Read De Bibel JHF 2. Kjennichs 12 Bible Online

2. Kjennichs 12 - De Bibel JHF bible

2. Kjennichs 12

¹Säwen Joa wia Joasch oolt, aus hee Kjennich wort.

²Aum säwenden Joa Jehu wort Joasch Kjennich, un hee rejieed 40 Joa en Jerusalem; un de Nomen von siene Mutta wia Zibja, von Beerscheba.

³Un Joasch deed, waut rajcht enne Uagen Gottes wia, soolang de Priesta Jojada am belieed.

⁴Doch de Hechten kaumen nich wajch; daut Volkj opfad un rieekjad noch oppe Hechten.

⁵Un Joasch säd to de Priesta: Aulet Jelt de jeheilichte Dinj, daut em Hus Gottes jebrocht woat; daut Jelt von eenem jiedren Jemostaden, daut Jelt de Seelen, no äare Schazung von eenem jiedren, un aulet Jelt, daut wäa friewellich opfat, daut et em Hus Gottes jebrocht woat,

⁶daut sellen de Priesta aun sikj nämen, een jiedra von siene Bekaunde; un see selfst sellen däm vefollnem Bu utbetre, aules, waut toom utbetre jefungen woat.

⁷Un daut passieed, aum 23-sten Joa vom Kjennich Joasch hauden de Priesta daut vefollne Buwoakj vom Hus nich utjebätat.

⁸Doa roopt de Kjennich Joasch däm Priesta Jojada un de aundre Priesta un säd to an: Wuarom bäta jie nich daut vefollne Buwoakj ut? Un nu sell jie kjeen Jelt von june Bekaunde nämen, sonda jie sellen daut fa däm vefollnen Buwoakj aum Hus häajäwen.

⁹Un de Priesta wellijde en, kjeen Jelt mea vom Volkj too nämen, un uk fa daut utbetre aum Hus nich mea too sorjen.

¹⁰Un de Priesta Jojada naum eene Lod un boad een Loch en äa Dakjsel, un hee stald dee biem Aultoa, aune rajchte Sied, wan maun em Hus Gottes nenjinkj; un de Priesta, dee aune Schwal woakt, läd aulet Jelt doa nenn, daut em Hus Gottes jebrocht wort.

¹¹Un daut passieed, wan see sagen, daut väl Jelt enne Lod wia, soo kaumen de Schriewa vom Kjennich un de Huagapriesta rauf, un see bungen daut Jelt toop un talde daut, daut em Hus Gottes jefungen wort.

¹²Un see jeewen daut aufjewoagne Jelt en dee äare Henj, dee daut Woakj deeden, dee äwa daut Hus Gottes jestalt wieren; un dise jeewen daut ut aun de Holtoabeida un aun de Bulied, dee aum Hus Gottes oabeiden,

¹³un aun de Mia Oabeida un aun de Steenschnieda, un om Holt un behakte Steena to kjeepen, om daut vefollne Buwoakj aum Hus Gottes uttobätren, un fa aules, waut toom utbetre aum Hus utjejäft wort.

¹⁴Doch worden fa daut Hus Gottes kjeene selwane Kommen, Massasch, sprinj Kommen, Trompeeten, noch irjent een goldnet Jereetschoft ooda een selwanet Jereetschoft, von däm Jelt jemoakt, daut em Hus Gottes jebrocht wort;

¹⁵sonda maun jeef daut dän, dee daut Woakj deeden, daut see daut Hus Gottes doamet utbetade.

¹⁶Un maun räakjend uk nich auf met dee Mana, en dee äare Haunt maun daut Jelt jeef, om daut dän to jäwen, dee daut Woakj deeden; dan see haundelde tru.

¹⁷Daut Jelt von Schultopfa un daut Jelt von Sindopfa wort nich en daut Hus Gottes jebrocht; daut wia fa de Priesta.

¹⁸Too de Tiet jinkj Hasael, de Kjennich von Sierien, nopp un street jäajen Gat un naum daut en. Un Hasael recht sien Aunjesecht doahan, jäajen Jerusalem nopptogonen.

¹⁹Doa neem Joasch, de Kjennich von Juda, aule jeheilichte Dinj, dee Josafat un Joram un Ahasja, siene Vodasch, de Kjennichs von Juda, jeheilicht hauden, un siene jeheilichte Dinj, un aul daut Golt, daut en de Schauzkoma vom Hus Gottes un em Kjennichshus wia, un schekjt daut Hasael, däm Kjennich von Sierien. Un hee jinkj wajch von Jerusalem.

²⁰Un daut Äwaje de Jeschicht Joasch un aules, waut hee jedonen haft, es daut nich em Buak de Chronik de Kjennichs von Juda jeschräwen?

²¹Un siene Kjnajchts stunden opp un muaken eene Veschwierunk, un see schluagen Joasch em Hus Millo doot, woa maun no Silla raufjeit.

²²Un Josakar, Schimeat sien Sän, un Josabad, Schomer sien Sän, siene Kjnajchts, brochten am om, un hee storf; un maun begrow am bie siene Vodasch en David siene Staut. Un Amazja, sien Sän, wort aun siene Städ Kjennich.