Read De Bibel JHF 2. Kjennichs 16 Bible Online

2. Kjennichs 16 - De Bibel JHF bible

2. Kjennichs 16

¹Aum 17-den Joa Pekach, Remalja sienem Sän, wort Ahas Kjennich, Jotam sien Sän, vom Kjennich von Juda.

²20 Joa wia Ahas oolt, aus hee Kjennich wort, un hee rejieed 16 Joa en Jerusalem. Un hee deed nich, waut enne Uagen Gottes rajcht wia, sienem Gott, aus sien Voda David;

³sonda hee jinkj oppe Wäaj Israels Kjennichs, un hee leet soogoa sienen Sän derch daut Fia gonen, nom Aufschu de Nazionen, dee de Har ver de Kjinja Israel rutjejoacht haud;

⁴un hee opfad un rieekjad oppe Hechten un oppe Aunboaj un unja jiedrem jreenem Boom.

⁵Donn jinkj Rezin, de Kjennich von Sierien, un Pekach, Remalja sien Sän, de Kjennich von Israel, no Jerusalem nopp toom Kaumf; un see beloagaden Ahas, oba see kunnen nich jäajen am stonen.

⁶Too dee selje Tiet brocht Rezin, de Kjennich von Sierien, Elat wada no Sierien un juach de Juden ut Elat rut; un de Siera kaumen no Elat, un see wonden doa bat opp disem Dach.

⁷Doa schekjt Ahas Booten no Tiglat-Pilesa, däm Kjennich von Assierien, un leet am sajen: Ekj sie dien Kjnajcht un dien Sän; komm rauf un rad mie ut de Haunt vom Kjennich von Sierien un ut de Haunt vom Kjennich von Israel, dee sikj jäajen mie oppjemoakt ha!

⁸Un Ahas neem daut Selwa un daut Golt, daut sikj em Hus Gottes un em Schauzhus vom Kjennichshus wia, un schekjt daut aus Jeschenkj aun däm Kjennich von Assierien.

⁹Un de Kjennich von Assierien hieed opp am; un de Kjennich von Assierien jinkj nopp jäajen Damaskus un naum daut en un fieed siene Enwona wajch no Kir; un Rezin brocht hee om.

¹⁰Un de Kjennich Ahas jinkj Tiglat-Pilesa, däm Kjennich von Assierien, entjäajen, no Damaskus. Un aus hee däm Aultoa sach, dee en Damaskus wia, doa schekjt de Kjennich Ahas däm Priesta Uria een Aufbilt vom Aultoa un siene Buoat, woo dee jemoakt wia.

¹¹Un de Priesta Uria bud däm Aultoa; no aulem, waut de Kjennich Ahas von Damaskus jeschekjt haud, aulsoo muak am de Priesta Uria, bat de Kjennich Ahas von Damaskus kaum.

¹²Un aus de Kjennich von Damaskus kaum, un de Kjennich däm Aultoa sach, doa kaum de Kjennich nom Aultoa un opfad doabowen;

¹³un hee rieekjad sien Brauntopfa un sien Speisopfa, un goot sien Drinkjopfa ut, un spretst daut Bloot von sienem Dankopfa aun däm Aultoa.

¹⁴Oba däm koppanen Aultoa, dee ver däm Harn stunt, däm deed hee vonne väaschte Sied em Hus wajch, von dee Städ, tweschen sienem Aultoa un däm Hus Gottes; un hee sad am aune Sied von sienem Aultoa jäajen Nuaden.

¹⁵Un de Kjennich Ahas befool däm Priesta Uria un säd: Rieekja opp däm groote Aultoa Zemorjes Brauntopfa un Oppenowent Speisopfa, un daut Kjennichs Brauntopfa met sienem Speisopfa, un daut Brauntopfa vom gaunzen Laundesvolkj met äare Speisopfa un äare Drinkjopfa; un aulet Bloot de Brauntopfa un aulet Bloot de Schlachtopfa saust du doaraun spretzen; un de koppane Aultoa saul fa mie toom bedenkjen (noforsche) sennen.

¹⁶Un de Priesta Uria deed no aulem, waut de Kjennich Ahas befoolen haud.

¹⁷Un de Kjennich Ahas bruak de Leeste von de Jestalen auf un deed däm Grope, dee doabowen stunt, wajch; un hee leet daut Mäa von de koppane Rinda, de doaunja wieren, raufneeme un opp eene Unjaloag von Steena saten.

¹⁸Un de bedakjten Sabathaul, dee maun aum Hus jebut haud, un däm butaschten Kjennichsengank veendad hee aum Hus Gottes wäajen däm Kjennich von Assierien.

¹⁹Un daut Äwaje de Jeschicht Ahas, waut hee jedonen haud, es daut nich em Buak de Chronik de Kjennichs von Juda jeschräwen?

²⁰Un Ahas läd sikj to siene Vodasch, un hee wort bie siene Vodasch en David siene Staut begroft. Un Hiskia, sien Sän, wort Kjennich en siene Städ.