Read De Bibel JHF 1. Kjennichs 6 Bible Online

1. Kjennichs 6 - De Bibel JHF bible

1. Kjennichs 6

¹Un daut passieed om 480 Joa nom Utgank de Kjinja Israel ut däm Ägiptenlaunt, aum vieeden Joa de Rejierunk von Salomo äwa Israel, em Moonat Siw, daut es de tweeda Moonat, doa bud hee däm Harn daut Hus.

²Un daut Hus, daut de Kjennich Salomo däm Harn bud; siene Lenj wia 60 Ellen lank, un 20 Ellen breet, un 30 Ellen huach.

³Un de Haul ver däm Tempelhus; 20 Ellen lank no de Breed vom Hus; 10 Ellen breet, ver däm Hus häa.

⁴Un hee muak Fensta aum Hus, met fauste Stangen doafäa.

⁵Un hee bud runtom aune Wenj vom Hus een Stockwoakj, runtom aune Huswenj, soo aus aum Tempel un aun däm hinjaschten Rum; un hee muak runtom aune Sieden Stowen.

⁶Daut unjaschte Stock wia fief Ellen Breet, un daut meddlere, sas Ellen breet, un daut dredde, säwen Ellen breet; dan hee muak von buten aum Hus eene Kaunt, om nich enne Huswenj nenn tojriepe.

⁷Un daut Hus wort bie sienem Oppbuen ut gaunz behakte Steena jebut; un Homa un Biel, irjent een iesanet Jereetschoft, wort nich aum Hus jehieet, aus daut oppjebut wort.

⁸De Engank enne unjaschte Stowen wia aune rajchte Sied vom Hus; un met ne runde Trap jinkj maun no de meddelste, un von de meddelste nom dredden nopp.

⁹Un hee bud daut Hus un muak daut foadich, un hee dakjt daut Hus met Baulkjes un Räje von Zeedaholt.

¹⁰Un hee bud daut Stockwoakj aum gaunzen Hus, fief Ellen huach; un dee wieren met däm Hus derch Zeedaholt vebungen.

¹¹Un daut Wuat Gottes wia too Salomo, endäm hee säd:

¹²Dit Hus, daut du bust - wan du en miene Sazungen gonen un miene Rajchte doonen un aul miene Jebooten hoolen woascht, daut du doarenn waundelst, soo woa ekj die - mien Wuat faust hoolen, daut ekj too dienem Voda David jerät ha;

¹³un ekj woa enne Medd de Kjinja Israel wonen un woa mien Volkj Israel nich veloten.

¹⁴Un Salomo bud daut Hus un muak daut foadich.

¹⁵Un hee bud de Huswenj von bennen met Zeedabräda; von de Flua em Hus bat aum Bän äwatrock hee von bennen de Wenj met Holt; un de Husflooa wia met Zupresbräda utjelajcht.

¹⁶Un hee bud 20 Ellen von de hinjaschte Sied vom Hus met Zeedabräda, vonne Flua de Wenj; un hee bud dee von bennen nom bennaschten Rum, nom Aulaheilichsten.

¹⁷Un daut Hus, daut es de Tempel, väare - ver däm bennaschten Rum, wia 40 Ellen lank.

¹⁸Un daut Zeedaholt von bennen em Hus, wia jeschnitztet Woakj von Kolokwinte un henjende Bloomen; aules wia von Zeedaholt, kjeen Steen wia toseenen.

¹⁹Un de bennaschte Rum von bennen em Hus muak hee, om de Bundeslod Gottes doahan too saten;

²⁰un daut Bennaschte vom bennaschten Rum wia 20 Ellen lank un 20 Ellen breet un 20 Ellen huach; un hee äwatrock am met reinem Golt; uk däm Zeedaholtaultoa äwatrock hee doamet.

²¹Un Salomo äwatrock daut Hus von bennen met reinem Golt; un hee trock goldne Kjäden ver däm bennaschten Rum väa, un äwatrock am met Golt.

²²Un daut gaunze Hus äwatrock hee met Golt, vollstendich - daut gaunze Hus; uk däm gaunzen Aultoa, dee toom bennaschten Rum jehieet, äwatrock hee met Golt.

²³Un hee muak em bennaschten Rum twee Cherubim von eeljboom Holt, 10 Ellen huach;

²⁴un fief Ellen maut de eene Flicht vom Cherubim, un fief Ellen de aundre Flicht vom Cherubim; 10 Ellen von däm eenen Enj siene Flichten bat nom aundren Enj siene Flichten;

²⁵un 10 Ellen maut de aundra Cherub; beid Cherubim hauden eene Mot un een Jeschekj.

²⁶10 Ellen wia een Cherub huach, un krakjt soo de aundra Cherub.

²⁷Un hee stald de Cherubim em bennaschten Hus; un de Cherubim breeden äare Flichten ut, soo daut de Flichten von eenem aune Waunt aunschieeden un de Flicht vom aundren Cherub aun de aundre Waunt aunschiad; un äare Flichten, no de Medd vom Hus han, reade Flicht aun Flicht.

²⁸Un hee äwatrock de Cherubim met Golt.

²⁹Un aun aule Huswenj runtom schnitzt hee ennjeschnitzte Cherubim un Paulmen un opblieejende Bloomen, von bennen un von buten.

³⁰Un de Flua em Hus äwatrock hee met Golt, von bennen un von buten.

³¹Un fa däm Engank em bennaschten Rum muak hee Däaflichte von Eeljboom Holt; de Spunj, de Past, muaken daut fäfte Deel vonne Waunt ut.

³²Un en de twee Däaflichte von Eeljboom Holt, doa bowen schnitzt hee Schnitzwoakj von Cherubim un Paulmen un opblieejende Bloomen, un hee äwatrock dee met Golt; uk de Cherubim un de Paulmen äwatrock hee met Golt.

³³Un krakjt soo muak hee fa däm Engank em Tempel Past von Eeljboom Holt vea kauntich,

³⁴un twee Däaflichte von Zupresholt; ut twee Dreidäabläda wia de eene Flicht, un ut twee Dreidäabläda de aundre Flicht.

³⁵Un hee schnitzt Cherubim un Paulmen un opblieejende Bloomen nenn un äwatrock dee met Golt, daut däm Jeschnitztem aunjepausst wia.

³⁶Un hee bud däm bennaschten Hoff ut dree Rieeje behakte Steena un ut eene Rieej Zeedabaulkjes.

³⁷Aum vieeden Joa wort de Grunt fa daut Hus Gottes jelajcht, em Moonat Siw;

³⁸un aum 11-ten Joa, em Moonat Bul, daut es de achta Moonat, wia daut Hus foadich, no aul siene Stekja un no aul siene Väaschreft; un soo bud hee säwen Joa doaraun.