Read De Bibel JHF 1. Kjennichs 5 Bible Online

1. Kjennichs 5 - De Bibel JHF bible

1. Kjennichs 5

¹Un Salomo wia Harscha äwa aule Kjennichrikjs, vom Stroom [Eufrat] bat nom Launt de Filista un aune ägiptische Jrens; see brochten Jeschenkja un deenden Salomo un deenden am Läwen lank.

²Un daut Läwensmeddel fa Salomo fa eenem Dach wia; 30 Kor fienet Mäl un 60 Kor aundret Mäl,

³10 jemaste Rinda un 20 Rinda vonne Weid un 100 Schop; onen de Hersche un Ree un Antilope un daut jemaste Fadavee.

⁴Dan hee harscht äwa daut gaunze Launt aun dise Sied vom Stroom, von Tifsach bat Gasa, äwa aule Kjennichs aun dise Sied vom Stroom; un hee haud Fräd runtom no aule Sieden han.

⁵Un Juda un Israel wonden en Sechaheit, een jiedra unja sienem Wienstock un unja sienem Fiejenboom, von Dan bat Beerscheba, Salomo siene aule Doag.

⁶Un Salomo haud 40 000 Plauz fa Pieed un siene Woages, un 12 000 Rittasch.

⁷Un jane Oppsechta vesorjde däm Kjennich Salomo, un aule, dee no Salomo sienem Kjennichsdesch kaumen, een jiedra en sienem Moonat; see leeten daut aun nuscht fälen.

⁸Un däm Joascht un daut Stroo fa de Pieed un fa de Ranpieed brochten see aun däm Uat, wua hee wia, een jiedra no siene Väaschreft.

⁹Un Gott jeef Salomo Weisheit un sea groote Ensecht, un een wiedet Hoat, aus de Saunt, dee aum Mäaeewa es.

¹⁰Un Salomo siene Weisheit wia jrata aus de Weisheit von aule Säns von Oosten un aus de Weisheit de Ägipta.

¹¹Un hee wia weisa aus aule Menschen, aus Ethan, de Esrachita, un Heman un Kalkol un Darda, de Säns Machol. Un sien Nomen wia bekaunt unja aule Nazionen, runtom.

¹²Un hee räd 3000 Spricha, un siene Leeda wieren 1005.

¹³Un hee räd äwa de Beem, vonne Zeeda, dee oppem Libanon es, bat toom Isop, dee aune Mia rut waust; un hee räd äwa daut Vee un äwa de Väajel un äwa daut Krupende un äwa de Fesch.

¹⁴Un maun kaum ut aule Velkja, om de Weisheit von Salomo to hieren, von aule Kjennichs de Ieed, dee von siene Weisheit jehieet hauden.

¹⁵Un Hiram, de Kjennich von Tierus, schekjt siene Kjnajchts no Salomo, dan hee haud jehieet, daut maun am toom Kjennich jesaulft haud aun sienem Voda siene Städ; dan Hiram wia emma David sien Frint jewast.

¹⁶Un Salomo schekjt no Hiram un leet am sajen:

¹⁷Du weetst, daut mien Voda David nich kunn, däm Nomen Gottes, sienem Gott, een Hus too buen, wäajen de Kjrichs, met dee see am omjeewen, bat de Har an unja siene Footsohle läd.

¹⁸Oba nu haft de Har, mien Gott, mie runtom Ru jeschauft; doa es kjeen Jäajna mea un kjeena dee doa aunjript.

¹⁹Un kjikj, ekj jedenkj däm Nomen Gottes, mienem Gott, een Hus too buen, soo aus de Har to mienem Voda David jerät un jesajcht haft: Dien Sän, däm ekj aun diene Städ opp dienem Troon saten woa, dee saul mienem Nomen een Hus buen.

²⁰Un nu Befäl, daut maun mie Zeeda vom Libanon hakt; un miene Kjnajchts sellen met diene Kjnajchts sennen; un däm Loon von diene Kjnajchts well ekj die no aulem jäwen, waut du sajen woascht; jo, dan du weetst, daut kjeena unja ons es, dee Holt too haken vesteit aus de Zidonia.

²¹Un daut passieed, aus Hiram de Wieed von Salomo hieed, doa freid hee sikj sea; un hee säd: Jeloft es de Har vondoag, dee David eenen weisen Sän jejäft haft äwa dit groote Volkj!

²²Un Hiram schekjt no Salomo un leet am sajen: Ekj ha jehieet, waut du mie too sajen hast; ekj well aul diene Wensch doonen betrafs däm Zeedaholt un betrafs däm Zupresholt.

²³Miene Kjnajchts sellen daut no Libanon nom Mäa raufbrinjen; un ekj woa oppem Mäa Promm moaken un dee bat aun däm Uat brinjen loten, däm du mie aunjäwen woascht, un doa well ekj dee selfst uteneen buen loten; un du saust daut aufholen. Oba du saust mien Wensch erfellen, endäm du Läwensmeddel mienem Hus jefst.

²⁴Un soo jeef Hiram däm Salomo Zeedaholt un Zupresholt no aul sienem Wensch.

²⁵Oba Salomo jeef Hiram 20 000 Kor Weit fa sien Hus toom äten, un 20 Kor jestaumtet Eelj; soo jeef Salomo dän Hiram Joa fa Joa.

²⁶Un de Har jeef Salomo Weisheit, soo aus hee to am jerät haud; un daut wia Fräd tweschen Hiram un Salomo, un see muaken eenen Bunt metenaunda.

²⁷Un de Kjennich Salomo hold ut gaunz Israel de Opploagoabeida, un de Opploagoabeida wieren 30 000 Maun.

²⁸Un hee schekjt an oppem Libanon, 10 000 em Moonat, aufwakjselnd; eenen Moonat wieren see oppem Libanon, twee Moonat en äarem Hus; un Adoniram wia äwa de Opploagoabeida.

²⁹Un Salomo haud 70 000 Laustdroaga un 80 000 Steenschnieda enne Boaj,

³⁰onen Salomo siene bowaschten Oppsechta, dee äwa de Oabeit wieren, 3 300, dee äwa daut Volkj wieren, daut aune Oabeit beschafticht wia.

³¹Un de Kjennich befool, un see brochten groote Steena, wieetvollen Steena, om däm Husgrunt too lajen, behakte Steena.

³²Un Salomo siene Bulied un Hiram siene Bulied un de Giblita behakte dee, un see muaken daut Holt un de Steena toom Hus Bu reed.