Read De Bibel JHF 2. Kjennichs 13 Bible Online

2. Kjennichs 13 - De Bibel JHF bible

2. Kjennichs 13

¹Aum 23-sten Joa Joasch, Ahasja sienem Sän, däm Kjennich von Juda, wort Joahas, Jehu sien Sän, Kjennich äwa Israel en Samaria un rejieed 17 Joa.

²Un hee deed, waut enne Uagen Gottes bees wia; un hee jinkj de Sinden Jerobeam no, Nebat sienem Sän, wuaderch hee Israel toom sindjen veleit haud; hee leet nich doavon auf.

³Doa flaumd de Oaja Gottes jäajen Israel opp; un hee jeef an enne Haunt Hasael, däm Kjennich von Sierien, un enne Haunt Ben-Hadad, däm Sän Hasael, aule Doag lank.

⁴Un Joaas bäd däm Harn aun; un de Har hieed opp am, hee sach de Bedrenkjnis Israels, dan de Kjennich von Sierien bedrenjd an.

⁵(Un de Har jeef Israel eenen Rada, un see kaumen ut de Haunt Sierien rut; un de Kjinja Israel wonden en äare Zelten aus verhäa.

⁶Dan noch leeten see nich von de Sinden, to dee daut Hus Jerobeam Israel veleit haud; see jinjen doabennen; uk de Aschera bleef en Samaria stonen).

⁷Dan hee haud däm Joaas kjeen Volkj äwajeloten, aus blooss 50 Rittasch un 10 Woages 10 000 Maun Footvolkj; dan de Kjennich von Sierien haud an venicht un an aus Stoff jemoakt, däm maun veklunjt.

⁸Un daut Äwaje de Jeschicht Joaas un aules, waut hee jedonen haud, un siene Macht, es daut nich em Buak de Chronik de Kjennichs von Israel jeschräwen?

⁹Un Joaas läd sikj to siene Vodasch, un maun begrow am en Samaria. Un Joasch, sien Sän, wort Kjennich en siene Städ.

¹⁰Aum 37-sten Joa Joasch, däm Kjennich von Juda, wort Joasch, Joahas sien Sän, Kjennich äwa Israel en Samaria un rejieed 16 Joa.

¹¹Un hee deed, waut enne Uagen Gottes bees wia; hee leet nich von de Sinden Jerobeam, Nebat sienem Sän, wuaderch hee Israel toom sindjen veleit haud; hee leet nich doavon.

¹²Un daut Äwaje de Jeschicht Joasch un aules, waut hee jedonen haud, un siene Macht, woo hee met Amazja, däm Kjennich von Juda, jesträden haud, es daut nich em Buak de Chronik de Kjennichs von Israel jeschräwen?

¹³Un Joasch läd sikj to siene Vodasch, un Jerobeam sad sikj opp sienem Troon; un Joasch wort en Samaria begroft bie de Kjennichs von Israel.

¹⁴Un Elisa wort krank, un storf aun siene Krankheit. Un Joasch, de Kjennich von Israel, kaum no am rauf un hield äwa sien Aunjesecht un säd: Mien Voda, mien Voda! Woages Israel un siene Rittasch!

¹⁵Doa säd Elisa to am: Hol Boages un Feilasch. Un hee hold Boagen un Feilasch.

¹⁶Un hee säd toom Kjennich von Israel: Laj diene Haunt oppem Boagen. Doa läd hee siene Haunt doanopp; un Elisa deed siene Haunt oppem Kjennich siene Henj.

¹⁷Un hee säd: Moak daut Fensta jäajen Morjen op. Un hee muak daut op. Un Elisa säd: Scheet! Un hee schoot. Un hee säd: Een radungs Feila von däm Harn jäajen de Siera! Un soo woascht du de Siera en Afek schlonen, bat see venicht sent.

¹⁸Un hee säd: Nemm de Feilasch. Un hee naum dee. Un hee säd toom Kjennich von Israel: Schloh oppe Ieed! Un hee schluach dree Mol un hild stell.

¹⁹Doa wort de Maun Gottes oajalich äwa am un säd: Du haudst fief ooda sas mol schlonen sullen, dan wuddst du de Siera bat to Venichtunk jeschloagen haben; oba nu woascht du de Siera dree Mol schlonen.

²⁰Un Elisa storf, un maun begrow am. Un daut kaum daut moabitische Kjrichshäa em Launt, aus daut Joa aunfunk.

²¹Un daut passieed, aus see eenen Maun begrowen, kjikj, doa sagen see daut Kjrichshäa, un see schmeeten däm Maun en Elisa sien Grauf; un aus de Maun Elisa siene Knoakes beread, doa wort hee läwendich un stunt opp siene Feet.

²²Un Hasael, de Kjennich von Sierien, bedrenjd Israel, soo lang Joaas läwd.

²³Oba de Har wia am jnädich un erboarmd sikj äwa an un dreid sikj no an, wäajen sienem Bunt met Abraham, Isaak un Jakob; un hee wull an nich vedoawen un schmeet an nich von sien Aunjesecht wajch bat doahan.

²⁴Un Hasael, de Kjennich von Sierien, storf. Un Ben-Hadad, sien Sän, wort aun siene Städ Kjennich.

²⁵Doa naum Joasch, Joahas sien Sän, ut de Ben-Hadad siene Haunt, von Hasael sienem Sän, de Städa wada, dee disa ut sienem Voda Joaas siene Haunt jenomen haud. dree Mol schluach Joasch am un brocht de Städa Israels wada trigj.