nuscht.

⁵Un Isebel, siene Fru, kaum no am nenn un säd to am: Wuarom es dien Jeist ontofräd, un wuarom atst du nuscht?

⁶Un hee säd to ar: Wiels ekj too Nabot, däm Jisreelita, jerät un am jesajcht ha: Jeff mie dien Wienboajch fa Jelt, ooda wan du Lost hast, well ekj die doaväa eenen aundren Wienboajch jäwen; oba hee sajcht: Ekj well die miene Wienboajch nich jäwen.

⁷Doa säd Isebel, siene Fru, to am: Du, eewst du nu Kjennichsmacht äwa Israel ut? Sto opp, at, un lot dien Hoat sikj freien. Ekj woa die Nabot sien Wiengoaden, vom Jisreelita, jäwen.

⁸Un see schreef Breew en Ahab sienem Nomen un vesäajeld dee met sienem Säajel, un schekjt de Breew aun de Eltestasch un aun de Adelje, dee en siene Staut wieren, dee met Nabot toop wonden.

⁹Un see schreef enne Breew aulsoo: Roopt een Fausten ut, un sat Nabot bowen unjrem Volkj;

¹⁰un sat 2 Mana, Säns Belial, am jäajenäwa, daut see jäajen am zeijen un sajen: Du hast Gott un däm Kjennich jelastat! Un fieet am rut un steenicht am, daut hee stoaft.

¹¹Un de Mana en siene Staut, de Eltestasch un de Adelje, dee en siene Staut wonen, deeden, aus Isebel an befoolen haud, soo aus enne Breew jeschräwen wia, dee see aun an jeschekjt haud.

¹²See roopten een Fausten ut, un saden Nabot bowen unjrem Volkj;

¹³un de twee Mana, de Säns Belial, kaumen un saden sikj am jäajenäwa; un de Belials Mana zeijde jäajen am, jäajen Nabot, ver däm Volkj un säden: Nabot haft Gott un däm Kjennich jelastat! Un see fieeden am utte Staut rut un steenijden am, un hee storf.

¹⁴Un see schekjten no Isebel un leeten ar sajen: Nabot es jesteenicht worden un es jestorwen.

¹⁵Un daut passieed, aus Isebel hieed daut Nabot jesteenicht wort un jestorwen wia, doa säd Isebel too Ahab: Moak die opp, nemm däm Wienboajch von Nabot, vom Jisreelita, aus Ieejentum, däm hee die fa Jelt nich jäwen wull; dan Nabot läft nich mea, sonda es doot.

¹⁶Un daut passieed, aus Ahab hieed, daut Nabot doot wia, doa muak Ahab sikj opp, om en däm Wienboajch von Nabot, von Jisreelita, rauftogonen, om am entonämen.

¹⁷Doa wia daut Wuat Gottes too Elia, däm Tischbita, aulsoo:

¹⁸Moak die opp, go rauf, Ahab, däm Kjennich von Israel, entjäajen, dee en Samaria es; kjikj, hee es en Nabot sienem Wienboajch, doahan es hee raufjegonen, om am entonämen.

¹⁹Un du räd to am un saj: Soo sajcht de Har: Du hast omjebrocht un uk framdet jenomen? Un räd to am un saj: Soo sajcht de Har: Aun dee Städ, woa de Hunj daut Bloot von Nabot jelekjt ha, sellen de Hunj, uk dien Bloot lekjen.

²⁰Un Ahab säd to Elia: Hast du mie jefungen, mien Fiend? Un hee säd: Ekj ha die jefungen, wiels du die vekoft hast, om to doonen, waut enne Uagen Gottes bees es.

²¹Kjikj, ekj well Onjlekj äwa die brinjen un hinja die häa utfeaje; un ekj woa von Ahab utroden, waut menlich es, soo aus däm Jebungnen aus uk däm Frieen en Israel;

²²un ekj woa dien Hus aus daut Hus von Jerobeam moaken, Nebat sienem Sän, un aus daut Hus Baesa, Achija sienem Sän, wäajen däm Reizen, met waut du mie jereizt un Israel toom sindjen veleit hast.

²³Un uk von Isebel haft de Har jerät un jesajcht: De Hunj sellen Isebel fräten aun de Mia von Jesreel.

²⁴Wäa von Ahab enne Staut stoaft, däm sellen de Hunj fräten, un wäa oppe Stap stoaft, däm sellen de Himmelsväajel fräten.

²⁵(Daut es kjeena aus Ahab jewast, dee sikj vekoft haud, om to doonen, waut enne Uagen Gottes bees es, dee Isebel, siene Fru, veleit.

²⁶Un hee deed sea väl Aufschu, endäm hee de Jetta no jinkj, no aulem, waut de Amorita jedonen, dee de Har vere Kjinja Israel rutjejoacht haud).

²⁷Un daut passieed, aus Ahab dise Wieed hieed, doa vereet hee siene Kjleeda un läd Sakduak om sien Lief un faust; un hee lach em Sakduak, un hee jinkj stell omhäa.

²⁸Doa wia daut Wuat Gottes too Elia, däm Tischbita, aulsoo:

²⁹Du hast jeseenen, daut Ahab sikj ver mie jedeemooticht haft? Wiels hee sikj ver mie jedeemooticht haft, well ekj daut Onjlekj nich en siene Doag brinjen; en de Doag von sienem Sän well ekj daut Onjlekj äwa sien Hus brinjen.