Read De Bibel JHF 1. Kjennichs 9 Bible Online

1. Kjennichs 9 - De Bibel JHF bible

1. Kjennichs 9

¹Un daut passieed, aus Salomo däm Bu vom Hus Gottes un daut Kjennichshus no aulem Wensch Salomo, daut am to moaken jefoll, foadich haud,

²doa erschien de Har toom tweeden Mol däm Salomo, aus hee am en Gibeon erschienen wia.

³Un de Har räd to am: Ekj ha dien Jebäd un diene Bedd jehieet, daut du ver mie jebedd hast; ekj ha dit Hus, daut du jebut hast, jeheilicht, om mienem Nomen doahan opp eewich too saten; un miene Uagen un mien Hoat sellen doa selfst aule Tiet sennen.

⁴Un du, wan du ver mie gonen woascht, soo aus dien Voda David jegonen es, met rajchtschaufnem Hoaten un opprechtich, daut du no aulem deist, waut ekj die befoolen ha, un wan du miene Sazungen un miene Rajchte hoolen woascht,

⁵soo woa ekj däm Troon von dienem Kjennichtum äwa Israel faustmoaken eewichlich, soo aus ekj too dienem Voda David jerät ha, endäm ekj säd: Daut saul die nich aun eenem Maun oppem Troon Israels fälen.

⁶Oba wan jie, jie un june Kjinja, von mie aufdreien un miene Jebooten, miene Sazungen, dee ekj junt väajelajcht ha, nich hoolen woaren, un woaren hangonen un aundre Jetta deenen un junt ver an dolbekjen,

⁷soo woa ekj Israel ut däm Launt utroden, daut ekj an jejäft ha; un daut Hus, daut ekj mienem Nomen jeheilicht ha, woa ekj von mienem Aunjesecht veschmieten; un Israel woat toom Sprechwuat un toom Spott unja de Velkja woaren.

⁸Un dit Hus, daut huach erhowen wia, woat jiedra, dee aun däm seljen vebie jeit, woat sikj vefieren un spotten. Un maun woat sajen: Wuarom haft de Har dit Launt un disem Hus aulsoo jedonen?

⁹Un maun woat sajen: Doarom, daut see däm Harn, äarem Gott, dee äare Vodasch ut däm Ägiptenlaunt rutjefieet haft, veloten un aundre Jetta aunjenomen un sikj ver an venäjd un an jedeent ha; doarom haft de Har aul dit Onjlekj äwa an jebrocht.

¹⁰Un daut passieed aum Enj von 20 Joa, en dee Salomo de beid Hiesa, daut Hus Gottes un daut Kjennichshus, jebut haud, -

¹¹Hiram, de Kjennich von Tierus, haud Salomo met Zeedaholt un met Zupresholt un met Golt no aul sienem Wensch unjastät - doa jeef de Kjennich Salomo däm Hiram 20 Städa em Launt Galiläa.

¹²Un Hiram jinkj von Tierus ut, om de Städa too beseenen, dee Salomo am jejäft haud, un see wieren nich rajcht en siene Uagen.

¹³Un hee säd: Waut sent daut fa Städa, dee du mie jejäft hast, mien Brooda! Un hee nand an daut Launt Kabul bat opp disem Dach.

¹⁴Hiram haud däm Kjennich 120 Talent Golt jeschekjt.

¹⁵Un dit es de Sach met de Opploag, dee de Kjennich Salomo oppläd, om daut Hus Gottes too buen un sien Hus un daut Millo [Burjch] un de Mia von Jerusalem, un Hazor un Megiddo un Geser.

¹⁶(De Farao, de Kjennich von Ägipten, wia raufjegonen un haud Geser enjenomen un daut met Fia vebrent un de Kanaanita, dee enne Staut wonden, jeschloagen; un hee haud daut siene Dochta, Salomo siene Fru, aus Jeschenkj jejäft.)

¹⁷Un Salomo bud Geser un daut unjre Bat-Horon,

¹⁸un Baalat, un Tadmor [Tamar]; enne Wieste, em Launt;

¹⁹un aule Väarotstäda, dee Salomo haud, un de Städa met Woages un de Rittastäda; un waut Salomo Lost haud too buen en Jerusalem un oppem Libanon un em gaunzen Launt siene Harschoft.

²⁰Aulet Volkj, daut von de Amorita, de Hetita, de Perisita, de Hewita un de Jebusita äwajebläwen wia, dee nich von de Kjinja Israel wieren;

²¹äare Säns, dee no an em Launt äwajebläwen wieren, dee de Kjinja Israel nich vebaunen kunnen, dee muak Salomo too Opploag Oabeida bat opp disem Dach.

²²Oba von de Kjinja Israel muak Salomo kjeene Sklowen, sonda see wieren Kjrichsmana un siene Kjnajchts un siene Bowaschten un siene Aunfiera, un Bowaschte von siene Woages un siene Rittasch.

²³Dit sent de bowaschten Oppsechta, dee äwa Salomo sienem Woakj wieren; 550, dee äwa daut Volkj wieren, daut aum Woakj oabeid.

²⁴Sooboolt de Dochta vom Farao ut David siene Staut en äa Hus noppjegonen wia, daut hee ar jebut haud, doa bud hee Millo.

²⁵Un Salomo opfad dree Mol em Joa Brauntopfa un Dankopfa opp däm Aultoa, däm hee, däm Harn jebut haud; un hee rieekjad opp am, dee ver däm Harn stunt. Un hee muak daut Hus foadich.

²⁶Un de Kjennich Salomo muak Schäp en Ezjon-Geber, daut bie Eloth, aum Eewa vom Schelpmäa es, em Launt Edom.

²⁷Un Hiram schekjt siene Kjnajchts oppe Schäp, Scheppmana, dee oppem Mäa erfoaren wieren, met Salomo siene Kjnajchts.

²⁸Un see kaumen no Ofir un holden von doa Golt, 420 Talent, un brochten daut nom Kjennich Salomo.