Read De Bibel JHF 1. Kjennichs 7 Bible Online

1. Kjennichs 7 - De Bibel JHF bible

1. Kjennichs 7

¹Un aun sienem Hus bud Salomo 13 Joa, un wia met sienem gaunzen Hus foadich.

²Un zwoa bud hee daut Hus vom Woolt Libanon, 100 Ellen lank, un 50 Ellen breet, un 30 Ellen huach, opp 4 Rieeje von Zeeda Stendasch, un Zeeda Baulkjes oppe Stendasch;

³un daut wia met Zeedaholt jedakjt bowen äwa de Stowen aune Sied, dee oppe Stendasch wieren, 45, 15 enne Rieej.

⁴Un de Baulkjes wieren en 3 Rieeje, un Fensta jäajen Fensta, dree Mol .

⁵Un aule Däaren un Past wieren 40, met Däarejäwel, un Fensta jäajen Fensta, dree Mol .

⁶Un hee muak de Haul von Stendasch, 50 Ellen lank un 30 Ellen breet; un noch eene Väahaul met Stendasch un eene Schwal doaväa.

⁷Un hee muak de Troonhaul, om doa too rechten, de Jerechtshaul; un dee wia met Zeedaholt utjelajcht, vonne Flua bat aum Bähn.

⁸Un sien Hus, en däm hee wond, em aundren Hoff enne Haul, wia aus dit Woakj. Un Salomo bud uk de Dochta vom Farao, dee hee to Fru jenomen haud, een Hus aus dise Haul.

⁹Daut aules wia ut wieetvollen Steena, ut Steena, dee nom Mot behackt wieren, met de Soag jesoagt von bennen un von buten, un zwoa von de Gruntloag bat aum Dak, un von buten bat nom groote Hoff.

¹⁰Un de Gruntloag wia ut wieetvollen Steena, ut groote Steena, Steena von 10 Ellen un Steena von acht Ellen.

¹¹Un doaräwa wieren wieetvollen Steena, dee nom Mot behackt wieren, un Zeedaholt.

¹²Un runtom de groota Hoff wia ut dree Rieejen behakte Steena un eene Rieej Zeedabaulkjes; soo wia daut uk met däm bennaschten Hoff vom Hus Gottes un met de Haul vom Hus.

¹³Un de Kjennich Salomo schekjt han un leet Hiram von Tierus holen.

¹⁴Daut wia de Sän von eene Wätfru ut däm Staum Naftali, (oba sien Voda wia eena ut Tierus), een Koppa Schmett; un hee wia voll Weisheit un Ensecht un Erkjantnis, om aulalei Woakj von Koppa too moaken; un hee kaum nom Kjennich Salomo un muak sien gaunzet Woakj.

¹⁵Un hee muak de dree Stendasch von Koppa; 18 Ellen huach wia een Stenda, un een baunt von 12 Ellen wia om däm aundren Stenda.

¹⁶Un hee muak 2 Knoppes, ut Koppa jegoten, om dee oppe Stenda Spetz to saten; fief Ellen huach wia een Knoppen, un fief Ellen huach de aundra Knoppe.

¹⁷Jeflochtnet Nat, Schnua aus Kjäden wieren aune Knoppes, dee oppe Spetzen de Stendasch wieren; 7 aun däm eenen Knoppe, un 7 aun däm aundren Knoppe.

¹⁸Un hee muak Grenautapel, en 2 Räje runtom, äwa daut eene Natwoakj, om de Knoppes too bedakjen, dee oppe Spetz de Stendasch wieren, un krakjt soo muak hee daut aun de aundre Knoppes.

¹⁹Un de Knoppes dee oppe Spetzen de Stendasch wieren, wieren aus de Lelje enne Haul jemoakt, vea Ellen huach.

²⁰Un Knoppes wieren uk bowen opp beid Stendasch, dicht aum Raunt, dee aun jane Sied vom jeflochtnen wia. Un 200 Grenautapel wieren runtom enne Rieej, aun däm aundren Knoppe.

²¹Un hee stald de Stendasch bie de Tempel Haul opp; hee stald däm rajchten Stenda opp un jeef am däm Nomen Jakin, un hee stald däm linkjen Stenda opp un jeef am däm Nomen Boas.

²²Un oppe Spetz de Stendasch wia Leljeoabeit. Un soo wort daut Woakj aune Stendasch foadich.

²³Un hee muak daut Mäa, jegoten, 10 Ellen von sienem Raunt bat nom aundren Raunt, runtom rund, un fief Ellen huach; un eene Schnua von 30 Ellen rieekjt runtom.

²⁴Un no unjen vom Raunt runtom wieren Kolokwinte aunjebrocht, 10 oppe Elle, omjeewen runtom daut Mäa; 2 Räje von Kolokwinte, jegoten ut eenem Stekj.

²⁵Daut stunt opp 12 Rinda; 3 nom Nuaden jedreit, un 3 nom Wasten jedreit, un 3 nom Sieden jedreit, un 3 nom Oosten jedreit; un daut Mäa wia doabowen, un aule hinjaschte Deele wieren no bennen jedreit.

²⁶Un wia eene Hauntbreet dikj, un sien Raunt wia aus een Kuffelraunt, aus eene Leljebloom; un 2000 Bat kunnen doa nenn.

²⁷Un hee muak 10 Jestalen von Koppa; vea Ellen lank wia een Jestal, un vea Ellen breet, un 3 Ellen huach.

²⁸Un dit wia de Oabeit aune Jestalen; daut wieren Plaken aun an, un de Plaken wieren aun de Akjleeste;

²⁹un oppe Plaken, dee tweschen de Akjleeste wieren, wieren Leiws, Rinda un Cherubim; un bowen oppe Akjleeste een Spunj; un ne unjen de Leiws un de Rinda wieren raufhenjende Kjrens.

³⁰Un dit Jestal haud 4 koppane Räda un koppane Ausse, un siene vea Feet hauden Schullastekja; unja de Komm wieren Schullastekja aunjegote; jäajenäwa de Kjrens.

³¹Un daut Loch, von bennen de Kroon un doaräwa, wia bie eene Elle, un daut Loch wia rund, aus een Stendafoot, eene Elle un eene haulwe Elle; un uk aum Lochraunt wia jeschnitztet. Un äare Leeste wieren veakauntich, nich rund.

³²Un de 4 Räda wieren von bennen aune Leeste; un de Ausse von de Räda wieren aum Jestal; un daut Raut wia eene Elle un eene haulwe Elle huach;

³³un dee wieren aus Woagenräda; un äare Ausse, Nowel, Späkje un Raut wieren jegoten.

³⁴Un 4 Schullastekja wieren aun de vea Akjen vom Jestal; ut däm Jestal wieren siene Schullastekja.

³⁵Un aum bowaschten Deel vom Jestal wia eene haulwe Elle hecha, runtom; un aum bowaschten Deel vom Jestal wieren Hoakes un Leeste ut eenem Stekj.

³⁶Un hee schnitzt enne Toflen un en siene Sieden un opp siene Leeste Cherubim, Leiws un Paulmbeem nenn, nom Rum fa jiedrem, un Kjrens runtom.

³⁷Soo muak hee de 10 Jestalen; ut eenem Stekj, eene Mot un eene Jestault fa aule.

³⁸Un hee muak 10 Kommen von Koppa; 40 Bat jinjen en eene Komm nenn; eene Komm wia vea Ellen groot; un opp jiedrem de 10 Jestalen wia eene Komm.

³⁹Un hee sad de Jestalen, fief aune rajchte Sied vom Hus, un fief aune linkje Sied vom Hus. Un daut Mäa sad hee aune rajchte Sied vom Hus oostlich, jäajen Sieden.

⁴⁰Un Hiram muak de Tap un de Schefflen un de sprets Jefässa. Un soo muak Hiram de Oabeit vom gaunzen Woakj foadich, daut hee däm Kjennich Salomo fa daut Hus Gottes muak:

⁴¹Twee Stendasch un de kugelrunde Knoppes, dee oppe Spetzen de Stendasch wieren; un de twee Kjrens, om de kugelrunde Knoppes too vedakjen, dee oppe Spetzen de Stendasch wieren;

⁴²un dee 400 Grenautapel to de beid Kjrens; 2 Rieej Grenautapel fa jiedrem Kraunz, om de beid kugelrunde Knoppes too vedakjen, dee bowen oppe Stendasch wieren;

⁴³un de 10 Jestalen, un de 10 Kommen oppe Jestalen;

⁴⁴un daut eene Mäa, un de 12 Rinda unja daut Mäa;

⁴⁵un de Tap un de Schefflen un de sprets Jefässa. Un aul dit Jereetschoft, daut Hiram däm Kjennich Salomo fa daut Hus Gottes muak, wieren von glautem Koppa.

⁴⁶Enne Jordan Jäajent leet de Kjennich dee jeeten, en dichte Ieed, tweschen Sukkot un Zaretan.

⁴⁷Un Salomo leet aulet Jereetschoft onjewoage von äwagroote Menj, daut Koppa Jewicht wort nich faustjestalt.

⁴⁸Un Salomo muak aul dit Jereetschoft, dee em Hus Gottes wieren: Däm goldnen Aultoa; un däm goldnen Desch, opp däm de Aunsechtsbrood lagen;

⁴⁹un de fief Laumpen aune Rajchte un fief Laumpen aune Linkje ver däm bennaschten Rum, von reinem Golt; un de Bloomen un de Laumpen un de Lichtschäaren von Golt;

⁵⁰un de Schiewen un de Massasch un de Kommen un de Paune un de Rieekjapaunen von reinem Golt; un de Jehenja to de Däaflichte fa daut bennaschte Hus, daut Aulaheilichste, un to de Däaflichte vom Tempelhus, von Golt.

⁵¹Un soo wia daut gaunze Woakj foadich, daut de Kjennich Salomo fa daut Hus Gottes muak. Un Salomo brocht de jeheilichte Dinj von sienem Voda nenn; daut Selwa un daut Golt un daut Jereetschoft läd hee enne Schauzkoma vom Hus Gottes.