Read De Bibel JHF 2. Kjennichs 10 Bible Online

2. Kjennichs 10 - De Bibel JHF bible

2. Kjennichs 10

¹Un Ahab haud 70 Säns en Samaria. Un Jehu schreef Breew un schekjt dee no Samaria aun de Bowaschte von Jesreel, de Eltestasch, un aun de Väaminda de Säns Ahab, un doa wia jeschräwen:

²Un nu, wan dis Breef no junt kjemt, - bie junt sent junem Harn siene Säns, un bie junt de Woages un de Pieed, un eene fauste Staut un Jewäaren -,

³soo sieekjt däm basten un rajchtschaufnen ut junem Harn siene Säns, un sat am oppem Troon von sienem Voda; un stried fa junem Harn sien Hus.

⁴Oba see enjsten sikj sea un säden: Kjikj, dee twee Kjennichs kunnen ver am nich bestonen, un woo well wie bestonen?

⁵Un dee äwa daut Hus un dee äwa de Staut wia un de Eltestasch un de Väaminda schekjten no Jehu un leeten am sajen: Wie sent diene Kjnajchts, un aules, waut du too ons sajen woascht, well wie doonen; wie wellen kjeenem toom Kjennich moaken; doo, waut en diene Uagen goot es.

⁶Doa schreew hee toom tweeden Mol aun an eenen Breef, dee wia aulsoo: Wan jie fa mie sent un opp miene Stemm hieren, soo nämt de Kjap de Mana, junem Harn siene Säns, un komt morjen om dise Tiet no mie no Jesreel. (Un de Kjennichsäns, 70 Maun, wieren bie de Groote de Staut, dee an groot jemoakt hauden).

⁷Un daut passieed, aus de Breef no an kaum, doa naumen see de Kjennichsäns un schlachten an, 70 Maun, un läden äare Kjap en Kjarw un schekjten dee no am no Jesreel.

⁸Un een Boote kaum un berecht am un säd. Maun haft de Kjap de Kjennichssäns jebrocht. Un hee säd: Lajcht dee en 2 Hupes aum Engank biem Dooa, bat Zemorjes.

⁹Un Zemorjes passieed daut, doa jinkj hee rut un kaum han un räd toom gaunzen Volkj: Jie sent Jerajcht! Kjikjt, ekj ha eene Veschwierunk jäajen mienem Harn jemoakt un ha am omjebrocht; oba wäa haft aul dise omjebrocht?

¹⁰Soo erkjant nu, daut nuscht oppe Ieed faulen woat vom Wuat Gottes, daut de Har jäajen Ahab sienem Hus jerät haft; un de Har haft jedonen, waut hee derch sienem Kjnajcht Elia jerät haft.

¹¹Un Jehu schluach aule, dee von Ahab sienem Hus en Jesreel äwajebläwen wieren, un aul siene Groote un siene Bekaunde un siene Priesta, bat kjeen Wajchjeranda äwableef.

¹²Un hee muak sikj opp un jinkj un kaum no Samaria. Hee wia bie Bat-Eked-Haroim [Hoadshus] oppem Wajch,

¹³doa troff Jehu de Breeda von Ahasja, däm Kjennich von Juda; un hee säd: Wäa sent jie? Un see säden: Wie sent de Breeda von Ahasja un sent raufjekomen, om de Kjennichssäns un de Kjennijin äare Säns too bejreessen.

¹⁴Un hee säd: Jriept an läwendich! Un see jreepen an läwendich un schlachten an biem Borm von Bat-Eked, 42 Maun, un hee leet kjeenem von an äwa.

¹⁵Un hee jinkj von doa un troff Jonadab, Rechab sienen Sän, dee am entjäajen kaum; un hee jreest am un säd to am: Es dien Hoat opprechtich, aus mien Hoat jäajen dien Hoat? Un Jonadab säd: Daut es et. Wan daut soo es, soo jeff mie diene Haunt. - Un hee jeef am siene Haunt. Doa leet hee am no sikj oppem Woagen stieen,

¹⁶un säd: Komm met mie un kjikj die mien Iewa fa däm Harn aun! Un see fieeden am opp sienem Woagen.

¹⁷Un aus hee no Samaria kaum, schluach hee aule, dee von Ahab en Samaria äwajebläwen wieren, bat hee an vetiljd haud, nom Wuat Gottes, daut hee too Elia jerät haud.

¹⁸Un Jehu vesaumeld daut gaunze Volkj un räd to an: Ahab haft däm Baal weinich jedeent, Jehu well am väl deenen.

¹⁹Un nu, roopt aule Baal Profeeten, aul siene Deena un aul siene Priesta no mie; daut kjeena fält! Dan ekj ha een grootet Schlachtopfa fa Baal. Kjeena, dee nich kjemt, saul aum Läwen bliewen! Oba Jehu haundeld met Hinjalest, om de Baalsaunbäda omtobrinjen.

²⁰Un Jehu säd: Heilicht däm Baal een Fast! Un maun roopt daut ut.

²¹Un Jehu schekjt en gaunz Israel omhäa. Doa kaumen aule Baal Deena; kjeena bleew äwa, dee nich jekomen wia; un see jinjen en daut Baalhus, un daut daut Hus von Baal wort voll von eenem Enj bat nom aundren.

²²Un hee säd to däm, dee äwa de Kjleedakoma wia: Brinjt Kjleeda rut fa aule Baaldeena! Un hee brocht an Kjleeda rut.

²³Un Jehu un Jonadab, Rechab sien Sän, jinjen en daut Baalhus; un hee säd to de Baaldeena: Forscht un kjikjt too, daut nich eena von de Deena Gottes hia bie junt es, sonda blooss Baaldeena auleen!

²⁴Un see jinjen nenn, om Schlachtopfa un Brauntopfa to brinjen. Oba Jehu haud sikj buten 80 Maun bestalt un jesajcht: Dee janja, dee eenem von de Mana wajchranen lat, dee ekj en june Henj jebrocht ha, sien Läwen saul fa däm sien Läwen sennen.

²⁵Un daut passieed, aus maun met däm Brauntopfa foadich wia, doa säd Jehu to de Wajchta un de Rittasch: Got nenn, schlot an; kjeena kjemt rut! Un see schluagen an met däm schoapen Schwieet. Un de Wajchta un de Rittasch schmeeten an wajch. Un see jinjen nom Stautdeel von Baal sienem Hus,

²⁶un brochten de Biltstendasch vom Baalhus rut un vebrenden dee; un see reeten de Biltstenda vom Baal dol;

²⁷un see reeten daut Baalhus dol un muaken Mellhupes doarut, bat opp disem Dach.

²⁸Aulsoo vetiljd Jehu däm Baal ut Israel.

²⁹Blooss von Jerobeam, Nebat sienem Sän, siene Sinden, wuaderch hee Israel veleit haud, von dee leet Jehu nich auf; von de goldne Kjalwa, dee en Betel un en Dan wieren.

³⁰Un de Har säd to Jehu: Wiels du die jehoolen hast, waut en miene Uagen rajcht es, un aun däm Hus Ahab no aulem jedonen hast, waut en mienem Hoaten wia, soo sellen die Säns bat däm vieeden Jlett opp Israels Troon setten.

³¹Oba Jehu acht nich doaropp, em Jesaz Gottes, däm Gott Israels, met sienem gaunzen Hoaten too gonen; hee jinkj nich von de Sinden Jerobeam auf, wuaderch hee Israel toom sindjen veleit haud.

³²En jane Doag deed de Har aunfangen Israel kjlanda too moaken; un Hasael schluach an un aule Jrensen Israels,

³³vom Jordan aun, jäajen Sonnenoppgank, daut gaunze Launt Gilead, de Gadita un de Rubenita un de Manassita, von Aroer aun, daut aum Fluss Arnon licht, soo aus Gilead soo uk Baschan.

³⁴Un daut Äwaje de Jeschicht Jehu un aules, waut hee jedonen haft, un aul siene Macht, es daut nich em Buak de Chronik de Kjennichs von Israel jeschräwen?

³⁵Un Jehu läd sikj to siene Vodasch, un maun begrow am en Samaria. Un Joaas, sien Sän, wort Kjennich en siene Städ.

³⁶Oba de Doag, dee Jehu äwa Israel en Samaria rejieed, wieren 28 Joa.