Read De Bibel JHF 2. Kjennichs 14 Bible Online

2. Kjennichs 14 - De Bibel JHF bible

2. Kjennichs 14

¹Aum tweeden Joa von Joasch, Joahas sienem Sän, däm Kjennich von Israel, wort Amazja Kjennich, Joasch sien Sän, vom Kjennich von Juda.

²Hee wia 25 Joa oolt, aus hee Kjennich wort, un hee rejieed 29 Joa en Jerusalem; un de Nomen von siene Mutta wia Joadin, von Jerusalem.

³Un hee deed, waut enne Uagen Gottes rajcht wia, blooss nich aus sien Voda David; hee deed no aulem, waut sien Voda Joasch jedonen haud.

⁴Doch de Hechten kaumen nich wajch; daut Volkj opfad un rieekjad noch oppe Hechten.

⁵Un daut passieed, aus daut Kjennichtum en siene Haunt stoakja wort, doa schluach hee siene Kjnajchts, dee däm Kjennich, sienem Voda, omjebrocht hauden.

⁶Oba de Säns von de Merda brocht hee nich om, aus em Jesazbuak Moses jeschräwen steit, woa de Har befoolen un jesajcht haft: De Vodasch sellen nich omjebrocht woaren om de Kjinja äa wellen, un de Kjinja sellen nich omjebrocht woaren om de Vodasch äa wellen, sonda see sellen een jiedra fa siene Sinden stoawen.

⁷Hee schluach de Edomieta enne Soltläacht, 10 000 Maun, un neem Sela en em Kaumf, un hee jeef am däm Nomen Jokteel bat opp disem Dach.

⁸Doa schekjt Amazja Booten aun Joasch, Joaas sienem Sän, vom Sän Jehu, däm Kjennich von Israel, un leet am sajen: Komm, lot ons eenaunda em Aunjesecht seenen!

⁹Doa schekjt Joasch, de Kjennich von Israel, no Amazja, däm Kjennich von Juda, un leet am sajen: Daut Hachelstruck oppem Libanon schekjt nom Zeeda oppem Libanon un leet am sajen: Jeff mienem Sän diene Dochta to Fru! Doa randen de wille Tieren, dee oppem Libanon sent, doaräwa un veklunjde daut Hachelstruck.

¹⁰Du hast de Edomieta jenslich jeschloagen, un dien Hoat äwahäft sikj; ha dienem Riem un bliew en dienem Hus! Wuarom west du die met däm Onjlekj ennloten, daut du fellst, du un Juda met die?

¹¹Oba Amazja hieed nich. Doa jinkj Joasch, de Kjennich von Israel, nopp; un see sagen eenaunda von Aunjesecht, hee un Amazja, de Kjennich von Juda, en Bat-Semes, daut Juda jehieet.

¹²Un Juda wort von Israel jeschloagen; un see randen, een jiedra no sienem Zelt.

¹³Un Joasch, de Kjennich von Israel, naum Amazja, däm Kjennich von Juda, Joasch sienem Sän, vom Sän Ahasja, en Bat-Semes jefangen. Un hee kaum no Jerusalem un reet de Stautmia von Jerusalem en, vom Dooa Efraim bat aun däm Akjdooa, 400 Ellen lank.

¹⁴Un hee naum aulet Golt un Selwa, un aulet Jereetschoft, daut em Hus Gottes un enne Schauzkoma vom Kjennichshus jefungen wort, un doatoo Jefangne un jinjen trigj no Samaria.

¹⁵Un daut Äwaje de Jeschicht Joasch, waut hee jedonen, un siene Macht, un woo hee met Amazja, däm Kjennich von Juda, jesträden haud, es daut nich em Buak de Chronik de Kjennichs von Israel jeschräwen?

¹⁶Un Joasch läd sikj to siene Vodasch, un wort begroft en Samaria bie de Kjennichs von Israel. Un Jerobeam, sien Sän, wort aun siene Städ Kjennich.

¹⁷Un Amazja, Joasch sien Sän, de Kjennich von Juda, läwd nom Doot Joasch, dän Sän von Joaas, däm Kjennich von Israel, 15 Joa.

¹⁸Un daut Äwaje de Jeschicht Amazja, es daut nich em Buak de Chronik de Kjennichs von Juda jeschräwen?

¹⁹Un see muaken eene Veschwierunk jäajen am en Jerusalem, un hee rand no Lachisch; un see schekjten am hinjaraun bat Lachisch un brochten am doa selfst om.

²⁰Un see brochten am opp Pieed, un hee wort en Jerusalem bie siene Vodasch en David siene Staut begroft.

²¹Un daut gaunze Volkj von Juda naum Asarja, dee 16 Joa oolt wia, un see muaken am toom Kjennich aun sienem Voda Amazja siene Städ.

²²Hee bud Elat un brocht daut trigj no Juda, nodäm de Kjennich sikj to siene Vodasch jelajcht haud.

²³Aum 15-den Joa Amazja, Joasch sienem Sän, däm Kjennich von Juda, wort Jerobeam, Joasch sien Sän, däm Kjennich von Israel, Kjennich en Samaria un rejieed 41 Joa.

²⁴Un hee deed, waut enne Uagen Gottes bees wia; hee leet nich von aule Sinden Jerobeam auf, Nebat sienem Sän, wuaderch hee Israel toom sindjen veleet haud.

²⁵Hee stald de Jrensen Israels wada häa, vom Engank Hamat bat aune Läacht aum Soltmäa, nom Wuat Gottes, däm Gott Israels, daut hee derch sienem Kjnajcht Jona jerät haft, Amittai sienem Sän, däm Profeet, dee von Gat-Hefer wia.

²⁶Dan de Har sach, daut et Älent Israels sea betta wia, un daut et doahan wia met de Jebungne un met de Friee, un daut kjeen Halpa fa Israel doa wia.

²⁷Un de Har haud nich jesajcht, daut hee däm Nomen Israels unja däm Himmel uttilje wudd; un soo rad hee an derch Jerobeam siene Haunt, Joasch sienem Sän.

²⁸Un daut Äwaje de Jeschicht Jerobeam, un aules, waut hee jedonen, un siene Macht, woo hee jesträden, un woo hee Damaskus un Hamat, dee Juda jehieet hauden, aun Israel trigjjebrocht haud, es daut nich em Buak de Chronik de Kjennichs von Israel jeschräwen?

²⁹Un Jerobeam läd sikj to siene Vodasch, to de Kjennichs von Israel. Un Secharja, sien Sän, wort Kjennich en siene Städ.