Read De Bibel JHF 2. Kjennichs 15 Bible Online

2. Kjennichs 15 - De Bibel JHF bible

2. Kjennichs 15

¹Aum 27-ten Joa Jerobeam, däm Kjennich von Israel, wort Asarja Kjennich, Amazja sien Sän, vom Kjennich von Juda.

²16 Joa wia hee oolt, aus hee Kjennich wort, un rejieed 52 Joa en Jerusalem; un de Nomen von siene Mutta wia Jekolja, von Jerusalem.

³Un hee deed waut enne Uagen Gottes rajcht wia, no aulem, waut sien Voda Amazja jedonen haud.

⁴Doch de Hechten veschwungen nich; daut Volkj opfad un rieekjad noch oppe Hechten.

⁵Un de Har schluach däm Kjennich, un hee wort utsauzich bat aun sienem doodes Dach; un hee wond en eenem aufjesondadem Hus. Oba Jotam, de Sän vom Kjennich, wia äwa daut Kjennichshus un recht daut Laundesvolkj.

⁶Un daut Äwaje de Jeschicht Asarja, un aules, waut hee jedonen haft, es daut nich em Buak de Chronik de Kjennichs von Juda jeschräwen?

⁷Un Asarja läd sikj to siene Vodasch, un maun begrow am bie siene Vodasch en David siene Staut. Un Jotam, sien Sän, wort Kjennich en siene Städ.

⁸Aum 38-sten Joa Asarja, däm Kjennich von Juda, wort Secharja, Jerobeam sien Sän, Kjennich äwa Israel en Samaria un rejieed sas Moonat.

⁹Un hee deed, waut enne Uagen Gottes bees wia, soo aus siene Vodasch jedonen hauden; hee leet nich auf von de Sinden Jerobeam, Nebat sienem Sän, wuaderch hee Israel toom sindjen veleit haud.

¹⁰Un Sallum, Jabes sien Sän, muak eene Veschwierunk jäajen am un schluach am ver däm Volkj un muak am doot. Un hee wort Kjennich aun siene städ.

¹¹Un daut Äwaje de Jeschicht Sekarja, kjikj, daut es em Buak de Chronik de Kjennichs von Israel jeschräwen.

¹²Daut es daut Wuat Gottes, daut hee too Jehu jerät haud, endäm hee säd. Die sellen Säns bat däm vieeden Jlett oppem Troon Israels setten. Un daut passieed aulsoo.

¹³Sallum, Jabes sien Sän, wort Kjennich aum 39-sten Joa Usija, däm Kjennich von Juda; un hee rejieed eenen Moonat lank en Samaria.

¹⁴Doa jinkj Menachem, Gadi sien Sän, von Tirza rauf un kaum no Samaria; un hee schluach Sallum, Jabes sienem Sän, en Samaria un brocht am om. Un hee wort Kjennich aun siene Städ.

¹⁵Un daut Äwaje de Jeschicht von Sallum, un siene Veschwierunk, dee hee jemoakt haft, kjikj, es daut nich em Buak de Chronik de Kjennichs von Israel jeschräwen.

¹⁶Donn schluach Menachem Tifsach un aules, waut doa wia, un äare Jäajent, von Tirza aun; wiels maun am nich wull nenn loten, soo schluach hee daut; aul äare Schwangre schneet hee opp.

¹⁷Aum 39-sten Joa Asarja, däm Kjennich von Juda, wort Menachem, de Sän von Gadi, Kjennich äwa Israel un rejieed 10 Joa en Samaria.

¹⁸Un hee deed, waut enne Uagen Gottes bees wia; hee leet nich auf von de Sinden Jerobeam, Nebat sienem Sän, wuaderch hee Israel toom sindjen veleid haud, soo lang hee läwd.

¹⁹Un Pul, de Kjennich von Assierien, kaum en daut Launt; un Menachem jeef Pul 1000 Talent Selwa, doamet siene Haunt met am wia, om daut Kjennichtum en siene Haunt faust too moaken.

²⁰Un Menachem läd de Jelttolinj opp Israel, opp aule rikjen Lied, om daut däm Kjennich von Assierien to jäwen; 50 Schekel Selwa opp jiedrem Maun. Doa jinkj de Kjennich von Assierien trigj un bleew nich em Launt.

²¹Un daut Äwaje de Jeschicht von Menachem un aules, waut hee jedonen haud, es daut nich em Buak de Chronik de Kjennichs von Israel jeschräwen?

²²Un Menachem läd sikj to siene Vodasch. Un Pekachja, sien Sän, wort Kjennich en siene städ.

²³Aum 50-sten Joa Asarja, däm Kjennich von Juda, wort Pekachja, Menachem sien Sän, Kjennich äwa Israel en Samaria un rejieed twee Joa.

²⁴Un hee deed, waut enne Uagen Gottes bees wia; hee leet nich auf von de Sinden Jerobeam, Nebat sienem Sän, wuaderch hee Israel toom sindjen veleit haud.

²⁵Un Pekach, Remalja sien Sän, sien Ritta, muak eene Veschwierunk jäajen am schluach am en Samaria, enne Burjch vom Kjennichshus, met Argob un met Arjeh; un met am wieren 50 Maun vonne Säns de Gileadita. Un hee brocht am om un wort Kjennich aun siene Städ.

²⁶Un daut Äwaje de Jeschicht von Pekachja un aules, waut hee jedonen haud, kjikj, daut es em Buak de Chronik de Kjennichs von Israel jeschräwen.

²⁷Aum 52-sten Joa Asarja, däm Kjennich von Juda, wort Pekach, Remalja sien Sän, Kjennich äwa Israel en Samaria un rejieed 20 Joa.

²⁸Un hee deed, waut enne Uagen Gottes bees wia; hee leet nich auf von de Sinden Jerobeam, Nebat sienem Sän, wuaderch hee Israel toom sindjen veleit haud.

²⁹Aun de Doag Pekach, däm Kjennich von Israel, kaum Tiglat-Pileser, de Kjennich von Assierien, un hee naum Ijjon en un Abel-Bat-Maaka un Janoach un Kedes un Hazor un Gilead un Galiläa, daut gaunze Launt Naftali, un fieed de Bewona wajch no Assierien.

³⁰Un Hosea, Ela sien Sän, muak eene Veschwierunk jäajen Pekach, Remalja sienem Sän, un schluach am un brocht am om. Un hee wort Kjennich aun siene Städ, aum 20-sten Joa Jotam, Usija sienem Sän.

³¹Un daut Äwaje de Jeschicht Pekach un aules, waut hee jedonen haud, kjikj, daut es em Buak de Chronik de Kjennichs von Israel jeschräwen.

³²Aum tweeden Joa Pekach, Remalja sienem Sän, däm Kjennich von Israel, wort Jotam Kjennich, Usija sien Sän, vom Kjennich von Juda.

³³25 Joa wia hee oolt, aus hee Kjennich wort, un hee rejieed 16 Joa en Jerusalem; un de Nomen von siene Mutta wia Jeruscha, Zadok siene Dochta.

³⁴Un hee deed, waut enne Uagen Gottes rajcht wia; hee deed no aulem, waut sien Voda Usija jedonen haud.

³⁵Blooss de Hechten veschwungen nich; daut Volkj opfad un rieekjad noch oppe Hechten. Hee bud daut bowaschte Dooa vom Hus Gottes.

³⁶Un daut Äwaje de Jeschicht Jotam un aules, waut hee jedonen haud, es daut nich em Buak de Chronik de Kjennichs von Juda jeschräwen?

³⁷Aun jane Doag funk de Har aun, Rezin, däm Kjennich von Sierien, un Pekach, Remalja sienem Sän, jäajen Juda too schekjen.

³⁸Un Jotam läd sikj to siene Vodasch, un hee wort begroft bie siene Vodasch en David siene Staut. 39 Un Ahas, sien Sän, wort Kjennich aun siene Städ.