Read De Bibel JHF 2. Kjennichs 11 Bible Online

2. Kjennichs 11 - De Bibel JHF bible

2. Kjennichs 11

¹Un aus Atalja, de Mutta Ahasja, sach, daut äa Sän doot wia, doa muak see sikj opp un brocht aulem Kjennichs Somen om.

²Oba Joscheba, de Dochta vom Kjennich Joram, Ahasja siene Sesta, naum Joasch, Ahasja sienem Sän, un stool am ut de Medd de Kjennichsäns wajch, dee omjebrocht worden, un deed am un siene Aume enne Schlopstow; un soo vestuak see am ver Atalja, un hee wort nich omjebrocht.

³Un hee wia sas Joa bie ar em Hus Gottes vestoaken. Oba Atalja rejieed äwa daut Launt.

⁴Un aum säwenden Joa schekjt Jojada han un leet de Bowaschte äwa 100 Kjennichwajchta un de Hoffwajchta holen un no sikj em Hus Gottes komen; un hee muak eenen Bunt met an un leet an em Hus Gottes schwieren, un hee wees an däm Kjennich sienen Sän.

⁵Un hee befool an un säd: Dit es daut, waut jie doonen sellen: een dreddel von junt, dee jie aum Sabat häakomen, sellen daut Kjennichshus bewoaken,

⁶un een dreddel saul aum Dooa Sur, un een dreddel aum Dooa hinja de Wajchtasch sennen; un jie sellen biem Hus opppaussen.

⁷Un de twee aundre Aufdeelinj von junt, aula, dee aum Sabat wajchgonen, dee sellen em Hus Gottes wacht hoolen biem Kjennich.

⁸Un jie sellen däm Kjennich runtom ommstalen, een jiedra met sienem Jewäa en siene Haunt; un wäa enne Rieej enndrinjt, saul omjebrocht woaren, un jie sellen biem Kjennich sennen, wan hee utjeit un wan hee nennjeit.

⁹Un de Bowaschte äwa 100 deeden no aulem, waut de Priesta Jojada befoolen haud; un see neemen een jiedra siene Mana, dee aum Sabat aunkaumen met dän aum Sabat wajchjinjen, un kaumen nom Priesta Jojada.

¹⁰Un de Priesta jeef däm Bowaschten äwa 100 de Spiessen un de Schilda, dee däm Kjennich David jehieet hauden, dee em Hus Gottes wieren.

¹¹Un de Wajchta stalden sikj opp, een jiedra met sienem Jewäa en siene Haunt, von de rajchte Hussied bat aune linkje Hussied, biem Aultoa un biem Hus, runtom däm Kjennich.

¹²Un hee fieed däm Kjennichssän rut un sad am eene Kroon opp un jeef am daut Zeichnis, un see muaken am toom Kjennich un saulwden am; un see klautschte enne Henj un roopten: Daut läft de Kjennich!

¹³Un aus Atalja daut Jeschrecht de Wajchta un daut Volkj hieed, kaum see nom Volkj em Hus Gottes.

¹⁴Un see sach; un kjikj, de Kjennich stunt aum Stenda, no de Jewanheit, un de Bowaschte un de Trompeeta biem Kjennich; un daut gaunze Laundesvolkj wia froo un blosde enne Trompeeten. Doa vereet Atalja äare Kjleeda un roopt: Veschwierunk, Veschwierunk!

¹⁵Un de Priesta Jojada befool de Bowaschte äwa 100, dee äwa daut Häa jestalt wieren, un säden to an: Fieet ar rut butre Rieeje, un wia ar folcht, däm brinjt met daut Schwieet om! Dan de Priesta säd: See saul nich em Hus Gottes omjebrocht woaren.

¹⁶Un see muaken ar Plauz, un see jinkj em Kjennichshus oppem Wajch nom Engank fa de Pieed; un see wort doa selfst omjebrocht.

¹⁷Un Jojada muak eenen Bunt tweschen däm Harn un däm Kjennich un däm Volkj, daut see daut Volkj Gottes sennen sullen, un tweschen däm Kjennich un däm Volkj.

¹⁸Doa jinkj aulet Laundesvolkj en daut Baalhus un reeten daut dol; siene Aultoaren un siene Bilda veschluagen see gaunz; un Mattan, däm Baalpriesta, brochten see ver däm Aultoa om. Un de Priesta sad Oppsechta äwa daut Hus Gottes en.

¹⁹Un hee naum de Bowaschte äwa 100 un de Kjennichswajchta un de Wajchta un aulet Laundesvolkj, un see fieeden däm Kjennich ut däm Hus Gottes rauf un kaumen oppem Wajch nom Dooa de Wajchtasch en daut Kjennichshus; un hee sad sikj oppem Troon de Kjennichs.

²⁰Un aulet Laundesvolkj freid sikj, un de Staut haud Ru. Oba Atalja hauden see em Kjennichshus met daut Schwieet omjebrocht.